லஞ்சம் வாங்கிய பணத்தை திரும்ப ஒப்படைத்த 3 அதிகாரிகள் மதுரை கலெக்டர் அதிரடி நடவடிக்கை

soplangi · soplangi Tue Jun 18, 2013 4:42 pm

இணைய தளம் மூலம் வந்த புகார்கள் மீது மதுரை கலெக்டர் எடுத்த நடவடிக்கையால், லஞ்சம் வாங்கிய பணத்தை உரியவர்களிடம் 3 அதிகாரிகள் திரும்ப ஒப்படைத்தனர்.

கலெக்டர் நடவடிக்கை

மதுரை மாவட்ட கலெக்டர் அன்சுல் மிஸ்ரா, இணைய தளம் (பேஸ்புக்) மூலம் பொதுமக்களின் குறைகளை பெற்று வருகிறார். அதில் பெறப்படும் மனுக்கள் சம்பந்தப்பட்ட துறைக்கு அனுப்பி வைக்கப்பட்டு நடவடிக்கை எடுக்கப்பட்டு வருகிறது. அது மட்டுமின்றி மனு கொடுத்தவர்களுக்கு, அந்த மனு எந்த அதிகாரிக்கு அனுப்பப்பட்டு உள்ளது என்பதையும், அவர்களது செல்போன் எண் ஆகியவற்றையும் தெரிவிக்கிறார். அந்த அதிகாரி நடவடிக்கை எடுக்கவில்லையென்றால், தனது கவனத்திற்கு மீண்டும் தெரிவிக்கவும் என்றும் கலெக்டர் தெரிவித்து வருகிறார். இதனால், புகார்களுக்கு உடனடி தீர்வு காணப்பட்டு வருகிறது.

குவியும் லஞ்சப் புகார்

குடிநீர், பாதாள சாக்கடை, சாலை வசதி உள்பட அடிப்படை வசதிகளுக்காகவும், பட்டா மாறுதல், முதியோர் உதவி தொகை ஆகியவற்றுக்காகவும் முதலில் அதிக அளவில் மனுக்கள் வந்தன. தற்போது அனைத்து துறைகளிலும் உள்ள புகார்கள், குறைபாடுகள், அதிகாரிகளின் லஞ்ச புகார்கள் மனுக்களாக குவிந்த வண்ணம் உள்ளன. இந்த புகாரின் உண்மைதன்மை குறித்து விசாரித்து அறிந்து சம்பந்தப்பட்ட அதிகாரிகள் மீது நடவடிக்கை எடுத்து வருகிறார். இதுவரை தவறு செய்த 10 அரசு ஊழியர்கள் சஸ்பெண்ட் செய்யப்பட்டுள்ளனர். கலெக்டர் உத்தரவுப்படி மின்சார ஊழியர் ஒருவர், தான் பெற்ற லஞ்சப்பணத்தை வீடு, வீடு சென்று திரும்ப ஒப்படைத்தார்.

மேலும் 3 அதிகாரிகள்

இதுபோன்ற நடவடிக்கைகள் வாரந்தோறும் எடுக்கப்பட்டு வருகின்றன. கடந்த ஒரு மாதத்தில் மட்டும் பொதுமக்களிடம் இருந்து வாங்கிய லஞ்ச பணத்தை 3 அரசு அதிகாரிகள் திரும்ப ஒப்படைத்து உள்ளனர். அதன் விவரம் வருமாறு:– நாகமலைபுதுக்கோட்டை ஆழ்வார்புரம் பகுதியில் உள்ள பொது மக்கள் சிலரிடம் இருந்து வீடுகளுக்கு மேல் செல்லும் மின்சார வயரை இடமாற்றம் செய்வதற்கான உரிய கட்டணத்தொகை செலுத்தியபின் ‘போர்மன்’ ஒருவர் ரூ.32 ஆயிரம் லஞ்சமாக வாங்கி இருக்கிறார். ஆனாலும் வயரை மாற்றாமல் அவர் தாமதம் செய்து வந்தார்.

கலெக்டரை சந்திக்க உத்தரவு

இது தொடர்பான புகாரை விசாரித்த கலெக்டர், அந்த போர்மேனை தொடர்பு கொண்டு அந்த பகுதியில் வயரை உடனடியாக மாற்றி விட்டு தன்னை வந்து சந்திக்கும்படி உத்தரவிட்டார். போர்மேன் மறுநாள் காலையிலேயே வயரை மாற்றி விட்டு கலெக்டரை சந்தித்தார். அப்போது கலெக்டர், வயரை மாற்றுவதற்கு வாங்கிய ரூ.32 ஆயிரம் லஞ்சம் பணத்தை உடனடியாக உரியவர்களிடம் ஒப்படைக்க வேண்டும் என்றார். அதனை ஏற்று கொண்ட அவர் உடனடியாக அந்த பணத்தை திரும்ப ஒப்படைத்தார்.

உறுதிமொழி கடிதம்

அதன்பின் கலெக்டர் ‘‘நான் லஞ்சம் பெற்றேன். அதனை உரியவர்களிடம் மீண்டும் ஒப்படைத்து விட்டேன். இனி லஞ்சம் வாங்க மாட்டேன்’ என்று உறுதி மொழி எழுதி தரும்படி போர்மேனிடம் கூறினார். அதற்கு அவர் அப்படியெல்லாம் எழுதி தர மாட்டேன் என்று பிடிவாதம் செய்ததாக தெரிகிறது. ஆனால் விடாப்பிடியாக இருந்த கலெக்டர் அப்படி எழுதி தராவிட்டால், போலீஸ் மூலம் கிரிமினல் நடவடிக்கை எடுக்கப்படும் என்று எச்சரித்தார். இதைத்தொடர்ந்து வேறுவழியின்றி அந்த போர்மேன் லஞ்சம் வாங்க மாட்டேன் என்று உறுதி மொழி கடிதம் கொடுத்து விட்டுச் சென்றார்.

கிராம அதிகாரி–சர்வேயர்

இந்த சம்பவத்திற்கு முன்பாக மதுரை தெற்கு தாலுகாவை சேர்ந்த கிராம நிர்வாக அதிகாரி ஒருவர் பட்டா மாறுதலுக்கு 6,200 ரூபாயும், பேரையூர் பகுதியை சேர்ந்த சர்வேயர் ஒருவர் இடத்தை அளப்பதற்கு ரூ.3,500–ம் லஞ்சம் வாங்கி இருந்தனர். அவர்களும் இதேபோல் லஞ்சப்பணத்தை உரியவர்களிடம் ஒப்படைத்துவிட்டு பின்னர் கலெக்டரிடம் உறுதிமொழி கடிதம் எழுதிக்கொடுத்து விட்டுச் சென்றனர்.

-- daily thanthi

லஞ்சம் வாங்கிய பணத்தை திரும்ப ஒப்படைத்த 3 அதிகாரிகள் மதுரை கலெக்டர் அதிரடி நடவடிக்கை

லஞ்சம் வாங்கிய பணத்தை திரும்ப ஒப்படைத்த 3 அதிகாரிகள் மதுரை கலெக்டர் அதிரடி நடவடிக்கை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக