24 மணி நேரத்திற்கு முன் ரயில் டிக்கெட் ரத்து செய்வதால் மட்டும் முழுத்தொகையும் கிடைக்காது

புதுடில்லி: ரயில் புறப்படுவதற்கு 24 மணிநேரம் முன்னதாக ரயில் டிக்கெட்டை ரத்து செய்தாலும், டிக்கெட்டிற்கான முழுபணத்தை இனி திரும்பப் பெற முடியாது. நீங்கள் வாங்கி இருக்கும் வகுப்பிற்கு ஏற்ப ஒரு தொகையை அபராதமாக கொடுக்கத்தான் வேண்டும்.

ரயில்வே அமைச்சகம், ரத்து செய்யும் டிக்கெட்டிற்கான பணத்தை திரும்பப் பெறும் முறையில் சில மாற்றங்களை ஜூலை 1ம் தேதி முதல். ந‌டைமுறைப்படுத்துகிறது. இதுவரை ரயில் புறப்படுவதற்கு 24 மணி நேரம் முன்னதாக டிக்கெட்டை ரத்து செய்தால், முழுத் தொகையும் திருப்பித் தரப்பட்டு வந்தது. ஆனால் புதிய மாற்றத்தின்படி பயணிகள் தாங்கள் பயணம் செய்வதற்கு 24 மணிநேரத்திற்கு முன் டிக்கெட்டை ரத்து செய்தாலும் டிக்கெட் வாங்கிய வகுப்பிற்கேற்ப ஒரு தொகையைப் பிடித்துக் கொண்டு மீதி தொகையையே திருப்பிக் கொடுப்பார்கள். இதேபோல், இந்த புதிய முறைப்படி, ரயில் புறப்படுவதற்கு 6 மணி நேரம் முன்னதாக டிக்கெட்டை ரத்து செய்தால் 75 சதவீத கட்டணம் திருப்பித் தரப்படும். ரயில் புறப்படுவதற்கு முன் 6 மணி நேரத்திற்குள் அல்லது ரயில் சென்ற 2 மணி நேரத்திற்குள் டிக்கெட்டை ரத்து செய்தால் 50 சதவீதம் கட்டணம் திருப்பித் தரப்படும்.

நீண்ட தூரப் பயணம்:

பயணம் செய்யும் தூரம் 500 கி.மீ., அல்லது அதற்கு மேல் இருக்கும்பட்சத்தில் ரயில் புறப்படும் நேரத்திற்கு 12 மணிநேரத்திற்கு முன் வரை ரத்து செய்யலாம் என தெரிவிக்கப்பட்டுள்ளது. ரயில் புறப்படுவதற்கு 2 மணிநேரத்திற்கு பின் ரத்து செய்யப்படும் முன்பதிவு செய்யப்பட்ட டிக்கெட்டுகளுக்கு அதன் கட்டணம் திரும்ப தர முடியாது என ரயில்வே நிர்வாகம் தெரிவித்துள்ளது. போராட்டம் அல்லது வெள்ளப் பெருக்கு உள்ளிட்ட இயற்கை சீற்றங்களால் பயணம் ரத்து செய்யப்பட்டால் அல்லது ரத்தாகும் ரயில்களின் கட்டணத்தை திரும்பப் பெறுவதற்கான கால அவகாசம் 90 நாட்களில் இருந்து 10 நாட்களாக குறைக்கப்பட்டுள்ளது. புதிய மாற்றத்தின்படி காத்திருப்போர் பட்டியலில் இருப்போர் அல்லது ஆர்.ஏ.சி., டிக்கெட்கள் ரயில் புறப்படும் நேரத்திற்கு 3 மணிநேரத்திற்கு முன் ரத்து செய்யப்படும் டிக்கெட்டிற்கு ரூ.30 பிடித்ததுடன் ரயில் கட்டணம் திரும்ப தரப்பட உள்ளது. கடந்த 15 வருடங்களாக ரத்து செய்யப்படும் டிக்கெட் மற்றும் கட்டணம் திரும்பப் பெறும் சட்டம் உள்ளிட்ட ரயில் பயணிகள் சட்டம் திருத்தப்படாமல் இருப்பதாகவும், அதனால் டிக்கெட் திட்டத்தில் பல்வேறு மாற்றங்களை கொண்டு வர இந்திய ரயில்வே முடிவு செய்திருப்பதாக ரயில்வே அமைச்சகம் தெரிவித்துள்ளது.

-- தினமலர்

soplangi wrote:கடந்த 15 வருடங்களாக ரத்து செய்யப்படும் டிக்கெட் மற்றும் கட்டணம் திரும்பப் பெறும் சட்டம் உள்ளிட்ட ரயில் பயணிகள் சட்டம் திருத்தப்படாமல் இருப்பதாகவும், அதனால் டிக்கெட் திட்டத்தில் பல்வேறு மாற்றங்களை கொண்டு வர இந்திய ரயில்வே முடிவு செய்திருப்பதாக ரயில்வே அமைச்சகம் தெரிவித்துள்ளது.

நல்ல நடவடிக்கை தான் , இது போல இன்னும் பல சட்டங்கள் பல ஆண்டுகளாக எதிவும் மாற்றம் செய்யபடாமல் காலாவதியாகி கிடக்கிறது அதையும் இப்போதைய காலதிற்கு ஏற்ப மாற்றினால் நல்லது

பயனுள்ள தகவல்கள். பகிர்விற்கு நன்றி!