காந்திமதி அம்பாளுக்கு வளைகாப்பு வைபவம் :)

திருநெல்வேலி அருள்மிகு நெல்லையப்பர் திருக்கோயிலில் ஆடிப்பூரத் திருவிழாவின் முக்கிய நிகழ்ச்சியான காந்திமதி அம்பாள் வளைகாப்பு வைபவம் சனிக்கிழமை சிறப்பாக நடைபெற்றது.

பிரசித்தி பெற்ற இத்திருக்கோயிலில் கொண்டாடப்படும் விழாக்களுள் ஆடிப்பூரத் திருவிழாவும் ஒன்று. இந்த ஆண்டுக்கான திருவிழா கடந்த 31-ஆம் தேதி தொடங்கியது. இதையொட்டி காலையில் சுவாமி, அம்பாளுக்கு சிறப்பு அபிஷேகமும், அலங்கார தீபாராதனையும் நடைபெற்றன. இந்த விழா வரும் ஆகஸ்ட் 9-ஆம் தேதி வரை நடைபெறுகிறது. விழா நாள்களில் தினமும் அம்பாளுக்கு சிறப்பு அபிஷேகமும், இரவில் வீதி உலாவும் நடைபெறுகிறது.

விழாவின் 4-ஆம் நாளான சனிக்கிழமை, காந்திமதி அம்பாளுக்கு வளைகாப்பு வைபவம் சிறப்பாக நடைபெற்றது. இதையொட்டி காலையில் சுவாமிக்கும், அம்பாளுக்கும் சிறப்பு அபிஷேகமும், சிறப்பு பூஜைகளும் நடைபெற்றன. தொடர்ந்து அம்பாள் ஊஞ்சல் மண்டபத்தில் எழுந்தருளும் நிகழ்ச்சி நடைபெற்றது. அங்கு அம்பாளுக்கு சிறப்பு அபிஷேகம் நடத்தப்பட்டு வளைகாப்பு அணிவிக்கப்பட்டு அலங்காரம் செய்யப்பட்டது. பின்னர் அம்பாளுக்கு தீபாராதனை நடைபெற்றது.

இந்த வளைகாப்பு வைபவத்தில் திரளான பெண்கள் பங்கேற்றனர். அவர்களுக்கு பிரசாதமாக வளையல் வழங்கப்பட்டது. இரவில் காந்திமதி அம்பாள், சன்னதியிலிருந்து வெள்ளி ரிஷப வாகனத்தில் இரவு 8 மணிக்கு திருநெல்வேலி நகரின் நான்கு ரத வீதிகளிலும் வீதி உலா சென்று மீண்டும் திருக்கோயிலை வந்து சேரும் நிகழ்ச்சி நடைபெற்றது.

ஆடிப்பூரத் திருவிழாவின் 10-ஆம் நாளான வரும் ஆக.9-ஆம் தேதி இரவு ஊஞ்சல் மண்டபத்தில் ஆடிப்பூர முளைக்கட்டுத் திருவிழா நடைபெறவுள்ளது. திருக்கோயில் நிர்வாக அதிகாரி ந.யக்ஞ நாராயணன் மற்றும் கோயில் பணியாளர்கள் விழாவுக்கான ஏற்பாடுகளை சிறப்பாகச் செய்துள்ளனர்.

நன்றி : தினமணி