சீனாவில் மதக்கலவரம்: 9 போலீசார் வெட்டிக்கொலை - பலி எண்ணிக்கை 36 ஆக உயர்வு

மேற்கு சீனாவில் உள்ள உரும்கி பகுதியில் வசிக்கும் துருக்கி மொழி பேசும் முஸ்லிம்கள் அப்பகுதியை தங்களின் தாய்நாடு என்று கூறி உரிமை கோரி வருகின்றனர்.

தங்களின் மொழி மற்றும் மத உரிமைகளின் மீது சீன அரசு மேலாதிக்கம் செலுத்தி வருவதாக கூறும் இவர்கள் உள்ளூர் மக்களுடன் மோதி வருகின்றனர்.

மத்திய ஆசியா மற்றும் பாகிஸ்தானில் உள்ள போராளி குழுக்களின் ஆதரவுடன் கிழக்கு துருக்கிஸ்தான் என்ற தனிநாட்டை உருவாக்கும் முயற்சியில் இவர்கள் ஈடுபடுவதாக குற்றம் சாட்டும் சீன அரசு இவர்களை ஒடுக்க தாக்குதல் நடத்தி வருகிறது.

உரும்கி பகுதியில் கடந்த ஏப்ரல் மாதம் இதுபோன்று ஏற்பட்ட கலவரத்தில் 21 பேர் உயிரிழந்தனர். அதே போல், இன்றும் உள்ளூர் மக்கள் மற்றும் பிரிவினைவாத முஸ்லிம்களிடையே வெடித்த மோதல், கலவரமாக மாறியது.

சம்பவ இடத்திற்கு போலீசார் வந்து சேருவதற்குள் இரு தரப்பினருக்கும் இடையே நடந்த மோதலில் 17 பேர் பலியாகினர். கலவரத்தை அடக்க போலீசார் நடத்திய துப்பாக்கிச் சூட்டில் 10 பேர் உயிரிழந்தனர்.

இன்றைய கலவரத்தில் இதுவரை 27 பேர் பலியாகியுள்ளனர். படுகாயமடைந்த பலர் ஆஸ்பத்திரிகளில் சிகிச்சை பெற்று வருகின்றனர்.

இந்நிலையில் போலீசாரின் துப்பாக்கிச் சூட்டில் பலியானவர்களின் உறவினர்கள் பயங்கர ஆயுதங்களுடன் சென்று உள்ளூர் போலீஸ் நிலையம், அரசு அலுவலகங்கள் ஆகியவற்றின் மீது வெறித்தனமாக தாக்குதல் நடத்தினர்.

இவர்களில் சிலர் போலீஸ் நிலையத்துக்குள் புதுந்து 9 போலீசாரை மிருகத்தனமாக வெட்டிக் கொன்றனர். இதனால், இன்றைய தாக்குதலில் பலியானோர் எண்ணிக்கை 36 ஆக உயர்ந்துள்ளது.

மாலைமலர்