யார் மினி சாம்பியன் :இன்று இந்தியா, இங்கிலாந்து பலப்பரீட்சை : சாம்பியன்ஸ் டிராபி பைனலில் விறுவிறு

லண்டன்: இந்தியா, இங்கிலாந்து அணிகள் மோதும் சாம்பியன்ஸ் டிராபி தொடரின் பைனல் இன்று நடக்கிறது. இதில் அசத்தும் பட்சத்தில், சர்வதேச கிரிக்கெட் கவுன்சில்(ஐ.சி.சி.,) நடத்தும் மூன்றுவிதமான உலக கோப்பையை வென்ற முதல் கேப்டன் என்ற சாதனையை தோனி படைக்கலாம்.

இந்திய அணியின் வெற்றிக் கேப்டன் தோனி. கடந்த 2007ல் ஐ.சி.சி., நடத்திய "டுவென்டி-20' உலக கோப்பை தொடரில் சாம்பியன் பட்டம் வென்று காட்டினார். பின் 2011ல் மும்பையில் நடந்த ஐ.சி.சி., உலக கோப்பை(50 ஓவர்) தொடரிலும் சாம்பியன் பட்டம் பெற்று தந்தார்.

தற்போது இங்கிலாந்தில் ஐ.சி.சி., சாம்பியன்ஸ் டிராபி(மினி உலக கோப்பை) தொடரின் பைனல் இன்று நடக்கிறது. இது தான் கடைசி தொடர். இதில் இந்தியா கோப்பை வென்றால், மூன்றுவிதமான ஐ.சி.சி., தொடரில் கோப்பை வென்ற முதல் கேப்டன் என்ற பெருமையை தோனி பெறலாம்.

ஆஸ்திரேலியாவின் முன்னாள் கேப்டன் பாண்டிங் இரண்டு முறை ஐ.சி.சி., உலக கோப்பை(2003, 2007), ஒரு முறை சாம்பியன்ஸ் டிராபியை(2009) வென்றுள்ளார். ஆனால், "டுவென்டி-20' உலக கோப்பையை வெல்ல முடியவில்லை.

இன்றைய பைனல் தோனி மற்றும் இங்கிலாந்து கேப்டன் அலெஸ்டர் குக் ஆகியோரது திறமைக்கு விடுக்கப்பட்ட சவாலாக அமையும்.

இதுகுறித்து இங்கிலாந்து அணியின் முன்னாள் கேப்டன் நாசர் ஹுசைன் கூறியது:

தோனி, அலெஸ்டர் குக் என்ற இரு கேப்டன்களையும் ஒப்பிடுவதே தவறு. ஏனெனில், உலக கோப்பை பைனலில் (மும்பை) வெற்றிக்கு தேவையான ரன்னை எடுத்தது போன்று, ஏராளமான அனுபவங்கள் தோனிக்கு உள்ளது. சாம்பியன்ஸ் டிராபி தொடரெல்லாம் அவருக்கு சிறிய மீன் போல. கிரிக்கெட்டில் எப்படிப்பட்ட சூழ்நிலை வந்தாலும் மிகவும் அமைதியாக (கூலாக) செயல்படுகிறார்.

குக்கிற்கு பாராட்டு:

இங்கிலாந்து அணியின் கேப்டன் குக்கை பொறுத்தவரையில், இத்தொடரில் சிறப்பான திட்டங்கள் வகுத்து செயல்படுகிறார். முதன் முதலாக ஐ.சி.சி., தொடரில் கேப்டனாக இருக்கும் இவர், தனது முடிவுகள் சரியானது தான் என்று நிரூபித்து வருகிறார். இங்கிலாந்து அணியின் சிறந்த கேப்டனாக குக் விளங்குவார் என்று நம்புகிறேன். தவிர, இன்றைய பைனலிலும் குக், தனது பணியை நன்கு செய்வார் எனத் தெரிகிறது.

இவ்வாறு நாசர் உசைன் கூறினார்.



ஐ.சி.சி., அர்ப்பணிப்பு

கடந்த பத்தாண்டுகளுக்கும் மேலாக எய்ட்ஸ் விழிப்புணர்வு நிகழ்ச்சிகளை ஐ.சி.சி., நடத்தி வருகிறது. சாம்பியன்ஸ் டிராபி பைனலையும், இதற்காக ஐ.சி.சி., அர்ப்பணித்து உள்ளது. இதன்படி, ஐ.நா., எய்ட்ஸ் அமைப்பின் இணை நிர்வாக இயக்குனர் ஜான் பெகலே இன்றைய பைனலுக்கு அழைக்கப்பட்டுள்ளார்.

இவர், ஐ.சி.சி., தலைவர் ஆலன் ஐசக், இங்கிலாந்து மற்றும் வேல்ஸ் கிரிக்கெட் போர்டு தலைவர் கைல்ஸ் கிளார்க் ஆகியோருடன் எய்ட்சால் பாதிக்கப்பட்ட இருவரும், இன்று தேசிய கீதம் இசைக்கும் நிகழ்ச்சியில் பங்கேற்பர்



வலுவான இந்தியா

பைனல் குறித்து இங்கிலாந்து அணி கேப்டன் அலெஸ்டர் குக் கூறுகையில்."" இந்திய அணி மிகவும் வலுவானது. சிறப்பான ஆட்டத்தை வெளிப்படுத்தி, இத்தொடரில் தோல்வியடையாத அணியாக வலம் வருகின்றது. "டாப் ஆர்டரில்' வலுவான வீரர்கள் உள்ளனர். ஆனால், கடந்த முறை இங்கு இந்தியாவை முழுமையாக வென்றோம். அதேபோல, இன்றும் வெற்றி பெற்று ஒருநாள் போட்டி வரலாற்றில் முதல் கோப்பை கைப்பற்றி வரலாறு படைப்போம்,'' என்றார்.



இதுதான் சிறந்த அணி

இங்கிலாந்து அணி முன்னாள் கேப்டன் மைக்கேல் வான் கூறுகையில்,"" சாம்பியன்ஸ் டிராபி தொடரில் இந்திய அணி பலத்துடன் காணப்படுகிறது. குறிப்பாக, 2011ல் உலக கோப்பை வென்ற அணியை விட, தற்போது சிறப்பாக உள்ளது. இளம் வீரர்கள் சுதந்திரத்துடன் செயல்படுகின்றனர். பீல்டிங்கில் திறமையுடன் இருக்கின்றனர். பேட்டிங்கிலும் நல்ல "ஷாட்' அடிக்கின்றனர்.

கடந்த 2004ல் சாம்பியன்ஸ் டிராபி பைனலில் இங்கிலாந்து அணி, வெஸ்ட் இண்டீஸ் அணியிடம் தோல்வியடைந்தது. தற்போது மீண்டும் பைனலுக்கு முன்னேறியுள்ளது. இதில், இந்திய அணியை வீழ்த்துவதன் மூலம், சாதனை படைக்கலாம். தவிர, 2004ல் இருந்ததை விட, தற்போது இங்கிலாந்து அணி நல்ல "பார்மில்' உள்ளது,''என்றார்.