ஃபுட் பாய்சன் வராமல் தடுப்பது நம் கையில் !

**krishnaamma** · **krishnaamma** Mon 29 Jul 2013 - 20:35

அந்த சிறுமிக்கு சிக்கன் பிரியாணி சாப்பிட்ட சிறிது நேரத்திலேயே கடுமையான வயிற்றுவலி. தொடர்ந்து வயிற்றுப்போக்கு. கடைசியில் அவள் இறந்தே போனாள். சிக்கன் பிரியாணியில் வேர்க்கடலையையும் கலந்திருந்ததால், அந்த உணவு விஷமாக மாறிவிட்டது என்றார்கள்.

ஆனால், வேர்க்கடலையையும் சிக்கன் பிரியாணியையும் கலந்து கொடுத்ததால் இந்த விபத்து நடக்கவில்லை என்பதை புரிந்து கொள்ளுங்கள்.

நிலக்கடலையோ சிக்கன் துண்டோ கெட்டுப் போயிருக்க வேண்டும். உண்மையில், அதுதான் உணவை விஷமாக்கியுள்ளது.
நவீனயுகத்தில் எதையும் அவசரம் அவசரமாக விழுங்கிவிட்டு ஓடுவது, நேரமின்மையைக் காரணம் காட்டி, அன்று சமைத்ததை ஆறு நாட்களுக்குக்கூட பதப்படுத்தி வைத்து சாப்பிடுவது, இவை எல்லாமும்தான் ஃபுட் பாய்சன் ஏற்படக் காரணங்கள்.
ஃபுட் பாய்சனை நாம் சாதாரணமாக விட்டால் அது உயிருக்கே ஆபத்தாகிவிடும். சிலருக்கு மூளை, பக்கவாத பாதிப்புகள் கூட வரக்கூடும். அதனால் அதுபற்றியும் அதைத் தடுக்கும் முறைகள் பற்றியும் கொஞ்சம் தெரிந்து வைத்துக் கொண்டால் நல்லதுதானே.

ஃபுட்பாய்சனுக்கு அடிப்படைக்காரணம்!

புரதச் சத்து அதிகம் உள்ள உணவுப் பொருட்கள் கெடும் தன்மை கொண்டவை. அதனால் அவற்றைப் பயன்படுத்தும் முறையை வைத்து ஃபுட் பாய்சனைத் தடுக்கலாம்.

1. வேர்க்கடலை, பால், மட்டன், சிக்கன், மீன் இவையெல்லாம் சீக்கிரம் கெட்டுவிடும். அதனால் அவற்றை ஃப்ரெஷ்ஷாக பயன்படுத்த வேண்டும்.

2. எண்ணெயில் பொரித்த உணவுகள் எதுவாக இருந்தாலும் கெட்டுப் போயிருந்தால் அவற்றை தூக்கி எறிந்து விடுங்கள். மீறி சாப்பிட்டால் ஃபுட் பாய்சன் கண்டிப்பாக வரும்.

3. ரொட்டிகளில் பூஞ்சை இருப்பது தெரிந்தால், அந்த ரொட்டியை முழுவதுமாக பயன்படுத்தக்கூடாது. பூஞ்சை உள்ள பகுதியை மட்டும் பிச்சிப் போட்டுவிட்டு, மற்றவற்றை குழந்தைகளுக்கு சாப்பிடக் கொடுத்தால் கண்டிப்பாக ஃபுட்பாய்சன் ஆகும்.

ஃபுட் பாய்சனுக்கு ஃபிரிட்ஜ் தான் முக்கிய காரணம். ஒரு பொருளில் உள்ள பூஞ்சை இன்னொரு பொருளுடன் சேர்ந்து அந்தப் பொருளையும் கெடுக்கும். அவை நம் கண்ணுக்குத் தெரியாது. அதை பயன்படுத்தும்போது உணவு கெட்டுப் போக வாய்ப்புகள் அதிகம்.

அதனால் ஃபிரிட்ஜில் வைக்கும் உணவுப் பொருட்கள், காய்கறிகள், பழங்களை தனித்தனி கவர்களில் போட்டு வைக்க வேண்டும். எதிலாவது பூஞ்சை பிடித்திருந்தால் அதைக் கொட்டிவிடுங்கள்.

உணவுகளை அதிகளவு சமைத்து, ஃபிரிட்ஜில் அடைத்து வைத்து சாப்பிடுவதை குறைத்துக் கொள்ளுங்கள்.
சில சமையல் பொருட்களை சாலாவதியான பின்னரும், தூக்கிப் போடாமல சமையலில் உபயோகிப்பது எல்லோர் வீட்டிலும் நடைபெறுகிறது. அது உணவைக் கெடுக்க நாமே அனுமதிப்பதற்கு சமமாகும்.

ஃபுட்பாய்சன் வந்தபின் குணமாக்க:

1. ஒரு டேபிள் ஸ்பூன் இஞ்சிச் சாறுடன் தேனைக் கலந்து சாப்பிடலாம்.
2. கொதித்த்து இறக்கிய நீரில் கொஞ்சம் சீரகத்தைப் போட்டு 15 நிமிடம் மூடி வைத்து விட்டு, அந்த நீரைப் பருகினால் நல்லது.
3. துளசிச் சாறுடன் கொஞ்சம் தேனைக் கலந்து சாப்பிடுங்கள்.
4. வாழைப்பழம் அல்லது ஆப்பிளை நன்கு மிக்ஸியில் போட்டு அடித்து தண்ணீராக தரலாம்.
5. லெமன் சாறுடன் சர்க்கரை கலந்து குடித்தாலும் ஃபுட்பாய்சன் விரைவில் குணமாகும்.
6. புதினா டீ போட்டு சாப்பிடலாம்.
7. எல்லாவற்றிற்கும் மேலாக ஃபுட்பாய்சன் கண்டவர்கள், சுத்தமான தண்ணீரைக் குடித்துக் கொண்டே இருக்க வேண்டும்.

மற்றபடி, அந்த உணவுடன் இந்த உணவைச் சேர்த்து சாப்பிட்டால் ஃபுட் பாய்சன் ஆகிவிடும், சிக்கன் சாப்பிட்டபின் பால் சாப்பிடக்கூடாது, மீன் சாப்பிட்ட பிறகு தயிர் சாப்பிடக்கூடாது, கீரைக்கும் மோருக்கும் ஆகாது என்பதெல்லாம் சுத்தப்பொய். எதுவும் கெடாமல் இருக்கும் பட்சத்தில் கெடுதல் இல்லை.

தடுக்கும் முறைகள்

1. சமைப்பவர் சாப்பிடுபவர் கை சுத்தமாக இருக்க வேண்டும். சமையலறையை சுத்தமாக வைத்திருக்க வேண்டும்.
2. சமைக்கப் பயன்படுத்தும், கத்தி, பலகை ஆகியவற்றை சுத்தமாக வைத்துக் கொள்ள வேண்டும்.
3. பழங்கள், கீரைகள், காய்கறிகள் உபயோகிக்கும் முன் நன்கு கழுவிவிட்டுப் பயன்படுத்துங்கள்.
4. ஃபிரிட்ஜில் வைத்த உணவை எடுத்துப் பயன்படுத்தும்போது, அதன் ஜில்லிப்புத் தன்மை முற்றிலும் தீரும்வரை வெளியில் வைக்கவும்.
5. இரண்டு மூன்று நாட்களுக்குப் பயன்படுத்த விரும்புபவர்கள், தனித்தனி பாத்திரங்களில் உணவு பொருளை ஃபிரிட்ஜில் வைப்பது நல்லது.
6. உணவில் துர்நாற்றம் அடித்தாலோ பூஞ்சை இருப்பது தெரிந்தாலோ அதை எந்தக் காரணம் கொண்டும் பயன்படுத்தக் கூடாது.
7. செல்லப் பிராணிகளிடமிருந்து உணவுப் பொருடகளை தள்ளியே வைத்திருங்கள்.

நன்றி - தினமணி - இரா. மணிகண்டன்