சென்னை மாநகர பேருந்து தாறுமாறாக ஓடியது - குடிபோதையில் ஓட்டுனர்

by **சாமி** Sat Aug 03, 2013 8:36 am

திருவொற்றியூர்.ஆக. 2 / எண்ணூரில் இருந்து திருவான்மியூருக்கு நேற்று இரவு மாநகர பேருந்து (1சி) சென்றது. ஓட்டுனர் கலையரசன் ஓட்டினார். 20–க்கும் மேற்பட்ட பயணிகள் இருந்தனர். திருவொற்றியூர் பேருந்து நிலையம் அருகே வந்த போது திடீரென பேருந்து தாறுமாறாக ஓடியது. சாலையோரத்தில் லோடு சைக்கிளில் பினாயில் பாட்டில்களை தள்ளிச் சென்ற வியாபாரி காலடிப் பேட்டையை சேர்ந்த செல்வராஜ் மீது மோதி நின்றது. இதில் அவர் பலத்த காயம் அடைந்தார்.

இதனை பார்த்து அதிர்ச்சி அடைந்த பயணிகளும் பொது மக்களும் டிரைவர் கலையரசனிடம் வாக்குவாதத்தில் ஈடுபட்டனர். இதனால் அங்கு பரபரப்பு ஏற்பட்டது.

அந்த நேரத்தில் வாகன சோதனையில் ஈடுபட்டு இருந்த வண்ணாரப்பேட்டை போக்குவரத்து போலீசார் அங்கு வந்து டிரைவரிடம் விசாரணை நடத்தினர்.

அப்போது அவர் குடி போதையில் தள்ளாடிய படி பதில் கூற முடியாமல் உளறினார். இதையடுத்து கலையரசனை விசாரணைக்காக போலீஸ் நிலையம் அழைத்து சென்று விட்டனர். பின்னர் பயணிகள் வேறு பேருந்துகளில் ஏறிச் சென்றனர்.

போதையில் ஓட்டுனர் ர் பேருந்தை கனரக வாகனங்களில் மோதி இருந்தால் மிகப்பெரிய விபத்து ஏற்பட்டு இருக்கும்.

இதுபற்றி பயணிகள் கூறும்போது, ‘‘ஒவ்வொரு ஓட்டுனரும் போதையில் உள்ளாரா? இல்லையா? என்பதை அறிந்து பேருந்தில் ஏற முடியுமா? பயணிகளின் உயிர்களுக்கு டிரைவர் தான் பாதுகாப்பு. இதுபற்றி துளியும் சிந்திக்காமல் போதையில் ஓட்டுனர் பேருந்தை ஓட்டிச் சென்றதை நினைத்தால் பயமாக உள்ளது. இப்படிப்பட்டவர்கள் மீது கடும் நடவடிக்கை எடுக்க வேண்டும்’’ என்றனர்.

by **சிவா** Sat Aug 03, 2013 9:26 am

அரசே மதுக்கடைகளை நடத்தும் பொழுது ஒரு அரசு ஊழியர் குடிக்கக் கூடாது எனக் கூற மக்களுக்கு என்ன தகுதி உள்ளது! மாண்புமிகு அம்மா அவர்கள் இவர்கள் மீது விரைவில் அவதூறு வழக்குத் தொடர்வார்கள் என்ற நம்பிக்கையில் மனம் நிம்மதியடைகிறேன்!

by ராஜு சரவணன் Sat Aug 03, 2013 10:00 am

கொல்லபேரு இப்படித்தான் ஓட்டுராங்க. இது ஒன்னும் தப்பா தெரியல. சிவா அவர்கள் கூறியது போல் மக்களின் சந்தோசத்திற்கு உருவாக்கபட்ட டாஸ்மாக்கில் அதுவும் அரசு ஊழியர் ஒருவர் சரக்கு அடித்துவிட்டு அரசு பேருந்தை ஓட்டுவது எந்தவிதத்திலும் தவறு இல்லை.விபத்து நடந்தால் இழப்பீடு பெற்றுக்கொள்ளலாமே.

by **ஜாஹீதாபானு** Sat Aug 03, 2013 1:23 pm

மணலில இருந்து 44பி வண்டிய ஓட்டும் ஓட்டுனர் குடிச்சிருப்பாராணு தெரியாது .ஆனா அவர் பஸ்ல ஏறினா குடல் எல்லாம் வெளிய வந்து விழுந்துடும் அவ்ளோ ஸ்பீடா ஓட்டுவார்

by DERAR BABU Sat Aug 03, 2013 3:44 pm

ராஜு சரவணன் wrote:கொல்லபேரு இப்படித்தான் ஓட்டுராங்க. இது ஒன்னும் தப்பா தெரியல. சிவா அவர்கள் கூறியது போல் மக்களின் சந்தோசத்திற்கு உருவாக்கபட்ட டாஸ்மாக்கில் அதுவும் அரசு ஊழியர் ஒருவர் சரக்கு அடித்துவிட்டு அரசு பேருந்தை ஓட்டுவது எந்தவிதத்திலும் தவறு இல்லை.விபத்து நடந்தால் உலகம் முழுவதும் கொலை, கொள்ளை, கற்பழிப்பு; என்ன காரணம்?பெற்றுக்கொள்ளலாமே.

அவங்க சந்தோசத்துக்காக மத்தவங்க சாகனுமா? இழப்பீடை வைத்து என்ன பண்றது ராஜூ .

by **ராஜா** Sat Aug 03, 2013 4:13 pm

சிவா wrote:அரசே மதுக்கடைகளை நடத்தும் பொழுது ஒரு அரசு ஊழியர் குடிக்கக் கூடாது எனக் கூற மக்களுக்கு என்ன தகுதி உள்ளது! மாண்புமிகு அம்மா அவர்கள் இவர்கள் மீது விரைவில் அவதூறு வழக்குத் தொடர்வார்கள் என்ற நம்பிக்கையில் மனம் நிம்மதியடைகிறேன்!

நியாயமான கருத்து தான், ஒரு அரசு ஊழியர் அரசு நடத்தும் அம்மா உணவகத்தில் சாப்பிட்டு விட்டு பேருந்து ஓட்டலாம் தானே அதுபோல தான் இதுவும் அரசு மதுக்கடையில் தானே அவர் குடித்தார் கள்ள சாராயமா குடித்தார் .....

இந்த செய்தியை வெளியிட்ட பத்திரிகை & ஈகரையில் பதிவு செய்த சாமி ஆகியோர் மீது தமிழக அரசின் மக்கள் நல திட்டத்தை (டாஸ்மாக்) எதிர்த்து கருத்துக்கள் கூறியதற்காக தமிழகஅரசு கடும் நடவடிக்கை எடுக்க வேண்டும். சிரி