தமிழ்நாட்டை சேர்ந்த பி.சதாசிவம், சுப்ரீம் கோர்ட்டு தலைமை நீதிபதியாக நியமனம்

தற்போது சுப்ரீம் கோர்ட்டு தலைமை நீதிபதியாக மேற்கு வங்காளத்தைச் சேர்ந்த நீதிபதி அல்டமாஸ் கபீர் இருந்து வருகிறார். வருகிற ஜூலை மாதம் 18-ந் தேதியுடன் அவர் ஓய்வு பெறுகிறார்.

அவருக்கு பதில் புதிய தலைமை நீதிபதியாக தமிழகத்தைச் சேர்ந்த நீதிபதி பி.சதாசிவம் நியமிக்கப்பட்டுள்ளார். அவரை மத்திய சட்ட அமைச்சகத்தின் பரிந்துரையின் பேரில் ஜனாதிபதி பிராணப் முகர்ஜி நியமனம் செய்துள்ளார். தற்போது இவர் சுப்ரீம் கோர்ட்டு நீதிபதியாக பணிபுரிகிறார்.

நீதிபதி பி.சதாசிவம் சுப்ரீம் கோர்ட்டின் 40-வது தலைமை நீதிபதியாவார். வருகிற 19-ந் தேதி அவர் பதவி ஏற்கிறார். ஜனாதிபதி மாளிகையில் நடைபெறும் எளிய நிகழ்ச்சியில் ஜனாதிபதி பிரணாப் முகர்ஜி பதவிப் பிரமாணம் செய்து வைக்கிறார்.

நீதிபதி பி.சதாசிவம் 1949-ம் ஆண்டு ஏப்ரல் மாதம் 27-ந் தேதி பிறந்தார். வக்கீலுக்கு படித்த அவர் 1973-ம் ஆண்டு ஜூலை மாதம் 25-ந்தேதி சென்னையில் வக்கீலாக பதிவு செய்து கொண்டார். சென்னை ஐகோர்ட்டில் அனைத்து விதமான வழக்குகளிலும் ஆஜராகி வாதாடினார்.

பின்னர் தமிழக அரசு வக்கீலாக நியமிக்கப்பட்டார். கூடுதல் அரசு பிளீடர், விசேஷ பிளீடராக பணிபுரிந்தார். அரசு போக்குவரத்து கழகங்களின் சட்ட ஆலோசகராகவும், நகராட்சிகள் மற்றும் தேசிய மயமாக்கப்பட்ட வங்கிகளின் ஆலோசகராகவும் பணிபுரிந்துள்ளார்.

1996-ம் ஆண்டு ஜனவரி மாதம் 8-ந் தேதி சென்னை ஐகோர்ட்டின் நிரந்தர நீதிபதியாக நியமிக்கப் பட்டார். 2007-ம் ஆண்டு பஞ்சாப்-அரியானா ஐகோர்ட்டு நீதிபதியாக மாற்றப்பட்டார். 2007-ம் ஆண்டு ஆகஸ்ட் மாதம் 21-ந் தேதி சுப்ரீம் கோர்ட்டு நீதிபதியாக நியமனம் செய்யப்பட்டார்.

வருகிற 2014-ம் ஆண்டு ஏப்ரல் மாதம் 27-ந் தேதி ஓய்வு பெறுகிறார். அதுவரை அவர் சுப்ரீம் கோர்ட்டு தலைமை நீதிபதியாக இருப்பார்.

-maalaimalar

பாராட்டுக்கள்! ப.சிதம்பரம் போல் தமிழர்களுக்கு எதிராகச் செயல்படாமல், தமிழர் நலன் காக்க ஆட்சியாளர்களை வலியுறுத்தும் பணிகளைச் செய்யுங்கள்!