மதுரை நகரில் பொதுமக்களை மிரட்டும் 34 ஆயிரம் தெரு நாய்கள்

soplangi · soplangi Tue Jul 02, 2013 11:08 am

மதுரை நகரில் விளாங்குடி, விஸ்வநாதபுரம், திருநகர், அவனியாபுரம், வண்டியூர், வல்லல்நகர், உத்தங்குடி, திருப்பாலை, அய்யர் பங்களா மற்றும் திருப்பரங்குன்றம் ஆகிய பகுதிகளில் தெரு நாய்கள் தொந்தரவு அதிகம் உள்ளதாக கூறப்படுகிறது.

“புளூஸ் கிராஸ்” தலையீடு காரணமாகவே தெரு நாய்களை கட்டுப்படுத்துவதில் தடை ஏற்படுவதாக மாநகராட்சி அதிகாரிகள் மற்றும் நாய் பிடிப்போர் கூறுகின்றனர். அதனால் உள்ளாட்சி நிர்வாகிகள் தெரு நாய்கள் எண்ணிக்கையை கட்டுப்படுத்த அவைகளுக்கு கு.க. செய்யவும், தடுப்பூசிகள் போடவும் செய்து நடவடிக்கை எடுத்து வருகின்றனர்.

வெறி நாய் கடிக்கு சிகிச்சை அளிப்பதில் முக்கிய பங்காற்றி வருகிறது மதுரை அரசு மருத்துவமனை. ரேபிஸ் என்னும் வெறிநாய் கடி மிகவும் கொடூரமானது. தற்போது ரேஸ்பிஸ் நோய் 100 சதவீதம் தடுக்கப்பட்டுள்ளது. ஆனால் வெறிநாய் ஒருவரை கடித்து விட்டால் தாமதம் செய்யாமல் உடனே சிகிச்சை பெற வேண்டும். இல்லை என்றால் அதன் பாதிப்பு பயங்கரமாக இருக்கும்.

இது குறித்து மதுரை அரசு மருத்துவமனை “ரேபிஸ்” தடுப்புத்துறை டாக்டர் பாலாஜி நாதன் கூறியதாவது:-

தெருநாய் கடி சிகிச்சைக்காக தினசரி 60 பெரியவர்களும், 40 குழந்தைகளும் சிகிச்சை பெற்று செல்கின்றனர். இந்த எண்ணிக்கையை தெருநாய் ஆபத்தை உணர்த்துகிறது. தெருநாய்கள் கடித்து விட்டால் காலதாமதம் செய்யாமல் உடனே சிகிச்சை பெற வேண்டும். ரேபிஸ் நோயை குணப்படுத்த எந்த சிகிச்சை முறையும் இல்லை. ஆனால் ரேபிஸ் நோயை தடுக்க நல்ல சிகிச்சை முறைகள் உள்ளது.

இவ்வாறு அவர் கூறினார்.

அரசு மருத்துவ கல்லூரி டீன் ஆர்.மோகன் கூறுகையில், வெறிபிடித்த நாய்கள் நகரம், பேரூராட்சி, நகராட்சி பகுதிகளில் அதிக அளவில் உள்ளது. இந்த பிரச்சினைக்கு புளூ கிராஸ் அமைப்பினர்தான் தீர்வு காண வேண்டும். ஒவ்வொரு ஆண்டும் மதுரை அரசு மருத்துவமனையில் மட்டும் 15-க்கும் மேற்பட்டோர் தெருநாய் கடியால் இறந்து போகின்றனர். மற்ற தனியார் ஆஸ்பத்திரியில் இறப்போர் எண்ணிக்கை இதில் அடங்காது.

இவ்வாறு அவர் தெரிவித்தார்.

ஜூன் மாதத்தில் செல்லூர் ஏ.பி.சி. மையம் மூலம் 445 தெரு நாய்களுக்கு கு.க. செய்யப்பட்டுள்ளது. தெரு நாய்களுக்கு ரேபிஸ் தடுப்பு ஊசியும் போடப்பட்டுள்ளது. நாய் பிடிப்பது எளிதான காரியமல்ல. நாய்களின் பின்னால் பல கி.மீ தூரம் ஓடி அவைகளை பிடிக்க வேண்டும். அதனால் மாநகராட்சி அதிக அளவில் நாய் பிடிக்கும் வாகனங்களை வழங்க வேண்டும் என்று ஊழியர் ஒருவர் கேட்டு கொண்டார்.

அவனியாபுரத்தில் நாய்களுக்கு குடும்ப கட்டுப்பாடு செய்வதற்காக மையம் தொடங்கும் திட்டம் உள்ளது. நாய் பிடிப்பது குறித்து ஊட்டியில் இருந்து நிபுணர் குழுவினர் வருகை தந்து மதுரை மாநகராட்சி ஊழியர்களுக்கு பாதுகாப்பான முறையில் நாய் பிடிப்பது குறித்து பயிற்சி அளித்தனர். நாய்கள் கடிக்காது, அவற்றை தூக்கி விளையாடுவதால் நோய் தொற்று ஏற்படாது என்பது குறித்து அலட்சியமாக இருக்கக்கூடாது என்று டாக்டர்கள் தெரிவிக்கின்றனர்.

நாய்களின் உமிழ்நீர் மிகவும் ஆபத்தானது. தெருநாய்கள் இதிலும் மிகவும் ஆபத்தானது என்று நாய் வளர்ப்போர் கூறுகின்றனர். நாய் கடித்துவிட்டால் அந்த இடத்தை டிடர்ஜெண்ட் சோப்புகளை பயன்படுத்தி ஓடும் தண்ணீரில் 10 நிமிடம் நன்றாக கழுவ வேண்டும். இது ஒரு முக்கியமான முதல்கட்ட சிகிச்சையாகும். டிடர்ஜெண்ட் சோப்புகளில் சோடியம் ஹைட்ராக்சைடு உள்ளது. இதற்கு ரேபிஸ் வைரசை கட்டுப்படுத்தும் சக்தி உள்ளது என்று டாக்டர் ஒருவர் கூறினார்.

-- மாலைமலர்

மதுரை நகரில் பொதுமக்களை மிரட்டும் 34 ஆயிரம் தெரு நாய்கள்

மதுரை நகரில் பொதுமக்களை மிரட்டும் 34 ஆயிரம் தெரு நாய்கள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக