மாங்கனிகளை வீசி வழிபாடு!

காரைக்கால் அம்மையார் கோயில் மாங்கனித் திருவிழாவையொட்டி ஞாயிற்றுக்கிழமை நடைபெற்ற பிச்சாண்டவர் வீதியுலாவின்போது, பக்தர்கள் மாங்கனிகளை இறைத்து வழிபாடு நடத்தினர்.

அறுபத்து மூன்று நாயன்மார்களில் ஒருவரான புனிதவதியார் என்னும் காரைக்கால் அம்மையாருக்கு காரைக்காலில் தனி கோயில் உள்ளது. சிவபக்தராக இருந்து வாழ்ந்த காலம், பரமதத்தரை மணம் முடித்தது,

கணவரே தம் பாதத்தில் வீழ்ந்து வணங்கியதை ஏற்க முடியாமல், பேய் உருவம் பூண்டு இறைவன் வீற்றிருக்கும் கயிலாயத்தை காலால் நடந்து செல்வது ஆகாதென்றெண்ணி தலைகீழாக கைகளை ஊன்றி சிவபெருமானைக் கண்டார் புனிதவதியார்.

அவரின் பக்தியைப் பாராட்டும் வகையில் தாய், தந்தையரற்ற இறைவன்(சிவபெருமான்) அம்மையே என்றழைத்தார். இவ்வாறு பெருமை கொண்ட அம்மையாரின் வாழ்க்கை வரலாற்றை விளக்கி, காரைக்காலில் அருள்மிகு கைலாசநாதர் கோயில் சார்பில் மாங்கனித் திருவிழா ஆண்டுதோறும் நடத்தப்படுகிறது.

இத்திருவிழாவை முன்னிட்டு, 21-ஆம் தேதி பிள்ளையார் பூசை நடத்தப்பட்டு அருள்மிகு சித்தி விநாயகர் கோயிலில் இருந்து இரவு பரமதத்தர்(மாப்பிள்ளை) அம்மையார் கோயிலுக்கு அழைத்து வரப்பட்டார்.

22-ஆம் தேதி காரைக்கால் அம்மையார் திருக்கல்யாண உற்சவம் நடைபெற்று மாலை பரமதத்தரும், புனிதவதியாரும் முத்துச் சிவிகையில் வீதியுலா செல்லும் நிகழ்ச்சி நடைபெற்றது.

ஞாயிற்றுக்கிழமை அதிகாலை 3 மணியளவில் அருள்மிகு பிச்சாண்டவர் உள்ளிட்ட ஐம்மூர்த்திகளுக்கும் திருமஞ்சனம்  நடைபெற்றது. அருள்மிகு பிச்சாண்டவர் அம்மையார் வீட்டுக்கு உணவு சாப்பிடச் செல்லும் நிகழ்ச்சியை விளக்கும் வகையில் மாங்கனியுடன் பிச்சாண்டவர் பவழக்கால் சப்பரத்தில் காலை 9 மணிக்கு வீதியுலா புறப்பாடு தொடங்கியது.

சப்பரம் புறப்பாடு தொடங்கியது முதல் ஒவ்வொரு வீடுகள், கட்டடங்களின் மேல் நின்றவாறு மக்கள், பக்தர்களை நோக்கி மாங்கனிகளை இறைத்தனர்.

திருமணமாக வேண்டும், குழந்தை பாக்கியம் வேண்டும் என்பன உள்ளிட்ட வேண்டுதல் செய்து கொண்டவர்கள், இறைக்கப்படும் மாங்கனியைப் பிடித்து பத்திரமாக வீட்டுக்குக் கொண்டு சென்றனர். நேர்த்திக் கடன் செய்து வெற்றி கண்டவர்கள் பலரும் மாங்கனிகளை இறைத்தனர்.

பக்தர்களில் சிலர் வலை தயாரித்து அதன் மூலம் மாங்கனிகளைப் பிடித்தனர். பிச்சாண்டவர் சப்பரத்தின் முன்னும், பின்னும் ஆயிரக்கணக்கான பக்தர்கள் சென்றனர்.

காரைக்கால் நகரின் பாரதியார் வீதி, கென்னடியார் வீதி, மாதாகோவில் வீதி, லெமேர் வீதி வழியாக பவழக்கால் சப்பரம் மாலை அம்மையார் கோயிலை நெருங்கியது. அப்போது, புனிதவதியார்(காரைக்கால் அம்மையார்) பிச்சாண்டவரை எதிர்கொண்டு அழைத்துச் சென்று மாங்கனியுடன் அமுது படையலிடும் நிகழ்ச்சி நடைபெற்றது.

திருவிழாவையொட்டி, காரைக்கால் நகரம் விழாக்கோலம் பூண்டிருந்தது. தெருவெங்கும் பரவலாக பக்தர்கள் கூட்டம் இருந்தது. வெளியூரில் இருந்து மாங்கனி வரத்து: மாங்கனித் திருவிழாவையொட்டி, தமிழகத்தின் பல்வேறு பகுதிகளில் இருந்து குறைந்த விலை முதல் விலை உயர்ந்த மாங்கனிகள் பலவும் கடந்த சில நாள்களாக காரைக்கால் நகருக்கு வியாபாரிகள் கொண்டு வந்து விற்கத் தொடங்கினர். மாங்கனியை இறைப்பதற்காகவும், விருந்தினர்களுக்கு விருந்து உபசரிப்பின்போது வைக்கவும் ஏராளமானோர் மாங்கனிகளை வாங்கிச் சென்றனர்.

எங்கள் ஊர் பகுதி விழா , பகிர்வுக்கு நன்றி சாமி அவர்களே