உள்ளது போதும்! - தெனாலிராமன்

**சிவா** · **சிவா** Sat Jun 29, 2013 10:02 am

“பொருளைச் சேர்த்து வைப்பதில் மகிழ்ச்சி இல்லை. பிறருக்குக் கொடுப்பதில்தான் மகிழ்ச்சி அதிகம். எனவே அழகான வீடு ஒன்றைக் கட்டி நல்லவர்களுக்குப் பரிசாகக் கொடு” என்று தெனாலிராமனிடம் கூறினார் மன்னர்.

அடுத்த நாளே தெனாலிராமன் வீடு கட்டத் தொடங்கினான். நல்ல திறமையான தொழிலாளர்களைக் கொண்டு சித்திர வேலைப்பாடு அமைந்த அழகான ஒரு வீட்டைக் கட்டியும் முடித்தான். அதன் வாசலில், தனக்கு உள்ளது போதும் என்ற மனம் படைத்தவர் எவரோ அவருக்கு இந்த வீடு பரிசாகக் கொடுக்கப்படும் என்று பெரிதாக பலகையில் எழுதி மாட்டிவிட்டான்.

நீண்ட நாட்கள் அந்தப் பரிசை வாங்க யாரும் வரவில்லை.

ஒருநாள் வெளியூரில் இருந்து வந்த ஒருவன், தெனாலிராமன் வீட்டு வாசலில் எழுதப்பட்டு இருந்த வாசகத்தைப் படித்துவிட்டு மிகுந்த மகிழ்ச்சியுடன் தெனாலிராமனைப் பார்க்கச் சென்றான்.

“அய்யா... நான் போதும் என்ற மனம் உடையவன். அதனால் இந்த வீட்டை எனக்கே பரிசாகக் கொடுத்துவிடுங்கள்” என்றான்.

அதைக் கேட்ட தெனாலிராமன் வாய்விட்டுச் சிரித்தான்.

“வாசகத்தை நன்றாகப் படித்துப் பார்த்தீர்களா? அர்த்தம் புரியவில்லையா?” என்றான்.

“நீங்கள்தான் போதுமென்ற மனம் கொண்டவராயிற்றே? பிறகு இந்த வீட்டைப் பெற உங்களுக்கு எப்படி ஆசை வந்தது?” என்று கூறிச் சிரித்தான் தெனாலிராமன்.

அரசரிடம் சென்று நடந்ததைச் சொன்னான் தெனாலிராமன்.

“வீட்டை என்ன செய்யப் போகிறாய்?” என்று கேட்டார் அரசர்.

“வாசலில் தொங்கவிட்டுள்ள பலகையைக் கழற்றித் தூக்கிப் போட்டுவிட்டு குடித்தனம் ஆரம்பிக்கப் போகிறேன்” என்று புன்னகையுடன் சொன்னான் தெனாலிராமன்.