வழக்கறிஞர்களை குலுங்க வைத்த அழகிரி

**சிவா** · **சிவா** Thu Jun 27, 2013 5:13 pm

தேர்தல் வழக்கில், முன்னாள் அமைச்சர் அழகிரியிடம், ஒன்றரை மணி நேரம், குறுக்கு விசாரணை நடந்தது. அழகிரியின் பதில், கோர்ட் ஹாலில் இருந்த, வழக்கறிஞர்களை சிரிப்புக்கு உள்ளாக்கியது. மதுரை, லோக்சபா தொகுதியில், தி.மு.க., சார்பில், அழகிரி போட்டியிட்டு, வெற்றி பெற்றார். மத்திய அமைச்சராகவும் நியமிக்கப்பட்டார். இவரை எதிர்த்து, மார்க்சிஸ்ட் கம்யூனிஸ்ட் சார்பில், மோகன் போட்டியிட்டார். அழகிரியின் தேர்தலை எதிர்த்து, ஐகோர்ட்டில், மோகன் மனுத் தாக்கல் செய்தார். மனு நிலுவையில் இருக்கும் போது, மோகன் மரணமடைந்தார்.

மனுத்தாக்கல்

இதையடுத்து, மோகனுக்குப் பதில், மார்க்சிஸ்ட் கம்யூனிஸ்ட் பிரமுகர், லாசர் மனுத் தாக்கல் செய்தார். இம்மனுவை, ஐகோர்ட் ஏற்றுக் கொண்டது. வழக்கை, நீதிபதி தனபாலன் விசாரிக்கிறார். இவ்வழக்கில், அழகிரி சாட்சியமளித்தார். அதைத்தொடர்ந்து, அவரிடம், லாசர் வழக்கறிஞர் கிருஷ்ணன், நேற்று குறுக்கு விசாரணை செய்தார்.

வழக்கறிஞர் கிருஷ்ணனின் கேள்விக்கு, அழகிரி அளித்த பதில்: இந்த வழக்கை தொடுத்தவர், லாசர் என்பது தெரியும். அவர், எம்.எல்.ஏ., என்பதும் தெரியும். அவர் எந்த கட்சியைச் சேர்ந்தவர் என்பது தெரியாது. எனக்காக, தலைமை தேர்தல், "ஏஜன்ட்' ஆக நியமிக்கப்பட்டவருக்கு, பணி என்ன என கேட்கிறீர்கள். என்னை வெற்றி பெறச் செய்வது தான், அவரது பணி (அப்போது, கோர்ட்டில் இருந்த வழக்கறிஞர்கள் சிரித்தனர்).

கையை குவித்து, வாக்காளர்களிடம் வாக்கு கேட்க வேண்டும் என, "ஏஜன்ட்' கூறுவார். அவர் கூறியபடி, நானும் ஓட்டு கேட்பேன். (கையை குவித்து, அழகிரி காட்டினார். அப்போதும், கோர்ட்டில் சிரிப்பலை எழுந்தது) தேர்தல் விதிமுறைக்கு உட்பட்டு, அவர் பணிகளை செய்தார்.

இடமாற்றம்

எல்லா பத்திரிகைகளையும் படிக்க மாட்டேன். முரசொலி உள்ளிட்ட, சில பத்திரிகைகளை படிப்பேன். மதுரை போலீஸ் கமிஷனரை, இடமாற்றம் செய்து, தேர்தல் கமிஷன் உத்தரவிட்டிருப்பது பற்றி, எனக்கு தெரியாது. தேர்தல் விதிமுறைகளின்படி, அவர்கள் செய்திருக்கலாம். அதற்கு, நான் என்ன செய்ய முடியும்?

இவ்வாறு, அழகிரி கூறினார். ஒன்றரை மணி நேரம், குறுக்கு விசாரணை நடந்தது. "இன்னும், இரண்டு மணி நேரம், குறுக்கு விசாரணை நடத்த வேண்டும்' என, வழக்கறிஞர் கிருஷ்ணன் தெரிவித்தார். மேலும், தனிப்பட்ட நிகழ்ச்சிக்காக, இன்றும், நாளையும் செல்ல வேண்டும் என்றார். இதையடுத்து, அடுத்த கட்ட குறுக்கு விசாரணையை, ஜூலை, 1ம் தேதிக்கு, நீதிபதி தனபாலன் தள்ளிவைத்தார். அழகிரி தரப்பில், மூத்த வழக்கறிஞர் டி.ஆர்.ராஜகோபால் ஆஜரானார். மூத்த வழக்கறிஞர் சண்முகசுந்தரமும் உடன் இருந்தார்.

தினமலர்