அடுக்குமாடி குடியிருப்புக்குள் புகுந்து நாயை கவ்விச் சென்ற சிறுத்தை

soplangi · soplangi Wed Jun 26, 2013 1:52 pm

மும்பையின் புறநகர் பகுதியான பொரிவலியில் சஞ்சய் காந்தி தேசிய வனவிலங்கு பூங்கா உள்ளது.

1974ம் ஆண்டு தொடங்கப்பட்ட இந்த பூங்கா சுமார் 104 சதுர கிலோ மீட்டர் பரப்பளவில் குன்றுகள், ஏரிகள் சூழ்ந்த பசுமையான இயற்கை சூழலில் அமைந்துள்ளது.

மும்பையின் பொழுதுப்போக்கு அம்சங்களில் ஒன்றாக கருதப்படும் சஞ்சய் காந்தி தேசிய வனவிலங்கு பூங்கா, ஆசியாவிலேயே அதிக பார்வையாளர்களை கவரும் பூங்காவாக திகழ்கிறது.

ஆண்டுதோறும் 20 லட்சம் பார்வையாளர்கள் இந்த பூங்காவை கண்டு களித்துச் செல்கின்றனர்.

இந்த பூங்காவினுள் உள்ள அரிய வகை புலி, சிறுத்தை உள்ளிட்ட வன விலங்குகளும், ஏராளமான பறவைகள், பட்டாம் பூச்சிகளும் காண்பவரின் கண்களை விட்டு நீங்காத எழில் நிறை காட்சிகளாக வருகையாளர்களின் இதயங்களில் என்றென்றும் பதிந்திருக்கும்.

இந்த பூங்காவின் மதில் சுவற்றையொட்டி மும்பையின் முலுந்த் பகுதி உள்ளது.

இங்குள்ள அடுக்குமாடி குடியிருப்பில் பொருத்தப்பட்டிருக்கும் சி.சி.டி.வி.யில் நேற்று பதிவான காட்சி, வனவிலங்கு பூங்காவுக்கு வருபவர்களின் மனக்கண்ணில் பதிவான காட்சிகளை எல்லாம் துடைத்து அழித்து விடும் திகில் காட்சியாக உள்ளது.

அந்த அடுக்குமாடி குடியிருப்பின் உள்ளே ராஜநடை போட்டு வந்த ஓர் சிறுத்தை, சில நொடிகளில் அங்கு படுத்திருந்த அழகான வளர்ப்பு நாயை கழுத்தில் கவ்வி இழுத்துக்கொண்டு ஓடிய காட்சி அந்த சி.சி.டி.வி. கேமராவில் பதிவாகியுள்ளது.

வனவிலங்கு பூங்காவின் மதில் சுவற்றை தாண்டி குதித்து தப்பி வந்த அந்த சிறுத்தை மீண்டும் வனவிலங்கு பூங்காவுக்கு சென்று விட்டதா? அல்லது... முலுந்த் பகுதியில் பதுங்கி அடுத்த விருந்துக்காக காத்துக் கொண்டிருக்கிறதா? என்ற பீதியில் மும்பை மக்கள் உறைந்துப்போய் உள்ளனர்.

-- மாலைமலர்