நாட்டின் எதிர்கால தலைவர் மோடி தான்: 2003ல் நிதிஷ்குமார் புகழாரம்; வீடியோ வெளியீடு

குஜராத் முதல்வர் மோடி மீது ஏகப்பட்ட குறைகளைக் கூறி, பா.ஜ., உடனான 17 ஆண்டு உறவை துண்டித்துக்கொண்டார் ஐக்கிய ஜனதா தளத்தை சேர்ந்த பீகார் முதல்வர் நிதிஷ்குமார்.

பதிலடி கொடுக்கும் வகையில், மோடியை புகழ்ந்து நிதிஷ்குமார் பேசியதன் வீடியோவை பா.ஜ., வெளியிட்டுள்ளது. குஜராத்தில் உள்ள கட்ச் மாவட்டம் அதிப்பூர் என்ற இடத்தில் டிச.13, 2003ல் நடந்த ஒரு ரயில்வே விழாவில், மோடி முன்னிலையில் நிதிஷ்குமார் பேசியது:

எதிர்காலத்தில் குஜராத்திற்கு வெளியே ஒரு தலைவராக உருவாகக் கூடியவர் நரேந்திர மோடி. நீண்ட நாட்களுக்கு அவர், குஜராத்திற்கு உள்ளேயே இருக்க முடியாது என்பதை என்னால் உறுதியாக கூற முடியும். நாடு முழுமைக்கும் அவரது சேவை தேவைப்படும். கடந்த காலத்தை மறந்து மக்கள் சிந்திக்க வேண்டும்.

குஜராத்தில் ஏராளமான வளர்ச்சி பணிகளை செய்துள்ள மோடியை நான் பாராட்டுகிறேன். ஆனால் குஜராத்திற்கு வெளியே அவரைப் பற்றி, தவறான கருத்து பரவி உள்ளது. குஜராத்தில் நடந்துள்ள வளர்ச்சிப் பணிகள் பற்றி, வெளியே அதிகம் தெரியவில்லை. அவற்றை சரியாக விளம்பரப்படுத்த வேண்டும்.

2002ல் (குஜராத் கலவரம்) நடந்தது தவறு தான். அதை மட்டுமே நினைத்துக்கொண்டு, மற்ற நல்ல விஷயங்களை மறக்கக் கூடாது.

மோடியை நான் மீண்டும் பாராட்டுகிறேன். குஜராத்தில் நடந்துள்ள வளர்ச்சிப் பணிகள், நாட்டின் வளர்ச்சிக்கு உதவும். குஜராத் வளர்ச்சி அடைந்தால், நாடும் வளர்ச்சி அடையும்.

இவ்வாறு பேசினார்.

இவ்வாறெல்லாம் ஆகா, ஓகோ என மோடியை புகழ்ந்து பேசிய நிதிஷ்குமார் தான், திடீரென மோடியை விமர்சனம் செய்து கொண்டு இருக்கிறார்.

பா.ஜ., சும்மா விடுமா... மோடியை புகழ்ந்து நிதிஷ்குமார் பேசிய வீடியோவை, பீகாரில் ஊர் ஊராக காட்டிக்கொண்டு இருக்கின்றனர்.

அயோத்தி பற்றி பேசாத மோடி:

பா.ஜ., உடனான கூட்டணி உறவை முறித்துக்கொள்ள நிதிஷ்குமார் சொன்ன காரணம், "மோடி ஒரு மதவாதி' என்பது. இக்கருத்தையும் அரசியல் நோக்கர்கள் மறுக்கின்றனர்.
அயோத்தியில் ராமர் கோயில் கட்ட வேண்டும் என்பதை வலியுறுத்தி, பா.ஜ., தலைவர் அத்வானி பலமுறை ரத யாத்திரை சென்றுள்ளார். பல கூட்டங்களில பல மணி நேரம் பேசி இருக்கிறார். ஆனால் இதுவரை அயோத்தி பற்றி மோடி பேசியது இல்லை. உண்மை இப்படி இருக்க, நிதிஷ்குமாரின் குற்றச்சாட்டு, மக்கள் மத்தியில் எடுபடுமா என்பது சந்தேகமே.
thinamalar