சத்தான உணவு அவசியம் என்பதை உணருங்கள்....

பொதுவாக கஞ்சி, கூழ், பழைய சோறு ஆகியவைதான் அந்த காலத்து காலை உணவாக இருந்தது. அதனாலேயே அவர்கள் ஆரோக்கியமாக வாழ்ந்தார்கள் என்று சொல்லலாம்.

ஆனால், தற்போது நாம் உண்ணும் காலை உணவு மிக மோசமான விஷயமாக மாறிவிட்டது. அவசரத்துக்கு ரொட்டி ஜாம் என்று போய், நூடூல்ஸ் என்ற அளவுக்கு மாறி விட்டோம்.

அவசர உலகத்தில் காலையில் இவ்வளவு தான் செய்ய முடியும் என்று சொல்கிறார்கள். ஆனால், உண்மையில், நாம் உணவை சரியான முறையில் வகுத்துக் கொண்டால் ஆரோக்கியமான வாழ்க்கையை அடையலாம்.

ஓடி ஓடி சம்பாதிக்கிறோம்.. எதற்காக உடல் நிலை கெட்டு மருத்துவமனைக்கு கொடுப்பதற்கா... அதற்கு பதிலாக அதனை சத்தான உணவுக்குக் கொடுக்கலாமே. பெரிய குடும்பமாக இருந்தால் வேலை பளு அதிகம் என்றுதானே இப்போது தேங்காய் சிதறல்களாக சிறிய குடும்பங்களாகி இருக்கிறோம். இங்கிருக்கும் வேலைகளைக் கூட குறைத்து நூடுல்ஸ்களாக்கிவிட்டால் அது எப்படி சரியாக வரும்.

இரண்டு அல்லது 4 நபர் கொண்ட குடும்பத்துக்கு எளிதான சத்தான காலை உணவை நிச்சயம் எளிதாகவே தயாரித்துவிடலாம். வாரத்தில் இரண்டு நாட்களாவது மூக்கடலை, காராமணி, ராஜ்மா, சோயா போன்றவற்றை உணவில் சேர்த்துக் கொள்வது நல்லது.

இதனை தனியாக சமைக்க வேண்டாம். நீங்கள் எப்போதும் சமைக்கும் உருளைக் கிழங்கு வருவல், கத்திரிக்காய் முருங்கை பொறியல் போன்றவற்றில் மேற்கண்ட தானியங்களை சேர்த்து சமைக்கலாம். குழந்தைகளும் விரும்பி சாப்பிடுவார்கள்.

அதேப்போல, வாரத்தில் குறைந்தது இரண்டு நாட்கள் கண்டிப்பாக கீரை செய்யலாம். கீரையை கடைந்தால் யாருக்கும் பிடிக்கவில்லை என்று குறை கூறாமல், அதனை பொறியல் மற்றும் கூட்டாக செய்து, அதற்கு சரியாக வத்தக் குழம்பு, காரக் குழம்பு செய்தால் நிச்சயம் எல்லோருக்குமே பிடிக்கும்.

பச்சைப் பயறின் பலனை பலரும் அறிந்திருப்பர். அதனை ஊறவைத்து எடுத்து சாதாரண தட்டில் வைத்தாலே போதும், சில மணி நேரத்தில் முளை வந்து விடும். அதனை கூட்டு செய்து சாப்பிடலாம்.

இப்படி வாரத்தில் காய்கறி, தானியம், கீரை வகைகளை தவறாமல் சேர்த்துக் கொள்ள வேண்டியது மிகவும் அவசியம்.

பல தாய்மார்கள், குழந்தைகளுக்கு சத்தாண உணவு அவசியம் என்பதை உணராமல், அவர்கள் விரும்புகிறார்கள் என்பதற்காக பாஸ்ட் புட் வகையறாக்களை சமைத்துக் கொடுக்கிறார்கள். இது மிகவும் தவறான போக்கு என்பதை நிச்சயம் உணர வேண்டும்.

சத்தாண உணவே ஆரோக்கியமான வாழ்வுக்கு அடிப்படை

மகளிர்மணி

இதை ஏற்கனவே நாம் தளத்தில் பார்த்தார் போல இருக்கு