கடக ஆரல் (ஆடிக் கிருத்திகை) : திருத்தணியில் 5 லட்சம் பக்தர்கள் தரிசனம்

திருத்தணி முருகன் கோயிலில் புதன்கிழமை நடைபெற்ற கடக ஆரல் (ஆடிக்கிருத்திகை) விழாவில் சுமார் 5 லட்சம் பக்தர்கள் கலந்து கொண்டு முருகப்பெருமானை தரிசித்தனர்.

ஆறுபடை வீடுகளில் 5-ம் படை வீடாக திகழும் திருத்தணி முருகன் கோயிலில், கடக ஆரல் திருவிழா, கடந்த திங்கள்கிழமை கடக புரவி (அஸ்வினி) யுடன் தொடங்கியது. இதனைத்தொடர்ந்து செவ்வாய்கிழமை கடக அடுப்பும் (பரணி) , புதன்கிழமை கடக ஆரல் (கிருத்திகை) திருவிழாவும் நடைபெற்றது.

இந்த கடக ஆரலில் பங்கேற்க, தமிழகம் மட்டுமின்றி அண்டை மாநிலங்களான ஆந்திரம், கர்நாடகம், கேரளம், புதுச்சேரி உள்ளிட்ட பகுதிகளிலிருந்தும் ஆயிரக்கணக்கான பக்தர்கள் திருத்தணிக்கு வருகின்றனர். இதில் பல பக்தர்கள், தங்களது வேண்டுதலை நிறைவேற்றும் வகையில் மொட்டை அடித்தல், வேல் குத்துதல் உள்ளிட்ட நேர்த்திக் கடன்களை செய்கின்றனர்.

புதன்கிழமை நடைபெற்ற கடக ஆரலில் 5 வரிசைகளில் ஏராளமான பக்தர்கள் நீண்டநேரம் காத்திருந்து மூலவரை வழிப்பட்டனர்.

விழாவையொட்டி, முருகப்பெருமானுக்கு பால், பன்னீர், திருநீறு, சந்தனம், மஞ்சள் ஆகியவற்றால் சிறப்பு திருமஞ்சனங்கள் நடைபெற்றன.

இதனைத்தொடர்ந்து பச்சை மாணிக்க மரகதக் கல், தங்க கீரிடம், தங்க வேல் மற்றும் வைர ஆபரணங்கள் முருகப்பெருமானுக்கு அணிவிக்கப்பட்டு சிறப்பு தீபாராதனை நடைபெற்றது. இவ்விழாவில் சுமார் 5 லட்சம் பக்தர்கள் கலந்து கொண்டனர்.

காவடிகளுடன் வந்த பக்தர்கள் அவதி: விழாவுக்கு பல பகுதிகளிலிருந்து ஆயிரக்கணக்கான பக்தர்கள் காவடிகளுடன் வந்திருந்தனர்.

இந்நிலையில், வாகனங்கள் கோயிலிருந்து சுமார் 3 கிலோ மீட்டருக்கு முன்னதாகவே நிறுத்தப்பட்டதால் பக்தர்கள் சுமார் 8 மணிநேரம் வரை சாலையிலேயே காத்திருந்தனர். மேலும் வயதான பெரியவர்கள், கைக்குழந்தையுடன் வந்திருந்த பெண்கள் ஆகியோர் கடும் அவதிக்குள்ளாகினர்.

பிரசாதம் திடீர் விலையேற்றம்: கடக ஆரல் விழாவை முன்னிட்டு மலைக்கோயிலில் உள்ள பிரசாதக் கடையில் லட்டு மற்றும் பிரசாத செட் ஆகியவை திடீர் விலையேற்றம் செய்யப்பட்டது. ரூ.50-க்கு விற்ற பிரசாத செட் ரூ.100-க்கு விற்பனையானது. மேலும் ஒரு லட்டு கேட்டால் 6 லட்டுகளாக தான் தரப்படும் எனக் கட்டாய விற்பனைச் செய்யப்படுகிறது. இதனால் சில பக்தர்கள் பிரசாதம் வாங்க முடியால் ஏமாற்றத்துடன் திரும்பிச் சென்றனர்.