நாட்டுக்காக உயிர்த்தியாகம் செய்த ‘மதுரை வீரன்’ - ராணுவ வீரர் பிரவீன் உடலுக்கு மலரஞ்சலி !

உத்தரகண்ட் மாநிலத்தில் வெள்ளத்தில் சிக்கியவர்களை மீட்கும் பணியில் ஈடுபட்டிருந்த ராணுவ வீரர் பிரவீன் ஓட்டி சென்ற ஹெலிகாப்டர் நொறுங்கி விழுந்தது. இதில் சிக்கிய 19 வீரர்கள் பலியாயினர். பைலட் பிரவீன் மதுரையை சேர்ந்தவர். இவரது உடல் இன்று காலை மதுரைக்கு கொண்டு வரப்பட்டது. இவரது உடல் அரசு மற்றும் ராணுவ மரியாதையுடன் தகனம் செய்யப்படுகிறது. திரளானவர்கள் கூடி இவரது உடலுக்கு அஞ்சலி செலுத்தினர். தமிழக அரசின் சார்பில் அறிவிக்கப்பட்ட ரூ.10 லட்சத்துக்கான காசோலையை அமைச்சர் செல்லூர் ராஜூ, பிரவீனின் தாயார் மஞ்சுளாவிடம் வழங்கினார்.

ஆயிரக்கணக்கானவர்களை பலி வாங்கிய உத்தரகண்ட் வெள்ளத்தில் பலர் உயிருக்கு போராடிய நிலையில் தவித்து கொண்டிருந்தனர். இவர்களை மீட்கும் பணியில் ராணுவம் மற்றும் விமானபடை, தேசிய பேரிடர் மீட்பு படையினர் ஈடுபட்டிருந்தனர். இதில் கடந்த 25 ம்தேதி கேதார்நாத் பகுதியில் மீட்பு பணியில் ஈடுபட்டிருந்த எம்.ஐ.- 17 ரக ஹெலிகாப்டர், கவுச்சார் என்ற இடத்திலிருந்து குப்தகாசி, கேதார்நாதிற்கு இரண்டு முறை மக்களை ஏற்றி பத்திரமாக திரும்பியது. 3வது முறை கேதார்நாத்தில் இருந்து திரும்பி வரும் வழியில் கவுரிகுந்த் அருகே விபத்துக்குள்ளானது. இதில் விமானப்படை அதிகாரிகள், தேசிய பேரிடர் மேலாண்மை ஆணைய அதிகாரிகள், இந்தோ - திபெத் எல்லைப்படை போலீசார் என 19 பேர் பயணம் செய்தனர். இவர்கள் அனைவரும் பலியானதாக அறிவிக்கப்பட்டது.

மதுரை டி.வி.எஸ்., மெட்ரிக் பள்ளி மாணவர்: இந்த ஹெலிகாப்டரை ஓட்டிய பைலட் ஆபீசர் பிரவீன், 27, மதுரையை சேர்ந்தவர். மதுரை டி.வி.எஸ்., மெட்ரிக் பள்ளியில் பள்ளிப்படிப்பை முடித்து விட்டு, தியாகராஜர் பொறியியல் கல்லூரியில் பி.இ., மெக்கட்ரானிக்ஸ் படித்த இவர், வெள்ளிப்பதக்கம் பெற்று சிறந்த மாணவராக தேர்வு செய்யப்பட்டவர். யு.பி.எஸ்.சி., தேர்வில் வெற்றி பெற்றார். பின்னர் ஒருங்கிணைந்த பாதுகாப்பு சர்வீஸ்(சி.டி.எஸ்.,) தேர்வில் வென்று, விமான பைலட் பயிற்சியை 2009ம் ஆண்டு முடித்தார். பெங்களூரு விமான படைப்பிரிவில் பணியாற்றிய இவர், ஒன்றரை ஆண்டுகளாக கோல்கட்டா பேரக்பூரில் பணிபுரிந்து வந்தார்.
கேதார்நாத் பகுதியில், வெள்ளத்தில் பாதிக்கப்பட்டவர்களை, ஒரு வாரமாக ஹெலிகாப்டரில் சென்று மீட்கும் பணியில் ஈடுபட்டிருந்த இவர், தினமும் தனது தாய் மஞ்சுளாவிடம் இரவில் மொபைல் போனில் பேசி வந்தார். இந்நிலையில் அவர் பயணித்த ஹெலிகாப்டர் விபத்துக்குள்ளானது.
இவருடன் பலியான 19 உடல்களுக்கும் மத்திய உள்துறை அமைச்சர் சுசில்குமார் ஷிண்டே , ராணுவ தளபதி பிக்ராம்சிங் மற்றும் பல்வேறு படை தளபதிகள் மலர்வளையம் வைத்து அஞ்சலி செலுத்தினர். தொடர்ந்து அவரவர் ஊர்களுக்கு உடல்கள் அனுப்பி வைக்கப்பட்டது. இதன்படி பிரவீன் உடல் இன்று காலை டில்லியில் இருந்து தனிவிமானம் மூலம் மதுரையில் அவரது வீட்டுக்கு கொண்டுவரப்பட்டு, பொதுமக்கள் அஞ்சலிக்காக வைக்கப்பட்டுள்ளது. மாவட்ட கலெக்டர் அன்சுல்மிஸ்ரா, ஆர்டிஓ ஆறுமுகம், அமைச்சர் செல்லூர் ராஜூ, மேயர் ராஜன் செல்லப்பா, எஸ்.பி.பாலகிருஷ்ணன், கமிஷனர் சஞ்சய் மாத்தூர், தாசில்தார் கங்காதரன், விமானபடை அதிகாரிகள் மற்றும் பொதுமக்கள் மரியாதை செலுத்தினர். தொடர்ந்து அவரது உடல் மூலக்கரையில் உள்ள இடுகாட்டில் குண்டுகள் முழங்கிட பிரவீன் உடல் தகனம் செய்யப்பட்டது.

ராணுவத்தில்தான் சேருவேன்:
மறைந்த பிரவீன் அவரது தாயார் மற்றும் நண்பர்களிடம் சொல்வாராம், அதாவது நாட்டிற்காக சேவை செய்யும் ராணுவத்தில் பணியாற்ற வேண்டும் இது தான் எனது விருப்பம் என்று.


நான் சாப்பிட முடியவில்லை:
மீட்பு பணியில் இருந்த போது அவரது தாயாரிடம் பேசிய பிரவீன், அம்மா, நான் அனைவரையும் காப்பாற்றி வருகிறேன். மீட்பு பணிகள் விரைவில் முடிந்து நாங்கள் எங்கள் தலைமையிடத்திற்கு சென்று விடுவோம். வெள்ளத்தில் சிக்கியவர்களை பார்க்கும் போது மிக பரிதாபமாக இருக்கிறது. இவர்கள் இப்படி சிக்கி விட்டார்களே என்று கவலையாக உள்ளது. சரிப்பா உனக்கு சாப்பாடு பிரச்னை எதுவுமில்லையே என்று தாய் இடைமறித்து கேட்ட போது அவர் சொன்னது, அம்மா, எங்களுக்கு சாப்பாடு எல்லாம் நல்ல முறையில் கிடைக்கிறது. ஆனால் அவர்களை பார்க்கும் போது என்னால் சாப்பிட முடியவில்லை. எனக்கு மனமில்லை என்றாராம். இது தான் அவர் பேசிய கடைசி வார்த்தை. தேசிய பணியில் ஈடுபட்டு நாட்டிற்கு தன்னுயிரை தியாகம் செய்த பிரவீனுக்கு நாமும் ஒரு சல்யூட் அடிப்போம்!


நன்றி - oneindia

 நாட்டுக்காக உயிரை கொடுத்த அன்புசகோதரன் பிரவீனுக்கு ஈகரை சார்பாக கண்ணீர் அஞ்சலி   

பிரவீனுக்கு எனது கண்ணீர் அஞ்சலி  

இவரின் பிரிவை தாங்கும் வல்லமையை இவரை பிரிந்து வாடும் குடும்பத்துக்கு கொடுக்க ஆண்டவனிடம் வேண்டிக்கொள்கிறேன்.