2ஜி: தயாளு மனு மீது தில்லி உயர் நீதிமன்றம் இன்று முடிவு

2ஜி அலைக்கற்றை வழக்கில் நேரில் ஆஜராகும்படி சிபிஐ நீதிமன்றம் அனுப்பிய சம்மனை ரத்து செய்யக்கோரும் திமுக தலைவர் மு. கருணாநிதியின் மனைவி தயாளுவின் மனுவை விசாரணைக்கு ஏற்பது குறித்து புதன்கிழமை முடிவு செய்யப்படும் என்று தில்லி உயர் நீதிமன்றம் கூறியது.

தயாளு சார்பில் தாக்கல் செய்யப்பட்ட மேல்முறையீட்டு மனுவில் "2ஜி அலைக்கற்றை வழக்கில் சிபிஐ தரப்பு சாட்சியாக எனது கட்சிக்காரர் சேர்க்கப்பட்டுள்ளார். அவருக்கு, "அல்ஸீமர்' எனப்படும் ஞாபகமறதி நோய் உள்ளது. அவரது உடல்நிலை காரணமாக அவரால் நேரில் ஆஜராக இயலாது என்று அரசு மருத்துவமனைகளின் மருத்துவர்கள் அளித்த அறிக்கை சிபிஐ நீதிமன்றத்தில் தாக்கல் செய்யப்பட்டது.

இருந்தபோதும் எனது கட்சிக்காரரை 8-ஆம் தேதி நேரில் ஆஜராக சிபிஐ நீதிமன்றம் சம்மன் அனுப்பியுள்ளது. சம்மனை ரத்து செய்ய வேண்டும்' என்று கூறப்பட்டிருந்தது. மனுவை நீதிபதி வீனா பீர்பால் செவ்வாய்க்கிழமை பரிசீலித்தார். அப்போது, சிபிஐ வழக்குரைஞர் சோனியா மாத்தூர், "2ஜி அலைக்கற்றை ஒதுக்கீடு முறைகேடு வழக்கு தொடர்புடைய எந்தவொரு மனுவையும், தில்லி சிபிஐ நீதிமன்றமும், உச்ச நீதிமன்றமும் தவிர வேறு எந்த நீதிமன்றமும் விசாரிக்க முடியாது' என்று உச்ச நீதிமன்றம் உத்தரவு பிறப்பித்துள்ளது. எனவே, இந்த மனுவை விசாரணைக்கு ஏற்கக்கூடாது' என்று வாதிட்டார்.

அதற்கு ஆட்சேபம் தெரிவித்த தயாளுவின் வழக்குரைஞர் சுதிர் நந்திரஜோக், "அலைக்கற்றை வழக்கில் குற்றம்சாட்டப்பட்ட ஒருவரின் மனுவை விசாரித்த உச்ச நீதிமன்றம், அது தொடர்பாக இடைக்காலமாக பிறப்பித்த உத்தரவில், நீதிமன்றங்களின் வரம்பு குறித்து கருத்துத் தெரிவித்தது.

இறுதி உத்தரவில் அவ்வாறு குறிப்பிடவில்லை. சென்னையில் இருந்து தில்லிக்கு பயணம் செய்யும் அளவுக்கு தயாளுவின் உடல்நிலை சரியாக இல்லை. எனவே, அவரது நிலையை கருத்தில் கொண்டு சம்மனை ரத்து செய்ய வேண்டும்' என்று வாதிட்டார்.

அதையடுத்து, நீதிபதி வீனா பீர்பால், "மனுதாரரின் கோரிக்கைக்கு சிபிஐ ஆட்சேபம் தெரிவிக்கிறது. மனுவை உயர் நீதிமன்றம் விசாரிக்க அதிகாரம் உள்ளதா என்றும் சிபிஐ கேள்வி எழுப்புகிறது.

சிபிஐ குறிப்பிடும், உச்ச நீதிமன்ற உத்தரவை புதன்கிழமை தாக்கல் செய்ய வேண்டும். பிறகு இந்த மனுவை விசாரிப்பது குறித்து முடிவு செய்யப்படும்' என்று கூறினார்.

-- தினமணி

தில்லி சிறப்பு நீதிமன்றத்தில் தயாளுஅம்மாள் மனு இன்று விசாரணைக்கு வந்தது. இதனை விசாரிக்க மறுப்பு தெரிவித்த சிறப்பு நீதிமன்ற நீதிபதி வீணா பீர்பால், நாளை வேறொரு அமர்வு இந்த மனு மீது விசாரணை நடத்தும் என்று கூறினார்.

2ஜி அலைக்கற்றை வழக்கு தொடர்பாக விசாரணை மேற்கொள்ளப்பட்டு வரும் இந்த வழக்கில், தயாளு அம்மாளை நேரில் ஆஜராகுமாறு நீதிமன்றம் கூறியிருந்தது. இந்த விசாரணையின்போது, தனக்கு மறதி நோய் இருப்பதாலும், உடல் நிலை கருதியும், நேரில் ஆஜராவதில் இருந்து விலக்கு அளிக்குமாறு கோரி நீதிமன்றத்தில் தயாளு அம்மாள் சார்பில் மனு தாக்கல் செய்யப்பட்டது. இந்த மனுவை விசாரித்த நீதிபதி வீணா பீர்பால், தனது தனிப்பட்ட காரணங்களுக்காக ஒருவரின் மனுவை விசாரித்து முடிவு செய்ய முடியாது என்று கூறி, நாளை வேறொரு அமர்வு இந்த வழக்கினை விசாரிக்கும் என்று கூறினார்.

ஏற்கெனவே இந்த வழக்கில், தான் நேரில் ஆஜராகி விளக்கம் அளிப்பதில் இருந்து விலக்கு அளிக்குமாறு தயாளு அம்மாள் சார்பில் சிபிஐ நீதிமன்றத்தில் மனு தாக்கல் செய்யப்பட்டு, அது தள்ளுபடி செய்யப்பட்டிருந்தது.

- தினமணி