வேட்டி அணிந்த இந்தியருக்கு ரயிலில் பயணிக்க அனுமதி மறுப்பு :(

by **krishnaamma** Mon Aug 05, 2013 7:46 pm

துபாயில் வேட்டி அணிந்து சென்ற இந்தியர் ஒருவருக்கு மெட்ரோ ரயிலில் பயணிக்க அனுமதி மறுக்கப்பட்டது.

வேட்டி அணிந்து சென்ற 67 வயது இந்தியரை மெட்ரோ ரயிலில் பயணிக்க அனுமதிக்காமல் துபாய் காவல் துறையினர் தடுத்த சம்பவம் அங்கு வாழும் இந்தியர்களிடையே அதிருப்தியை ஏற்படுத்தியுள்ளது.

துபாயில் வசிக்கும் தனது மகளை சந்திக்க வந்த 67 வயது இந்தியர் ஒருவரை எடிசலட் மெட்ரோ ரயில் நிலையத்தில் வழிமறித்த போலீசார், அவருக்கு மெட்ரோ ரயிலில் பயணிக்க அனுமதி இல்லை எனத் தெரிவித்தனர்.

இதற்கு அவர்கள் தெரிவித்த காரணம் இந்தியர் அணிந்திருந்த வேட்டி தான். தனது தந்தையுடன் இருந்த மதுமிதா என்னும் பெண், வேட்டி பாரம்பரியமான இந்திய உடை என விளக்கமளித்தப்போதும் போலீசார் அதனை கேட்க மறுத்துவிட்டனர்.

இதுதொடர்பாக தெரிவித்த மதுமிதா, இதே உடையுடன் எனது தந்தை பலமுறை மெட்ரோ ரயில்களில் பயணம் செய்துள்ளார். நான் பலமுறை விளக்கிக் கூறியும் காதில் வாங்க மறுத்த அந்த போலீஸ்காரர் எங்களை ரயில் நிலையத்திலிருந்து விரட்டியடிப்பதிலேயே குறியாக இருந்தார் எனக் கூறியுள்ளார்.

இச்சம்பவத்திற்கு கண்டனம் தெரிவித்த சாலை மற்றும் போக்குவரத்து அதிகாரி, ரமடான் அப்துல்லா, மெட்ரோ ரயிலில் பயணிப்பதற்கு எவ்வகை ஆடை கட்டுப்பாடுகளையும் நாங்கள் விதிக்கவில்லை. உடலை மறைக்கும் மரியாதையான ஆடையுடன் யார் வேண்டுமானாலும் மெட்ரோ ரயில்களில் பயணம் செய்யலாம்.

அந்த போலீஸ்காரர் வேட்டியுடன் வந்த நபரை தடுத்து நிறுத்தியது அவரது தனிப்பட்ட மனநிலையைதான் காட்டுகிறது எனக் கூறியுள்ளார்.

இச்சம்பவம் தொடர்பாக பாதிக்கப்பட்டவரின் மகள் மதுமிதா, புகார் அளித்துள்ளார். இந்த புகாரின்பேரில் விசாரணை நடத்தப்படுமென தெரிவிக்கப்பட்டுள்ளது.

நன்றி : வெப்துனியா