6 கி.மீ. தூரத்துக்கு பரவிய புகையால் திருச்சி மக்களுக்கு மூச்சு திணறல் :(

**krishnaamma** · **krishnaamma** Thu Jul 25, 2013 11:24 am

திருச்சி : திருச்சி அரியமங்கலம் குப்பைக்கிடங்கு தீயை அணைக்கும் பணி 2வது நாளாக நேற்றும் தொடர்ந்தது. புகை மூட்டம் 6 கி.மீ தூரம் வரை பரவி மூச்சு திணறல் ஏற்பட்டுத்தியுள்ளது. திருச்சி அரியமங்கலத்தில் 47.7 ஏக்கரில் குப்பைக்கிடங்கு உள்ளது. மாநகராட்சியில் தினமும் சேகரிக்கப்படும் 400 டன் குப்பைகள் இங்கு கொட்டப்படுகின்றன. பல ஆண்டுகளாக அகற்றாதததால் 26 லட்சம் மெட்ரிக் டன் குப்பை, 9 மீட்டர் உயரத்திற்கு மலைபோல் இங்கு குவித்து வைக்கப்பட்டுள்ளது.

இந்த குப்பை கிடங்கில் நேற்று முன்தினம் மாலை தீப்பிடித்தது. தகவல் கிடைத்ததும், 8 தீயணைப்பு வாகனங்களில் வந்த வீரர்கள் தீயை அணைக்கும் முயற்சியில் ஈடுபட்டனர். ஆனால், ஆடிக்காற்று சுழன்று வீசியதால் தீ வேகமாக பரவியது. 6 ஏக்கர் பரப்பளவில் தீ கொழுந்துவிட்டு எரிய தொடங்கியது. இதை அணைக்க வீரர்கள் விடிய விடிய கடுமையாக போராடினர். நேற்றும் இப்பணி தொடர்ந்தது. எனினும் தீயை கட்டுப்படுத்த முடியவில்லை.

குப்பையிலிருந்து அதிகளவில் புகை வெளியேறியது. சுமார் 6 கி.மீ தூரம் திருவெறும்பூர் வரை புகையின் தாக்கம் இருந்தது. ஜன்னல், கதவுகளை மூடியிருந்தபோதும் நச்சுக்காற்று வீடுகளுக்குள் புகுந்ததால் குழந்தைகள் மற்றும் முதியவர்களுக்கு மூச்சுத்திணறல் ஏற்பட்டுள்ளது. குப்பை கிடங்கின் அருகிலுள்ள வீடுகளில் வசிக்கும் சில குழந்தைகள் மயங்கி விழுந்தனர்.

ஏராளமானோர் குழந்தைகளை வேறு பகுதியில் வசிக்கும் உறவினர்கள் வீடுகளுக்கு அனுப்பி வைத்து விட்டனர். மூச்சுதிணறல் காரண மாக திருச்சி,தஞ்சை சாலையில்குறைந்த வேகத்தில், முகப்பு விளக்கை எரியவிட்டபடி வாகனங்கள் சென்று வருகின்றன.

நன்றி : தினகரன்