“ஆத்திச்சூடி” படிக்கும் ‘தல’ அஜித்

சமீபகாலமாக அஜித் செல்போனில் பிசியாக இருக்கிறார் என்றால் அவர் யாருடனும் ‘சாட்’ செய்யவில்லை! டிவீட் பண்ணுவதுமில்லை! டவுன்லோடு செய்யப்பட்டுள்ள ஆத்திச்சூடியையும் அதன் அர்த்தத்தையும் படித்துக் கொண்டிருக்கிறார் என சூடம் அணைக்கலாம்.

ஆமாம், ஆத்திச்சூடி மீது அஜித்துக்கு அப்படியொரு நாட்டம். இது வந்தது எப்படி?

ஒருநாள் பிளைட்டில் சென்னை வந்து கொண்டிருந்த போது சகபயணி ஒருவர் அஜித்திடம் தன்னை அறிமுகப்படுத்திக் கொண்டார்.

“தூத்துக்குடி எனது ஊர். உங்களிடம் கொஞ்சம் பேசவேண்டும் என்பது வெகுநாள் ஆசை! பேசலாமா?”

“பேசலாம்!”

“நான் ஒரு பரிசு கொடுக்கலாம் என்று நினைக்கிறேன். அது பணமோ பொருளோ இல்லை. படிப்பு”

அஜித்துக்கு வியப்பு அதிகமாகிவிட்டது!
‘உங்கள் செல்போனை கொடுங்கள்’ என்று தயக்கமில்லாமல் அவர் கேட்க...அஜித்தும் கொஞ்சம் கூட யோசிக்காமல் தன் போனை கொடுத்துவிட்டார். வாங்கியவர் தனது போனிலிருந்து சில தகவல்களை ‘தல’ போனுக்கு டவுன்லோடு செய்துவிட்டுக் கொடுத்துவிட்டார்.

ஒளவையார் எழுதிய ஆத்திச்சூடியும் அதன் விளக்கமும் தான் டவுன்லோடு செய்யப்பட்டிருந்தது. முதலில் அதை ஒரு சாதாரண விஷயமாக நினைத்த அஜித்துக்கு ஆத்திச்சூடியைப் படிக்கப் படிக்க வியப்பாக இருந்திருக்கிறது. இதற்கு முன் பலதடவை அவர் அதைப் படித்திருந்தாலும் முன்பின் தெரியாத ஒருவர் அதை அதீத அக்கறையுடன் தன்னைப் படிக்கச் சொன்னது அஜித்தை சிந்திக்க வைத்துவிட்டது.

‘அறம் செய விரும்பு’என்ற மூன்று வார்த்தைகளில் மூழ்கிக்கிடக்கும் உயரிய தத்துவமும், எளியவர் கூட அதை எளிதில் பின்பற்றக்கூடிய எளிமையும் அஜித்தின் மனதில் ஒரு புதிய தாக்கத்தை ஏற்படுத்திவிட்டது. ஞானம் பிளைட்டில் கூடப் பிறக்கலாம். இப்பொழுது ஆத்திச்சூடி படிக்காமல் அஜித் ஒரு நாளும் இருப்பதில்லை.
இத்துடன் நிற்காமல் தன்னுடைய நெருங்கிய நண்பர்களை அழைத்து ஆத்திச்சூடிய டவுன்லோடு செய்துகொடுத்து விடுகிறார்.

தான் நடித்துவரும் விஷ்ணுவர்த்தன் இயக்கும் படத்துக்கும் தலைப்பு வைக்கவில்லை! சிறுத்தை சிவா இயக்கி வருகிற படத்துக்கும் பெயர் வைக்கவில்லை. ஏதாவது ஒரு படத்துக்கு “ஆத்திச்சூடி” எனப் பெயர் வைத்துவிடலாம் என்கிற அளவுக்கு யோசித்து வருகிறாராம் அஜித்.

(நன்றி-குமுதம் வார இதழ்)