அனுபவம் கற்றுத் தந்த பாடம் : அதிரடியாக 15,000 பேரை மீட்ட மோடி

புதுடில்லி : உத்தரகண்ட் வெள்ளச் சேதப் பகுதிகளிலிருந்து 15 ஆயிரம் குஜராத்திகளை, குஜராத் முதல்வர் நரேந்திர மோடி மீட்டார் என்ற செய்தி பெரும் பரபரப்பை ஏற்படுத்தி உள்ளது. உண்மையில் இதன் பின்னணி என்ன?

குஜராத்தைப் பொறுத்தவரை, அந்த மாநில மக்களுக்கு உலகின் எந்த பகுதியில் பாதிப்பு ஏற்பட்டாலும் உடனடியாக முதல்வரின் தனிப் பிரிவைத் தொடர்பு கொள்ளலாம் எனத் தெரியும். இதனால் உத்தரகண்ட் பேரிடர் நடந்த மறுநாளே அப்போது டில்லியில் இருந்த மோடி, டில்லியிலேயே நிவாரண முகாம் அமைக்க ஏற்பாடு செய்தார். இந்த காலகட்டத்தில் குஜராத்திகள் பெருமளவில் கேதார்நாத், பத்ரிநாத் போன்ற பகுதிகளுக்கு யாத்திரை செல்வது வழக்கம் என்பதால், அவர்கள் பாதிக்கப்பட்டிருந்தால் தமது அலுவலகத்திற்குத் தகவல் வரும் என்று எதிர்பார்த்த மோடி, டில்லி நிவாரண முகாமில் தொலைதொடர்பு வசதிகளுக்கு ஏற்பாடு செய்தார். பேரிடர் மீட்பு மற்றும் நிவாரணப்பணிகளில் தேர்ச்சி பெற்ற அதிகாரிகள் குழு குஜராத்திலிருந்து வரவழைக்கப்பட்டது. மோடி எதிர்பார்த்தவாறே, உத்தரகண்ட் வெள்ளத்தால் பாதிக்கப்பட்ட குஜராத்திகளிடமிருந்து தகவல் வந்தது. தகவல் வந்த பகுதிகளுக்கு அதிகரிகளும் மீட்புக்குழுவினரும் அனுப்பப்பட்டனர்; பாதிக்கப்பட்டவர்கள் மீட்கப்பட்டனர்.

இவ்வாறு, மீட்கப்பட்டவர்களில் குஜராத்திகள் மட்டுமல்ல; மற்ற மாநிலத்தவரும் இருந்தனர். மேலும் ஆங்காங்கே முகாம் இட்டிருந்த நிவாரணக் குழுக்களுக்கு முழு அதிகாரம் வழங்கப்பட்டிருந்தது. மீட்புபணிக்கும், மீட்கப்பட்டவர்களை உடனடியாக சொந்த ஊருக்கு அனுப்புவதற்கும் தேவையான ஏற்பாடுகளைச் செய்ய அந்த இடத்திலேயே முடிவு எடுக்கும் அதிகாரமும் வழங்கப்பட்டிருந்தது. இதனால் 2 நாட்களில் 15 ஆயிரம் பேரை மோடி குழுவினர் மீட்க முடிந்தது. மற்ற எந்த மாநில முதல்வர்களும் செய்யாத ஒன்றை மோடி செய்துள்ளார். அவர‌ே நேரடியாக பாதிப்பு பகுதிகளுக்குச் சென்று, பார்வையிட்டு, உடன் அழைத்து சென்ற அதிகாரிகள் குழு மற்றும் பா.ஜ., தொண்டர்கள் உதவியோடு பலரை மீட்டுள்ளார். குஜராத்திகள் மட்டுமே மீட்கப்பட்டனர் என்று கூறப்படுவதற்கு எவ்வித ஆதாரமும் இல்லை; குஜராத் அரசு அவ்வாறு எ‌துவும் கூறவில்லை.மேலும் கேரளா உட்பட இதர மாநிலங்களைச் சேர்ந்தவர்களும் மோடி குழுவினரால் மீட்கப்பட்டுள்ளதாக தகவல்கள் கூறுகின்றன.

அனுபவம் கை கொடுத்தது:

குஜராத்தைப் பொறுத்தவரை ஏற்கனவே பூகம்பம் போன்ற பேரிடரைச் சந்தித்த மாநிலம்; இத்தகைய பேரிடரின்போது எப்படி செயல்பட வேண்டும் என்பதை அனுபவபூர்வமாக அறிந்த அதிகாரிகள் கொண்ட மாநிலம். எனவே உத்தரகண்ட் பகுதிக்கு, மோடி அவருடைய குழுவினருடன் சென்றதில் வியப்பேதும் இல்லை. மேலும் இந்த மீட்பு பணியில் விமான சேவை மட்டுமல்லாமல், பஸ், கார், லாரி என அனைத்து வாகன வசதிகளும் பயன்படுத்தப்பட்டன.

தினமலர்