எல்லா நோய்களுக்கும் பிளேடு சிகிச்சை – டெல்லி அதிர்ச்சி வீடியோ

by ராஜு சரவணன் Fri Jul 12, 2013 10:52 pm

நோயாளிகளின் உடலில் பிளேடால் கீறி ரத்தத்தை வெளியேற்றி வினோத முறையில் நோய்களை குணப்படுத்துகிறார் 79 வயது முதியவர். அவரிடம் சிகிச்சை பெற மக்கள் படையெடுத்து வருகின்றனர்.நவீன மருத்துவ முறைகளில் எவ்வளவோ முன்னேற்றங்கள் ஏற்பட்டுள்ளன. தொழில்நுட்ப ரீதியாக பரிசோதனை முறைகள் வளர்ந்துள்ள இந்த காலத்திலும் இதுபோன்ற மருத்துவ முறைகளை மக்கள் நம்பிக் கொண்டிருப்பதுதான் வேதனையாக இருக்கிறது.

எல்லா நோய்களுக்கும் பிளேடு சிகிச்சை – டெல்லி அதிர்ச்சி வீடியோ 22rx

தலைநகர் டெல்லியில் ஏராளமான தனியார் மருத்துவமனைகள் உள்ளன. இவற்றில் அதிநவீன கருவிகள், சிறந்த மருத்துவ நிபுணர்களை கொண்டு சிகிச்சை அளிக்கின்றனர். ஆனால், இந்த மருத்துவமனைகளுக்கு ஈடாக திறந்தவெளியில் இயங்கும் ஒரு வினோத மருத்துவமனையில் மக்கள் கூட்டம் அலைமோதுகிறது. இந்த மருத்துவமனையை நடத்தி வருபவர் 79 வயதான ஹக்கீம் கையாஸ். நோயாளிகளின் உடலில் பிளேடால் கீறி, ரத்தத்தை வெளியேற்றுவதுதான் இவரது சிகிச்சையின் சிறப்பாகும். இதன்மூலம் பல்வேறு நோய்களை அவர் குணப்படுத்தி வருவதாக டெல்லி வாசிகள் தெரிவிக்கின்றனர்.

இவரிடம் சிகிச்சை பெறுவதற்காக கொளுத்தும் வெயிலையும் பொருட்படுத்தாமல் ஏராளமானோர் வரிசையில் காத்திருக்கின்றனர். இந்த சிகிச்சை முறையில் மூட்டு வலி, ஆரம்ப நிலையில் உள்ள புற்று நோய், மாரடைப்பு போன்ற நோய்கள் குணமடைவதாக கூறுகின்றனர். தனியார் டிவி ஒன்றில் ஹக்கீம் கையாஸ் பற்றிய சிறப்பு செய்தி வெளியான பிறகு, பல்வேறு பகுதிகளில் இருந்தும் இவரை நோக்கி மக்கள் படையெடுக்க தொடங்கியுள்ளனர்.

தன்னிடம் வரும் நோயாளிகளை முதலில் அரை மணி நேரம் அல்லது ஒரு மணி நேரம் வெயிலில் நிற்க செய்கிறார். அப்போது அவர்களின் ரத்த ஓட்டம் அதிகரிக்கிறது. பின்னர் அவர்களின் நோய்களுக்கு ஏற்ப கையிலோ அல்லது காலிலோ இறுக்கமான பாண்டை சுற்றி கட்டிவிட்டு, அந்த இடத்தில் பிளேடால் கீறி கெட்ட ரத்தத்தை வெளியேற்றுகிறார். ரத்தம் வெளியேறியதும் அவரது நோய் குணமாகி விடுவதாக கூறப்படுகிறது.

‘உடலில் ஏற்படும் பல்வேறு குறைபாடுகளுக்கும் கெட்ட ரத்தமே காரணம் என்று பழங்காலத்தில் கிரேக்கர்கள் நம்பினர். கெட்ட ரத்தத்தை போக்கினால் நோய்கள் குணமாகும் என்பது கிரேக்கர்களின் மருத்துவ முறையாக இருந்தது. அந்த முறையைத்தான் கடைபிடிக்கிறேன்’ என்கிறார் ஹக்கீம்.

இவரது இந்த ‘காட்டுத்தனமான’ மருத்துவ முறைக்கு மக்கள் மத்தியில் வரவேற்பு பெருகியுள்ளது. இந்த சிகிச்சை பெற்ற பிறகு மூட்டு வலி, இதய படபடப்பு போன்ற குறைகள் தீர்ந்துவிட்டதாக டெல்லியை சேர்ந்த சிலர் கூறுகின்றனர். பணக்காரர்கள் முதல் அன்றாக கூலிகள் வரை இவரிடம் சிகிச்சை பெற காத்துக் கிடக்கின்றனர்.

ஐரோப்பிய கண்டத்தில் இருந்த இந்த சிகிச்சை முறை, 19&ம் நூற்றாண்டின் இறுதியில் செல்வாக்கு இழக்க தொடங்கியது. ரத்தம் வெளியேறுவதால் நோய் தொற்று, மாரடைப்பு, வலிப்பு போன்றவை ஏற்படலாம் என கருதியதால் இது படிப்படியாக மறைந்தது. தற்போது மாற்று மருத்துவம் என்ற பெயரில் இதுபோன்ற வினோத சிகிச்சை முறைகளுக்கு மக்கள் மத்தியில் வரவேற்பு கிடைக்க தொடங்கியுள்ளது என்கின்றனர் டாக்டர்கள்.