ஏர் கலப்பையாக உதவும் சைக்கிள்?

மகாராஷ்டிரா, ஜல்கான் மாவட்டத்தில் திரு கோபால் பிஸே என்ற எளிய விவசாயி மகத்தான சாதனை புரிந்திருக்கிறார். ஏதோ கொஞ்சம் நிலமே உள்ள ஏழை, இவரால் கலப்பை, ஏர் கூட வாங்க இயலவில்லை. வாடகைக்கு எடுக்கக்கூட இவரிடம் பணம் இல்லை. பிறகுதானே ட்ராக்டரைப் பற்றி யோசிக்க வேண்டும்.

ஒருநாள் இவர் தமது வயலுக்குச் சென்று கொண்டிருக்கையில் ஒரு சைக்களின் மேல் நான்கு மூட்டைகளை வைத்து எடுத்துச் சென்றார். நான்கு மூட்டைகள் மாவு எவ்வளவு கனம் இருக்கும்? இருப்பினும், ஒரு மாட்டு வண்டியில் அவற்றை எடுத்துச் செல்லாது, சைக்கிளின்மீது அவற்றை வைத்து எடுத்துச் செல்வதால் அந்த வியாபாரிக்குச் சிரமம் இருப்பினும், வண்டிச் சத்தம் மிச்சம்தானே!

அப்போது கோபால் பிஸேவிற்கு ஒரு பொறி தட்டியது. தமது வயலை உழுவதற்குச் சைக்கிளை பயன்படுத்தினால் என்ன!

இந்த எண்ணத்தைச் செயல்படுத்த ஆரம்பித்தார். பல முயற்சிகளுக்குப் பிறகு, ஒரு சைக்கிளின் முன்பக்கத்தில் இருசு, சக்கரம், ஹாண்டில்பார் இவற்றைப் பயன்படுத்தி ஓர் ஏர் செய்தார். பிறர் இதைப் பற்றிப் பரிகசித்தாலும் தமது முயற்சியைத் தொடர்ந்தார். இவரது புதிய ஏர் வெற்றிகரமாகச் செயல்பட்டது. இதற்கு க்ருஷிராஜா என்று நாமகரணம் செய்தார். இந்தப் புதுமாதிரியான ஏர் மக்களிடையே பிரபலமாகியது. இச்சாதனைக்காக இவருக்கு நேஷனல் இன்னொவேஷன் அவார்ட் கிடைத்தது.

இதுவரை சுமார் 200 ஏர்களைச் செய்திருக்கிறார் இவர். ஒன்று ரூ 1200க்கு விற்பனையாகிறது. உழவுமாடுகள் வைத்துக் கொள்ள முடியாத விவசாயிக்கு ஏற்ற சாதனம் இது. இதை வயல் உழுவதற்கு மட்டும் பயன்படுத்தாமல், களை பிடுங்குவதற்கும், களைக் கொட்டுவதற்கும் இன்னும் பிற விவசாயப்பணிகளுக்கும் பயன்படுத்தலாமே.

“என்னை போன்ற எளிய விவசாயிகளுக்கு ஒரு ஜோடி உழவுமாடுகளை வாங்கிப் பராமரித்துப் பாடுபடுவதைவிட இந்தப் புதுமையான சாதாரணமான சாதனம் மிகவும் உதவியாக இருக்கிறது’ என்கிறார் இந்த விவசாயி - பொறியியல் அறிஞர்!

இப்போது கிராஸ்ரூட்ஸ் இன்னொவேஷன் ஆக்மென்டேஷன் நெட்வொர்க் என்ற அமைப்பின் உதவியினைக் கொண்டு இந்தப் புதுமாதிரியான சைக்கிள் - கலப்பை - ஏர் சாதனத்திற்கு மோட்டார் பொருத்திப் பயன்படுத்துகிறார்கள்.

- டி.எம்.எஸ்.

இவருதான் மெய்யாலுமே வில்லெஜ் விங்ஞானி