சிதம்பரம் அருகே ஆட்டுக்குட்டியை உயிரோடு விழுங்கிய 15 அடி நீள முதலை

by **ராஜா** Thu Jul 04, 2013 1:39 pm

சிதம்பரம் அருகே வீட்டு தோட்டத்தில் கட்டியிருந்த ஆட்டுக்குட்டியை 15 அடி நீள முதலை உயிரோடு விழுங்கியது. இதையடுத்து அந்த முதலையை தாய்-மகன் இருவரும் மரத்தில் கயிற்றால் கட்டி வைத்தனர்.

சிதம்பரம் அருகே இலநாங்கூர் கிராமத்தை சேர்ந்தவர் அய்யப்பன் (வயது 39), விவசாயி. இவரது வீட்டின் அருகிலேயே இவருக்கு சொந்தமான விவசாய நிலம் உள்ளது. இந்த நிலையில் நேற்று இரவு 10 மணியளவில் அய்யப்பனின் தோட்டத்தில் இருந்து நாய்கள் பயங்கரமாக குரைக்கும் சத்தம் வந்தது.

இதையடுத்து அய்யப்பன் மற்றும் அவரது தாய் கற்பகவள்ளி (60) ஆகியோர் டார்ச் லைட் உதவியுடன் தோட்டத்துக்கு சென்று பார்த்தனர். அப்போது ஆட்டு தொழுவத்தில் கட்டி வைத்திருந்த ஆட்டு குட்டியை 15 அடி நீள முதலை ஒன்று விழுங்கி கொண்டிருப்பதை கண்டு அதிர்ச்சி அடைந்தனர்.

கற்களை வீசி தடுக்க முயன்றும் முதலை ஆட்டுக்குட்டியை முழுவதுமாக விழுங்கி விட்டது. இதைத்தொடர்ந்து அந்த முதலை எங்கும் நகரமுடியாமல் அசைவற்று கிடந்தது. இதையடுத்து முதலையால் மேலும் அசம்பாவித சம்பவங்களை தடுத்திடும் வகையில் அய்யப்பனும், கற்பகவள்ளியும் சேர்ந்து 2 மணி நேரம் போராடி 300 கிலோ எடை கொண்ட அந்த முதலையை மாடு கட்டும் கயிற்றால் கட்டி மரத்தில் கட்டி வைத்தனர்.

இன்று காலை இந்த சம்பவம் அந்த பகுதியில் காட்டு தீ போல் பரவியது. கூட்டம் கூட்டமாக வந்து முதலையை பார்த்து அதிசயித்து சென்றனர். மேலும் தைரியமாக போராடி முதலையை மரத்தில் கட்டிபோட்ட தாய்-மகனை வெகுவாக பாராட்டினர்.

வக்கார மாரி ஏரியில் இருந்து முதலை தப்பி வந்து இருக்கலாம் என கூறப்படுகிறது. இதுபற்றி தகவல் அறிந்த மாவட்ட வன அதிகாரி தியாகராஜன், வன அலுவலர் விஜயகுமார் ஆகியோரி உத்தரவின் பேரில் வனக்காவலர்கள் மணி, ராஜேந்திரன் ஆகியோர் சம்பவ இடத்துக்கு விரைந்து வந்து முதலையை மீட்டனர். பின்னர் அந்த முதலையை சிதம்பரம் நகராட்சிக்கு சொந்தமான முதலை வளர்க்கும் குளத்துக்கு எடுத்து சென்று அதனை விட்டனர்.

-maalaimalar