முல்லை-பெரியாறுக்கும் காவிரி கதிதானா?

ஓ... உச்ச நீதிமன்றமே...

முல்லை-பெரியாறுக்கும் காவிரி கதிதானா?

ஆங்கியேர்களின் ஆட்சிக்காலத்தில், திருவாங்கூர் சமஸ்தானம் மற்றும் சென்னை மாகாணம் இடையே ஏற்பட்ட ஒப்பந்தத்தின் அடிப்படையில் கேரள எல்லைக்குள் கட்டப்பட்டதுதான் முல்லை-பெரியாறு அணை. இதன் மூலம் தமிழகத்தின் தேனி, மதுரை பகுதிகளின் விவசாய பாசனத்துக்கு நீர் கிடைத்து வந்தது. ஆனால், அணையின் நீர்மட்டத்தை உயர்த்தினால், அணை உடையும் என்று சொல்லி, பல ஆண்டுகளாக பிரச்னை செய்து வருகிறது கேரளா.

இதுதொடர்பான வழக்கில், உச்ச நீதிமன்றத்தில் நேற்று (ஜூலை 31), ''அணையை கட்டியது, தமிழ்நாடுதான். ஆனால், அணை பாதுகாப்பு சட்டப்படி நீர்மட்டத்தை உயர்த்துவது தொடர்பாக முடிவு எடுக்கும் அதிகாரம் கேரளாவுக்கு இருக்கிறது'' என்று கூறியிருக்கிறது கேரளா.

இதைக் கேட்டதும் கொதித்தெழுந்துவிட்ட நீதிபதிகள், ''நீதிமன்ற உத்தரவை செயல்படுத்தாமல், உத்தரவு வெளியான 15 நாட்களுக்குள் 'கேரளா அணை பாதுகாப்பு சட்டம்' கொண்டு வந்துள்ளீர்கள். இது, உச்ச நீதிமன்ற தீர்ப்பை செயலிழக்க செய்வதுபோல் இருக்கிறது. தேவைப்பட்டால் அணை பாதுகாப்பு சட்டத்தை ரத்து செய்யும் உரிமைகூட இந்த நீதிமன்றத்துக்கு இருக்கிறது'' என்று எச்சரிக்கை விடுத்தனர்.

கொடுமை என்னவென்றால், நீர்மட்டத்தை உயர்த்த உச்ச நீதிமன்றம் உத்தரவிட்டது 2006-ம் ஆண்டு. அடுத்த நாளே... ஒரு சட்டத்தை இயற்றி உச்ச நீதிமன்றத்துக்கே சவால் விட்டது கேரளா. இதை எதிர்த்து உடனடியாக தமிழகமும் உச்ச நீதிமன்றத்தில் முறையிட்டது. கிட்டத்தட்ட ஏழு ஆண்டுகளாக இதை வேடிக்கை பார்த்துக் கொண்டிருந்துவிட்டு... இப்போதுதான் உச்ச நீதிமன்றம் தற்போது சீறிக் கொண்டிருக்கிறது.
சரி, இதற்குப் பிறகு என்ன நடக்கும்?
உடனடியாக முல்லை-பெரியாறில் தண்ணீர் சீறிக் கொண்டு தமிழ்நாட்டுக்கு வந்துவிடுமா?

உச்ச நீதிமன்றத்தின் அதிகாரம்... கர்நாடகா... கேரளாவில் எல்லாம் செல்லுபடியாகவில்லை என்பதுதான் உண்மை. காவிரி நீருக்காக ஆரம்பத்திலிருந்தே நீதிமன்றத்தில் போராடி, பிறகு காவிரி நடுவர் மன்றம் அமைக்கப்பட்டு அது பல ஆண்டுகளாக இழுபட்டு, ஒருவழியாக தன் தீர்ப்பை தந்தது நடுவர் மன்றம். 'சாதகமோ... பாதகமோ... அதில் கூறப்பட்டிருக்கும் தண்ணீரையாவது தா' என்றுதான் தமிழ்நாடு கேட்டது. ஆனால், அதையும் தராமல் முரண்டு பிடிக்கிறது கர்நாடகா. நடுவர் மன்ற தீர்ப்பு பற்றி, பழையபடி உச்ச நீதிமன்றத்தில் வழக்கு நடக்கிறது. கிட்டத்தட்ட 50 ஆண்டுகளாக இதே கதைதான்! பிறகு எதற்காக நடுவர் மன்றம் அமைத்தார்கள்?

ஆக, இனி, முல்லை- பெரியாறுக்கும் காவிரி கதைதானோ... நடுவர் மன்றம் அமைப்பார்கள்... அப்படியே இன்னும் ஒரு நூற்றாண்டுக்கு வழக்கை இழுத்தடிப்பார்கள்!

ம்ம்... என்ன நீதிமன்றங்களோ... என்ன அரசியலமைப்போ?!

-ஜூனியர் கோவணாண்டி