திருச்சியில் பழிக்கு பழியாக விவசாயி வெட்டிக் கொலை: போலீசார் குவிப்பு

பா.ஜனதா தலைவருக்கு அரிவாள் வெட்டு விழுந்ததால் திருச்சியில் பழிக்கு பழியாக விவசாயி வெட்டிக் கொலை செய்யப்பட்டார். இதனால் பதட்டம் ஏற்பட்டுள்ளது. போலீசார் குவிக்கப்பட்டுள்ளனர்.

திருச்சி அருகே உள்ள கள்ளிக்குடியை சேர்ந்தவர்கள் சந்தோஷ் (வயது 21) சங்கர் (வயது 23) நண்பர்களான இவர்கள் இருவரும் நேற்றிரவு 10 மணிக்கு மோட்டார் சைக்கிளில் பிராட்டியூர் சென்றனர். அப்போது சரக்கு ஆட்டோ ஒன்று மோட்டார் சைக்கிளின் மீது மோதுவதுபோல் சென்றது.

இதில் நிலை தடுமாறிய சந்தோஷ், சங்கர் இருவரும் கீழே விழுந்தனர். ஆனால் சரக்கு ஆட்டோ நிற்காமல் சென்று விட்டது. இதை தொடர்ந்து சந்தோஷ், சங்கர் இருவரும் தங்களது உறவினரும், பா.ஜனதா ஒன்றிய தலைவரும் பிராட்டியூர் மின்சாரம் வாரிய ஓட்டல் நடத்தி வருபவருமான ராஜேந்திரனிடம் சென்று புகார் கூறினர்.

உடனே ராஜேந்திரன் இருவரையும் அழைத்துக் கொண்டு சரக்கு ஆட்டோ சென்ற அலுவலகத்திற்கு சென்று அங்கிருந்த சரக்கு ஆட்டோ டிரைவர் பாலாவிடம் தட்டிக் கேட்டார். அப்போது பாலாவை தாக்கியதாக கூறப்படுகிறது.

அதன் பிறகு ராஜேந்திரன், தன்னுடன் வந்தவர்களை அழைத்துக் கொண்டு ஓட்டலுக்கு சென்று விட்டார். இந்த நிலையில் ராஜேந்திரன் தரப்பினர் தன்னை தாக்கியது குறித்து சரக்கு ஆட்டோ டிரைவர் பாலா ராம்ஜிநகரில் உள்ள தனது உறவினர்களிடம் கூறினார்.

உடனே பாலா தரப்பினர் சுமார் 30க்கும் மேற்பட்டோர் ஆயுதங்களுடன் பிராட்டியூரில் உள்ள ராஜேந்திரனின் ஓட்டலுக்கு சென்றனர். அங்கு ஓட்டலை அடித்து சூறையாடினர். இதை தடுத்த ராஜேந்திரனுக்கு அரிவாள் வெட்டு விழுந்தது. ஓட்டலில் இருந்த குமார், சசிக்குமார், ஆகியோரும் தாக்கப்பட்டனர்.

ஓட்டலை அடித்து சூறையாடிய கும்பல் அங்கு நின்ற ராஜேந்திரனின் காரையும் அடித்து நொறுக்கியது. பிறகு அந்த கும்பல் சென்று விட்டது. அரிவாள் வெட்டில் படுகாயம் அடைந்த ராஜேந்திரன் மற்றும் இரண்டு பேரும் ஆஸ்பத்திரியில் சேர்க்கப்பட்டனர். அவர்களுக்கு சிகிச்சை அளிக்கப்பட்டது.

பா.ஜனதா தலைவர் ராஜேந்திரன் தாக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியது. அவருக்கு ஆதரவாக ஏராளமனோர் அங்கு திரண்டனர். ராஜேந்திரனை தாக்கியவர்கள் மீது நடவடிக்கை எடுக்க கோரி திண்டுக்கல் ரோட்டில் சாலை மறியலில் ஈடுபட்டனர். இதனால் போக்குவரத்து பாதிக்கப்பட்டது.

சம்பவம் குறித்து அறிந்ததும் போலீஸ் உதவி கமிஷனர் அபினவ் குமார், உதவி கமிஷனர்கள் கணேசன், காமராஜ், மற்றும் போலீசார் விரைந்தனர். ராஜேந்திரனை தாக்கியவர்கள் மீது நடவடிக்கை எடுப்பதாக உறுதி கூறினர். இதை தொடர்ந்து மறியல் கைவிடப்பட்டது. இந்த சம்பவத்தால் அப்பகுதியில் நேற்றிரவு முழுவதும் பதட்டம் நிலவியது. எனவே முக்கிய பகுதிகளில் போலீசார் நேற்றிரவே பாதுகாப்புக்கு நிறுத்தப்பட்டிருந்தனர்.

இந்த நிலையில் இந்த அதிகாலை 4 மணிக்கு ராம்ஜிநகர், ஹரிபாஸ்கர் காலனியைச் சேர்ந்த சுப்பன் என்கின்ற பாலசுப்பிரமணியன் வயலுக்கு தண்ணீர் பாய்க்க சென்றார். அவருடன் ஆறுமுகம் என்றவரும் சென்றார். அங்குள்ள குளத்துக்கரையில் சென்றபோது திடீரென ஒரு மர்மகும்பல் பாலசுப்பிரமணியத்தை அரிவாளால் வெட்டிக் கொன்றது.

இதனைப் பார்த்த ஆறுமுகம் தப்பி ஓடினார். ஊருக்குள் சென்று பாலசுப்பிரமணியன் கொலை செய்யப்பட்டது குறித்து பொதுமக்களிடம் தகவல் கூறினார். இதனால் மக்கள் திரண்டனர். அங்கு பதட்டம் நிலவியது.

வாகனம் மோதலில் ஏற்பட்ட பிரச்சனை இரண்டு தரப்பினர் இடையே மோதலாக வெடித்து கொலையில் முடிந்ததால் அப்பகுதியில் பதட்டம் நீடிக்கிறது. சம்பவ இடத்திற்கு திருச்சி மாநகர போலீஸ் கமிஷனர் சைலேஷ் குமார் யாதவ் நேரில் சென்று விசாரணை நடத்தினார். ராம்ஜிநகர், கள்ளிப்பட்டி, பிராட்டியூர், பாலசுப்பிரமணியம் உடல்பிரேத பரிசோதனைக்காக வைக்கப்பட்டுள்ள திருச்சி அரசு ஆஸ்பத்திரி வளாகம், ஆகிய இடங்களில் பலத்த போலீஸ் பாதுகாப்பு போடப்பட்டுள்ளது.

மாலைமலர்