அமெரிக்க உயர் நீதிமன்றத்தில் நீதிபதியாக இந்தியர் பதவியேற்பு

அமெரிக்க உயர் நீதிமன்ற நீதிபதியாக இந்தியரான ஸ்ரீ.ஸ்ரீனிவாசன் பதவியேற்றுள்ளார். அமெரிக்காவில் உச்ச நீதிமன்றத்துக்கு அடுத்தபடியாக, உயர் அதிகாரங்களை கொண்ட நீதிமன்றமாக இருப்பது வாஷிங்டன் டிசி மேல்முறையீட்டு உயர் நீதிமன்றமாகும். இதில் ஒரு நீதிபதியாக அமெரிக்காவாழ் இந்தியரான ஸ்ரீ.ஸ்ரீனிவாசன் நேற்று பொறுப்பேற்றுக் கொண்டார்.

சண்டிகாரில் பிறந்தவரான ஸ்ரீனிவாசன் (46), அமெரிக்காவின் உயர் அதிகாரம் கொண்ட நீதிமன்றத்தில் நீதிபதியாக பதவியேற்கும் முதல் இந்தியர் என்ற பெருமையை பெற்றுள்ளார். அவருக்கு இந்திய மக்களின் சார்பில் நடந்த பாராட்டு விழாவில், அமெரிக்காவுக்கான இந்திய தூதர் நிரூபமா ராவும் கலந்து கொண்டார். அவர் பேசுகையில், ‘‘ஸ்ரீனிவாசன் சாதித்து காட்டியுள்ளார்’’ என்று புகழ்ந்தார்.

ஸ்ரீனிவாசன் பேசுகையில், ‘‘உங்களின் பாராட்டுகள் என்னை மிகவும் கவுரவப்படுத்தி உள்ளன. உங்களின் பேராதரவு என்னை மகிழ்ச்சிக்கு உள்ளாக்கி உள்ளது’’ என்றார்.
அமெரிக்க அதிபர் ஒபாமாவால் கடந்த ஆண்டு ஜூன் 11ம் தேதி, ஸ்ரீனிவாசன் இப்பதவிக்கு பரிந்துரைக்கப்பட்டார். ஆனால், கடந்த ஜனவரியில் செனட் சபை காலவரையின்றி ஒத்திவைக்கப்பட்டதால், ஒபாமாவின் பரிந்துரை மீது ஓட்டெடுப்பு நடத்தப்படாமல், அந்த பரிந்துரை அதிபருக்கே திருப்பி அனுப்பப்பட்டது. இந்நிலையில், ஒபாமா மீண்டும் ஸ்ரீனிவாசனை இப்பதவிக்கு பரிந்துரைத்தார். இதில், அரிதிலும், அரிதாக 97,0 என்ற ஏகோபித்த செனட் சபை ஆதரவுடன், ஸ்ரீனிவாசன் இப்பதவிக்கு நியமிக்கப்பட்டுள்ளார்.

-- தினகரன்