தேடுகிறேன் கிடைப்பாளா ...?

by kavipiriyan Fri Jul 26, 2013 8:50 pm

அகிம்சை காத்த என்நாடு – இன்று

அடங்கா நாடாய் போனதேன்

ஒற்றுமை ஒலித்த நாட்டிலே - இன்று

ஓலங்கள் ஒலிக்குது கூட்டிலே

பனிதுளி தலைவர் பேச்சிலே - இன்று

பாறையா விழுகுதே ஏச்சிலே

மதங்கள் வளர்ந்தது நன்று – இன்று

மதமுடன் அலையுது கொன்று

மதமின்றி கைகள் இணைந்ததே – இன்று

மனம்கொன்று கால்கள் ஓடுதே

சாதிகள் இருந்தது இரண்டு – இன்று

சா தீயாய் பொசுக்குது மிரண்டு

கும்பிடும் மக்களின் கோலம் – இன்று

குண்டுகள் வெடித்திடும் ஓலம்

காதல் விளைந்தது வென்று – இன்று

களவாய் விளையுது நன்று

சிறைக்கு செல்பவன் தலைவன் – இன்று

சிறையில் பிறப்பவன் தலைவன்

சுடர்விட்ட சிலரை கொன்றாய் – இன்று

சுருட்டும் பலரை ஈன்றாய்

நீர்நிலம் நிரம்பிய காலம் – இன்று

நீங்கா துயரின் தாளம்

தொழிலால் வளர்ந்த தேசம் – இன்று

மொழியால் பிரிந்த நாசம்

வளமையில் செழித்த தாயாய் – இன்று

ஏழ்மையில் முதிர்ந்த மகளாய்

சுதந்திரம் எதுக்கு வென்றாய் – இன்று

சுருங்கிய நாடாய் நின்றாய்

எங்கே வீழ்ந்தாய் தாய்நாடே – இன்று

எங்கோ தொலைத்து தேடுகிறேன்..!

நாஞ்சில்

thalam ; tamilnanbarkal .com