என்ன இல்லை இந்து மதத்தில்?'

கர்மா அல்லது வினைப் பயன் என்கிற சொல்லுக்குக் கொச்சையாகப் பொருள் கொண்டு விடக்கூடாது. நமது சோம்பலுக்கும் இயலாமைக்கும் கர்மாவின் மேல் பழியைப் போட்டுவிடக் கூடாது. வசதிகளும் வாய்ப்புகளும் உள்ள குடும்பத்தில் ஒருவன் பிறக்கிறான். அதே நேரத்தில் மற்றொருவன் நடுத்தரக் குடும்பத்திலும், வேறொருவன் ஏழ்மையான குடும்பத்திலும் பிறக்கிறார்கள். இதற்கான காரணத்தை எவராலும் கண்டு சொல்ல முடியுமா? அல்லது இந்தக் குடும்பத்தில் பிறக்க வேண்டும் என்ற விருப்பத்தின் பேரிலா, தேர்ந்தெடுத்துக் கொண்டா அவர்கள் பிறக்கிறார்கள்? இல்லைதானே? எனவே இதனைக் கர்மா அல்லது வினைப் பயன் என்று சொல்லலாம்.

தத்துவஞானி இராதாகிருஷ்ணன் அவர்கள் இந்தக் கர்மா(விதி)விற்கும் மதிக்குமுள்ள தொடர்பினை இன்றைய மனிதர்கள் புரிந்து கொள்ளும் வகையில் மிக எளிமையாக எடுத்துக்காட்டின் மூலம் விளக்கியிருக்கிறார்.

சீட்டு விளையாட்டில், ஒருவன் சீட்டுகளை களைய, அடுத்திருப்பவன் ஜோக்கரை நிர்ணயிக்க ஒரு சீட்டைக் கட்டிலிருந்து எடுக்கிறான். இப்போது எல்லாருக்கும் சமமாக சீட்டுகள் போடப்பட்டுள்ளன. ஆடு களத்திலுள்ள சுமார் எட்டு நபர்களில் ஒருவனுக்கு அதிகமாகவே நான்கு ஜோக்கர்கள், ஆனால் ரம்மி ஆகவில்லை. அடுத்தவனுக்கோ ஜோக்கரே இல்லை. ஏறக்குறைய ஒன்றுதான் பாக்கி. எஞ்சிய அனைத்தும் சரியாகிவிட்டன. மூன்றாமவனுக்கு ஒரு சரியான சீட்டு வந்தால் பூரணம். ஆனால் மற்றவர் எவரேனும் வெற்றி கண்டால் வைத்திருக்கும் அனைத்துச் சீட்டுகளுக்கும் மதிப்பில்லை. அதாவது ரம்மி சேர்ந்தால் ஜெயம் என்ற நிலை (தன்ம்ம்ஹ் ஹய்க் ள்ட்ண்ற்) நான்காவது நபருக்கு ஏதோ பரவாயில்லை. ஆடிப் பார்க்கலாம் என்ற வகையில் நடுத்தரமான சீட்டுகள். கட்டை இடைமறித்து ஜோக்கர் சீட்டை நிர்ணயித்தவனுக்கும், கலைத்துப் போட்டவனுக்கும் ஒரு ஜோக்கர் கூட இல்லை. ரம்மியும் சேரவில்லை. இவ்வளவு சிரமப்பட்டுக் கலைத்தவனுக்கும் இல்லை. மிகுந்த எதிர்பார்ப்போடு ஜோக்கரை எடுத்தவனுக்கும் ஒன்றுமேயில்லையே... என்ன காரணம்? இதையே கர்மா - விதியென வைத்துக் கொள்ளத்தான் வேண்டும். இப்படி விழுந்த சீட்டுகளை வைத்து நுட்பமாக எப்படி விளையாடுகிறான் என்பது மதியைப் பொறுத்த விஷயமே. இதில் வேடிக்கை என்னவென்றால், நன்றாக விழுந்த சீட்டுகளை மோசமாக விளையாடித் தோற்றவர்களும் உண்டு. மோசமாக விழுந்த சீட்டுகளை நன்றாக விளையாடி வென்றவர்களும் உண்டு.

எனவே, பிறக்கின்ற சூழ்நிலைகளை வேண்டுமானால் கர்மா அல்லது விதியென ஏற்றுக் கொள்ளலாமே தவிர, வாழ்க்கையில் வெற்றி தோல்விகளுக்கு விதியைப் பொறுப்பாக்கக் கூடாது.

-( "என்ன இல்லை இந்து மதத்தில்?' என்ற நூலில் கவிஞர் தெய்வச்சிலை)

 

அருமையான வரிகள். சரியாக சொல்லியிருக்கிறார்கள்.  

அருமை அருமை அருமை நண்பரே ! சூப்பர் பதிவு