ரேஷன் கடைகளில் தினை அரிசி தினை மாவு விற்க உத்தரவு

soplangi · soplangi Sat 22 Jun 2013 - 19:01

ரேஷன் கடைகளில் தினை அரிசி மற்றும் தினை மாவு விற்பனை செய்ய தமிழக அரசு உத்தரவிட்டுள்ளது. தேவையான தினை அரிசி மற்றும் மாவு வகைகள் வட மாநிலங்களிலிருந்து கொள்முதல் செய்யப்படுகின்றன. ரேஷன் கடைகளில் பொது விநியோக திட்டத்தின் கீழ் தகுதி வாய்ந்த குடும்ப அட்டைதாரர்களுக்கு மாதம் 20 கிலோ அரிசி இலவசமாக வழங்கப்படுகிறது. சிறப்பு பொது விநியோக திட்டத்தின் கீழ் உளுத்தம¢ பருப்பு, துவரம் பருப்பு போன்றவை கிலோ ரூ.30க்கும் பாமாயில் லிட்டர் ரூ.25 க்கும் வழங்கப்படுகிறது. சிறப்பு அங்காடிகள் மூலம் தரமான வெளிமாநில அரிசி கிலோ ரூ.20 க்கும் விற்பனை செய்யப்படுகிறது. இது தவிர கோதுமை போன்ற பொருட்களும் ரேஷன் கடைகளில் வழங்கப்படுகின்றன.

இந்நிலையில் மக்கள் உடல் ஆரோக்கியத்தை காக்கும் வகையில் ரேஷன் கடைகள் மூலம் தினை அரிசி மற்றும் தினை மாவு விற்பனை செய்ய தமிழக அரசு உத்தரவிட்டுள்ளது. இதற்கு தேவையான தினை அரிசி, மாவு வகைகள் வட மாநிலங்களிலிருந்து கொள்முதல் செய்யப்பட உள்ளன. தமிழ்நாடு மாநில திட்டக்குழு துணைத்தலைவர் சாந்தா ஷீலா நாயர், தமிழக அரசுக்கு பரிந்துரை ஒன்றை அனுப்பியுள்ளார். அந்த பரிந்துரையில் உடல் ஆரோக்கியத்துக்கும் உறுதுணையாக இருக்கும் தினை அரிசி, மாவு வகைகளை பொது விநியோக திட்டத்தின் கீழ் விநியோகம் செய்யலாம்.

அவ்வாறு விற்பனை செய்தால் மக்கள் ஆரோக்கியமும் காக்கப்படும். தினை குறித்து இப்போதுள்ள சந்ததியினர் தெரிந்து கொள்ளவும் வாய்ப்பு ஏற்படும். கோதுமையை தென் மாநில மக்கள் ஏற்காத நிலை மாறி தற்போது கோதுமை, மைதா பயன்பாடு அதிகரித்துள்ளது. அதுபோலவே தினையை பிரபலப்படுத்தினால் எளிதாக மக்களை சென்றடையும் என்று தெரிவித்துள்ளார். இந்த பரிந்துரையை தமிழக அரசு ஏற்று, ரேஷன் கடைகளில் தினை அரிசி மற்றும் மாவு விற்க உத்தரவிட்டு, வட மாநிலங்களிலிருந்து தினையை கொள்முதல் செய்ய உத்தரவிட்டுள்ளது.

தினையின் பயன்கள்

*உடலுக்கு அதிக சத்து மற்றும் பலத்தை அளிக்கும். கபநோய் நீங்கும். வாயுக்கேளாறு, வீக்கம், வாதம், கபம், பித்தம் நீங்கும், சர்க்கரை வியாதி உள்ளவர்கள் தினை அரிசி சாதம் சாப்பிடலாம்.
*உலக அளவில் 1 கோடியே 6 லட்சத்து 10 ஆயிரம் டன் தினை உற்பத்தி செய்யப்பட்டு இந்தியா முதலிடத்தில் உள்ளது. சீனா இரண்டாம் இடத்தில் உள்ளது.
*தினை அரிசி சாதம், தினை அரிசி உப்புமா செய்யலாம். தினை மாவை தேனில் கலந்து சாப்பிட்டால் உடலுக்கு மிகவும் நல்லது.
*மில்லட் என்று வகைப்படுத்தப்பட்ட உணவு வகையான தினையின் கதிர்கள் நரிவாலைப்போல இருப்பதால் அதற்கு பாக்ஸ் டைல் மில்லட் என்று பெயர். மேலும் இட்டாலியன் மில்லட் என்ற பெயரும் உண்டு.

-- மாலைமலர்

**சிவா** · **சிவா** Sat 22 Jun 2013 - 19:05

தரமான வெளிமாநில அரிசி கிலோ ரூ.20 க்கும் விற்பனை செய்யப்படுகிறது.

தமிழகத்தில் உற்பத்தியாகும் அனைத்து அரிசி வகைகளும் தரமற்றவைகளா?

ராஜு சரவணன் · ராஜு சரவணன் Sat 22 Jun 2013 - 22:46

ஏன் தமிழகத்தில் விவசாயம் நடைபெறவில்லையா. இல்ல நம்ம மண்ணுல தினை விளையாதா. இங்க உள்ள விவசாயிகள் வீனா போகணும். மற்ற மாநில விவசாயிகள் நல்ல இருக்கனுமோ .

**Muthumohamed** · **Muthumohamed** Sat 22 Jun 2013 - 23:00

ராஜு சரவணன் wrote:ஏன் தமிழகத்தில் விவசாயம் நடைபெறவில்லையா. இல்ல நம்ம மண்ணுல தினை விளையாதா. இங்க உள்ள விவசாயிகள் வீனா போகணும். மற்ற மாநில விவசாயிகள் நல்ல இருக்கனுமோ .

இருந்தாலும் இருக்கும் அண்ணா சோகம்