கனிமொழி வெற்றிக்காக தீயாக வேலை செய்யும் திமுக.

ராஜ்யசபா தேர்தலில், தி.மு.க., வேட்பாளர் கனிமொழிக்கு வெற்றிக் கனியை பறித்துக் கொடுக்க வேண்டும் என்பதில், தி.மு.க., தீவிரம் காட்டி வருகிறது. டில்லியில், காங்கிரஸ் தலைவர் சோனியாவை நேற்று தி.மு.க., - எம்.பி., டி.ஆர்.பாலு சந்தித்து பேசி, காங்கிரஸ் ஆதரவை நாடினார். சென்னையில், தி.மு.க., தலைவர் கருணாநிதியை, மனிதநேய மக்கள் கட்சி(ம.ம.க.,) தலைவர்கள் சந்தித்து, தங்கள் கட்சியின் ஆதரவை தி.மு.க.,வுக்கு தெரிவித்தனர்.

சென்னை, மண்ணடியில் உள்ள ம.ம.க., அலுவலகத்திற்கு, நேற்று காலை, 11:00 மணிக்கு, தி.மு.க., முன்னாள் அமைச்சர்கள் பொன்முடி, வேலு, மைதீன் கான் ஆகியோர் சென்று, ம.ம.க., தலைவர்களிடம், முறைப்படி கனிமொழிக்கு ஆதரவு கேட்டனர்.அதன் பின், கருணாநிதியை, அவரது சி.ஐ.டி., காலனி இல்லத்தில், 12:30 மணிக்கு ம.ம.க., தலைவர் ரிபாய், பொதுச் செயலர் ஜவாஹிருல்லா எம்.எல்.ஏ., மற்றும் மாநில நிர்வாகிகள் சந்தித்து, ராஜ்யசபா தேர்தலில், தி.மு.க.,வுக்கு ஆதரவு அளிப்பதாக தெரிவித்தனர். அப்போது, தி.மு.க., பொருளாளர் ஸ்டாலின், வேட்பாளர் கனிமொழி ஆகியோர் உடனிருந்தனர்.

ஏன் ஓட்டு?

வெளியே வந்த ஜவாஹிருல்லா, நிருபர்களுக்கு அளித்த பேட்டி:ராஜ்யசபா தேர்தலில், கனிமொழிக்கு ஆதரவாக, ம.ம.க., - எம்.எல்.ஏ.,க்கள் இருவரும் ஓட்டளிப்பர். அ.தி.மு.க., வேட்பாளர்களும், இந்திய கம்யூனிஸ்ட் கட்சி வேட்பாளர் டி.ராஜாவும் வெற்றி பெற, அ.தி.மு.க.,விடம் போதுமான ஓட்டுகள் உள்ளன. இந்த சந்தர்ப்பத்தில், எங்கள் ஓட்டுகளை வீணாக்க விரும்பவில்லை. ஆகவே, தி.மு.க., வேட்பாளருக்கு ஆதரவு தெரிவிக்கிறோம்.

லோக்சபா தேர்தலில், என்ன முடிவு எடுப்பது என்பது குறித்து, லோக்சபா தேர்தல் வரும் போது தான் பேச முடியும். ராஜ்யசபா தேர்தலுக்கு மட்டும்,

இப்போது இந்த ஒரு நிலைப்பாட்டை எடுத்திருக்கிறோம்.அ.தி.மு.க.,வுடன் சட்டசபை தேர்தலில், கூட்டணியில் நாங்கள் இருந்தோம். அதற்கு பின் நடந்த எந்த ஒரு தேர்தலிலும், அது உள்ளாட்சி தேர்தலாக இருந்தாலும், கூட்டுறவு தேர்தலாக இருந்தாலும், நாங்கள் அவர்களோடு இல்லை.இவ்வாறு அவர் கூறினார்.

ஞானதேசிகன் நழுவல்:

காங்கிரஸ் துணைத் தலைவர் ராகுலின், 43வது பிறந்த தின விழாவை ஒட்டி, சத்தியமூர்த்தி பவனில் நேற்று நடந்த இலவச பொது மருத்துவ முகாமை, தமிழக காங்கிரஸ் தலைவர் ஞானதேசிகன் துவக்கி வைத்தார். அப்போது அவர், நிருபர்களிடம் கூறுகையில், ""ராஜ்யசபா தேர்தலில் யாருக்கு ஆதரவு என்பது குறித்து, இன்னும் முடிவு செய்யவில்லை; தே.மு.தி.க., தரப்பில் ஆதரவு கேட்டு கடிதம் கொடுத்ததையும், தி.மு.க., தரப்பில் ஆதரவு கேட்டதையும், கட்சி மேலிடத்திற்கு தெரியப்படுத்தி இருக்கிறோம். யாருக்கு ஆதரவு என்பது குறித்து, ஓரிரு நாட்களுக்குள் மேலிடம் முடிவு செய்து அறிவிக்கும்,'' என்றார்.

டில்லி செல்லும் முன், சென்னை விமான நிலையத்தில், மத்திய அமைச்சர் நாராயணசாமி கூறுகையில், ""ராஜ்யசபா தேர்தலில், தே.மு.தி.க.,வினர், எங்களிடம் ஆதரவு கேட்டுள்ளனர். அவர்களுக்கு ஆதரவு அளிப்பது குறித்து, சோனியா முடிவு செய்வார்,'' என்றார்.

சோனியாவுடன் சந்திப்பு :

இதற்கிடையில், டில்லியில் நேற்று காலை, டி.ஆர்.பாலு, காங்., தலைவர் சோனியாவை, அவரது இல்லத்தில் சந்தித்தார். இந்த சந்திப்பு, 20 நிமிடம் நீடித்தது. இந்த சந்திப்பின் போது, காங்கிரஸ் கட்சியின், ஐந்து எம்.எல்.ஏ.,க்களும், கனிமொழிக்கு ஆதரவு அளிக்கவேண்டும் என, கேட்டுக் கொண்டார்.

ராஜ்யசபா தேர்தலில், காங்கிரஸ் முடிவு என்ன என்பது குறித்து, அக்கட்சி வட்டாரங்கள் கூறியதாவது: காங்கிரஸ் தலைமை, தே.மு.தி.க., வேட்பாளருக்கு ஆதரவு தருவதாக, ஏற்கனவே வாக்குறுதி அளித்துவிட்டது. இதனால், கனிமொழிக்கு எப்படி ஆதரவு தருவது என, காங்கிரஸ் யோசித்து வருகிறது. காங்கிரசின் ஆதரவை தே.மு.தி.க., தான் முதலில் கேட்டது.ஆனால், மார்க்சிஸ்ட் கம்யூனிஸ்ட் கட்சியின் ஆதரவை தி.மு.க., கேட்டு, அந்த முயற்சியில் வெற்றி பெறாததால், காங்கிரஸ் கட்சியை அணுகியுள்ளது. இந்த அரசியல் நிலைமைகளையெல்லாம் ஆராய்ந்து தான், கட்சி தலைமை முடிவெடுக்கும். தி.மு.க.,வை ஆதரித்தால், மன்மோகன் சிங்கின் மைனாரிட்டி அரசு பலம் பெரும். தே.மு.தி.க.,வுடன் உறவை வளர்த்துக் கொண்டால், காங்கிரஸ் கட்சி, தமிழகத்தில் பலம் பெற உதவும்.இவ்வாறு கட்சி வட்டாரங்கள் தெரிவிக்கின்றன.
தினமலர்

அனைவரும் படத்தை பார்த்து தீயாக வேலை செய்கிறார்கள் காரணம் கலைஞ்சரின் மகளாச்சே