உத்தரகாண்ட் மழை–வெள்ள பாதிப்பு கடைசி நபர் மீட்கப்படும்வரை ராணுத்தினரின் பணி தொடரும்

உத்தரகாண்ட் மழை–வெள்ள பாதிப்பு கடைசி நபர் மீட்கப்படும்வரை ராணுத்தினரின் பணி தொடரும் தலைமை ராணுவ தளபதி விக்ரம்சிங் பேட்டி



உத்தரகாண்ட் வெள்ளப்பகுதியில் சிக்கிய கடைசி நபர் மீட்கப்படும் வரை ராணுவத்தினரின் பணி தொடரும் என்று, தலைமை ராணுவ தளபதி விக்ரம்சிங் அறிவித்து இருக்கிறார்.

1 லட்சம் பேர் மீட்பு

உத்தரகாண்ட் மாநிலத்தை உருக்குலைத்த பேய் மழை–வெள்ளத்துக்கு 842 பேர் பலியானதாக அதிகாரபூர்வமாக அறிவிக்கப்பட்டு இருந்தாலும், பல ஆயிரக்கணக்கானவர்கள் பலியாகி இருக்கலாம் என்று அஞ்சப்படுகிறது. மத்திய மாநில பேரிடர் மீட்பு படையினருடன் முப்படைகளை சேர்ந்த 8 ஆயிரம் ராணுவ வீரர்கள் மீட்பு பணியில் ஈடுபடுத்தப்பட்டனர். போர்க்கால அடிப்படையில் தங்கள் உயிரைப் பணயம் வைத்து மேற்கொண்ட இந்த மீட்பு பணியினால், 1 லட்சத்துக்கும் மேற்பட்டவர்கள் மீட்கப்பட்டனர்.

கடைசி நபர் மீட்கப்படும்வரை

இந்த நிலையில் தலைமை ராணுவத்தளபதி விக்ரம்சிங், உத்தரகாண்ட் மாநிலத்தில் பாதிக்கப்பட்ட பகுதிகளில் ஒரு நாள் சுற்றுப்பயணம் மேற்கொண்டார். கவுச்சாரில் நிருபர்களுக்கு பேட்டி அளித்த அவர், வெள்ளத்தில் பாதிக்கப்பட்ட கடைசி நபர் மீட்கப்படும்வரை ராணுவத்தினர் உத்தரகாண்டில் மீட்புப்பணியில் ஈடுபடுவார்கள் என்று அறிவித்தார். அவர் மேலும் கூறியதாவது–

‘‘மிகவும் சிரமமான சூழ்நிலைகளிலும், சம்பந்தப்பட்ட அதிகாரிகளிடம் இருந்து எந்த ஒரு உத்தரவுக்கும் காத்திராமல், மீட்புப்பணியில் ஈடுபடும்படி தனது தளபதிகளுக்கு உத்தரவிட்டு இருக்கிறேன். பத்ரிநாத்துக்கு வடக்குப்பகுதியில் 40 பேர் சிக்கி இருப்பதாக நேற்று தகவல் கிடைத்தது. உடனடியாக அங்கு ஹெலிகாப்டர்கள் அனுப்பி வைக்கப்பட்டன. ஆனால், அவர்களை கண்டுபிடிக்க முடியவில்லை.

விடுமுறை எடுக்காமல்..

அவர்கள் எங்கிருந்தாலும் கண்டுப்பிடித்து மீட்கப்படுவார்கள். மீட்பு பணியில் ஈடுபட்டுள்ள 8 ஆயிரம் ராணுவத்தினரை பாராட்டும் நேரத்தில், இந்த பணியில் தங்கள் உயிரை தியாகம் செய்த 20 வீரர்களுக்கு எனது நெஞ்சார்ந்த அனுதாபத்தை தெரிவித்துக்கொள்கிறேன்.

மீட்புப்பணியில் ஈடுபடுத்தப்பட்டு உள்ளவர்களில் பெரும்பான்மையினர் உத்தரகாண்ட் மண்ணின் மைந்தர்களின் படைப்பிரிவான கார்வால் துப்பாக்கி பிரிவை சேர்ந்தவர்கள் ஆவார்கள். அவர்கள் தங்கள் குடும்பத்தினர் உறவினர்களை கவனிப்பதற்கு கூட விடுமுறை எடுக்காமல், மீட்புப்பணியில் ஈடுபட்டு வருகிறார்கள்’’. இவ்வாறு அவர் கூறினார்.

மீண்டும் மீட்புப்பணி

உத்தரகாண்டில் மோசமான வானிலை மாறி, காலையில் நல்ல வெயில் அடித்ததால், மீட்பு பணியில் மீண்டும் வேகம் அடைந்தது. பல்வேறு இடங்களில் 1237 பேர் இன்னமும் சிக்கித்தவிப்பதாகவும், அவர்களை மீட்பதற்காக 17 ஹெலிகாப்டர்கள்  புறப்பட்டுச்சென்றன. பத்ரிநாத் அணைப்பகுதியில் அவர்களில் பலர் சிக்கி இருக்கலாம் என்று கருதப்படுவதால், அந்த பகுதியில் தீவிர கவனம் செலுத்தப்பட்டு வருகிறது.

ஜோஷிமட்–பத்ரிநாத், ருத்ரபிரயாக்–காவ்ரிகுண்ட், உத்தரகாண்ட்–கங்கோத்ரி சாலைகள் தவிர மற்ற அனைத்து சாலைகளும் போக்குவரத்துக்கு திறந்து விடப்பட்டு இருப்பதால், மலைப்பகுதியில் சிக்கி இருப்பவர்களை விரைவில் மீட்டுவிடலாம் என்ற நம்பிக்கை ஏற்பட்டுள்ளது. சாலை வழியாகவும், ஹெலிகாப்டர்கள் மூலமும் இதுவரை 1 லட்சத்து 4 ஆயிரத்து 687 பேர் மீட்கப்பட்டு உள்ளனர்.

தினத்தந்தி

சிவா wrote:உத்தரகாண்ட் மழை–வெள்ள பாதிப்பு கடைசி நபர் மீட்கப்படும்வரை ராணுத்தினரின் பணி தொடரும் தலைமை ராணுவ தளபதி விக்ரம்சிங்