ஆங்கில மோகம் போலித்தனமான வாழ்க்கையை உருவாக்கிவிட்டது!

மதுரை /28 July 2013
ஆங்கில மோகம் சமூகத்தில் போலித்தனமான வாழ்க்கையை உருவாக்கிவிட்டது என்று, இந்திய கம்யூனிஸ்ட் கட்சியின் மூத்தத் தலைவர் ஆர். நல்லகண்ணு கூறினார்.

சமநீதி வழக்குரைஞர்கள் சங்கம் சார்பில், மதுரை காந்தி அருங்காட்சியக வளாகத்தில் சனிக்கிழமை நடைபெற்ற போராளி சங்கரலிங்கனார் நினைவேந்தல் கருத்தரங்கில் அவர் பேசியது:

சென்னை மாகாணம் என்ற பெயரை தமிழ்நாடு என மாற்றக் கோரி, 76 நாள்கள் உண்ணாவிரதம் இருந்து உயிரைவிட்டவர் சங்கரலிங்கனார். 1956 இல் இப் போராட்டம் நிகழ்ந்தாலும், அந்த கோரிக்கை 12 ஆண்டுகளுக்குப் பிறகே நிறைவேறியது. தமிழ்நாடு என பெயர் மாற்றக் கோரி முதல் போராட்டத்தைத் துவக்கிய சங்கரலிங்கனாரை மறந்துவிட்டனர்.

ஆனால், சரியாத தருணத்தில் அவரை நினைவுகூரும் வகையில், இக் கருத்தரங்கை சமநீதி வழக்குரைஞர்கள் நடத்தியிருப்பது பாராட்டுக்குரியது.

உலக நாடுகள் அனைத்திலும் கல்வி என்பது தாய்மொழியில் தான் அளிக்கப்படுகிறது. தாய்மொழியில் கற்கும்போது எந்தவொரு பாடத்தையும் இயல்பாக கற்றுக் கொள்ள முடியும். ஆனால், தாய்மொழியில் கல்வி கற்பதை கேவலமாக நினைக்கும்போக்கு இங்குதான் இருக்கிறது. பொதுமக்கள், அரசியல் என அனைத்து நிலைகளிலும் தமிழ் என்ற பெயரால் போலித்தனம் தான் மிஞ்சி நிற்கிறது.

தமிழுக்கு இருக்கும் தொன்மையும், சிறப்பும் வேறெந்த மொழிக்கும் இல்லை. அரசியல், இலக்கியம், அறிவியல் என தமிழின் சிறப்பு இல்லாத இடம் கிடையாது. ஆனால், இன்று எங்கே இருக்கிறது என்று கேட்கும் நிலை வந்துவிட்டது. அரசே ஒரு படி மேலே சென்று துவக்கப் பள்ளிகளில் ஆங்கிலவழிப் பிரிவை துவங்கியிருக்கிறது.

போலித் தனமான வாழ்க்கை வளையத்துக்குள் நம்மவர்கள் சிக்கியிருக்கின்றனர். இதிலிருந்து மீட்டுக்கொண்டு வரவேண்டும்.

துவக்கப் பள்ளிகளில் ஆங்கிலவழிப் பிரிவுகளை நடத்தும் நடவடிக்கையைக் கைவிட வேண்டும். அரசின் முக்கியப் பணியான மருத்துவமும், கல்வியும் தனியாருக்கு வழங்கப்படுகிறது. ஆனால், டாஸ்மாக் கடைகளை அரசு நடத்திக் கொண்டிருக்கிறது.

மெக்காலே உருவாக்கிய கல்வி முறைதான் இன்றும் நடைமுறையில் இருக்கிறது.

அது நம்மை அடிமைப்படுத்துவதற்கான கல்வி என்பதை இன்னும் உணராத நிலையில் தான் மக்கள் இருக்கின்றனர். உயர் நீதிமன்ற வழக்காடு மொழியாக தமிழை கொண்டு வருவதற்கான போராட்டங்கள் துவங்கியுள்ளன. நீண்ட போராட்டத்துக்குப் பிறகே அது சாத்தியமாகும் என்றார் நல்லகண்ணு.

இதில், பேராசிரியர் பிரபா கல்விமணி, மதுரை வழக்குரைஞர் சங்கச் செயலர் அ.க. ராமசாமி, சமநீதி வழக்குரைஞர்கள் சங்கச் செயலர் பெ. கனகவேல், தலைவர் மு. ராஜேந்திரன், வழக்குரைஞர்கள் நா. பழனியாண்டி, கு.ஞா. பகவத்சிங் உள்ளிட்டோர் பேசினர்.