டி.ராஜாவுக்கு அதிமுக ஆதரவு: வெற்றி உறுதி

**சிவா** · **சிவா** Mon Jun 17, 2013 3:47 pm

சென்னை: தமிழக ராஜ்யசபா தேர்தலில் அரசியல் ரீதியான சுமூக மாற்றமாக அ.தி.மு.க., அதிரடி முடிவை எடுத்துள்ளது. ஏற்கனவே தாக்கல் செய்துள்ள 5 பேரில் ஒருவரது மனுவை வாபஸ் பெறவும் ஏனைய எம்.எல்.ஏ.,க்கள் அனைவரும் டி.ராஜாவுக்கு ஓட்டளிக்கவும் அ.தி.மு.க., தரப்பில் முடிவு செய்யப்பட்டுள்ளது. இதற்கிடையில் தே.மு.தி.க., வும் போட்டியிடும் என இன்று மதியம் அறிவித்துள்ளது. இந்த கட்சி சார்பில் கட்சியின் பொருளாளர் இளங்கோவன் தனது வேட்பு மனுவை தாக்கல் செய்தார். இதனால் தி.மு.க.,வும், தே.மு.தி.க.,வும் நேரடியாக மோதும் சூழல் ஏற்பட்டுள்ளது. நேற்று வரை இந்த கட்சி எந்த முடிவும் எடுக்காமல் தள்ளாடியபடியே இருந்தது. காரணம் இந்த தேர்தலில் யாருடன் கூட்டு சேருவது என்று முடிவு எடுக்காததாலும், கனிமொழியை ஆதரித்தால் தி.மு.க.,வுடன் கை கோர்த்தது போல் ஆகிவிடும் என்பதாலும் தே.மு.தி.க., கட்சி குழம்பி போய் இருந்தது. இந்த தேர்தலில் போட்டியிடாமல் இருந்தால் தங்கள் எம்.எல்.ஏ.,க்கள் ஓட்டுக்கள் யாருக்கும் விழாமல் வீணாய்ப்போகும் நிலையில் இருந்தது. இதற்கிடையில் இந்ந தேர்தலில் தே.மு.தி.க., தனித்து போட்டியிடுகிறது. கடைசி நேரத்தில் யாருடைய ஆதரவை பெறுவது என்பது போகப்போகத்தெரியும்.தமிழகத்திலிருந்து ராஜ்யசபா எம்.பி.,க்கள், ஆறு பேர் தேர்வு செய்வதற்கு, இம்மாதம், 27ம் தேதி தேர்தல் நடைபெறவுள்ளது. இன்று, வேட்பு மனு தாக்கல் செய்வதற்கு இறுதி நாள். அ.தி.மு.க., சார்பில் மைத்ரேயன், ரத்தினவேல், அர்ஜுனன், தங்கமுத்து, லட்சுமணன் ஆகியோரும், தி.மு.க., சார்பில் கனிமொழியும் ஏற்கனவே வேட்பு மனுவை தாக்கல் செய்து விட்டனர். ஏழாவது வேட்பாளராக, இந்திய கம்யூனிஸ்ட் கட்சியின் தேசிய செயலர் டி.ராஜா, இன்று மனு தாக்கல் செய்தார். மனு தாக்கல் செய்வதற்கு முன் டி. ராஜா ஜெயலலிதாவை சந்தித்து பேசினார்.

டி.ராஜா., வெற்றி உறுதி:

அ.தி.மு.க., தி.மு.க., இ.கம்யூ., தே.மு.தி.க., ஆகிய கட்சிகள் சார்பில் மொத்தம் 8 பேர் போட்டியிடுவார்கள். இதனால் கனிமொழி, ராஜா வெற்றி கேள்விக்குறியாக இருந்தது. ஆனால் இன்று அ.தி.மு.க, பொதுசெயலர் ஜெ., இந்திய கம்யூ., வேட்பாளருக்கு ஆதரவு அளிக்கப்படும் என்றும், ஏற்கனவே மனுத்தாக்கல் செய்த தங்கமுத்து மனுவை விலக்கி கொள்வார் என்றும் தெரிவித்துள்ளார். இதனால் அ.தி.மு.க., மற்றும் இடது சாரி கட்சியினரின் ஓட்டுக்கள் பெற்று டி.ராஜா., வெற்றி பெறுவது உறுதியாகி விட்டது. இது போல் கனிமொழியை பொறுத்தவரையில் தே.மு.தி.க., போட்டியிடாவிட்டால் யாரும் இல்லாததால் அவர் தி.மு.க.வின் 23 ஓட்டுகள் பெற்று அவரும் வெற்றி பெற்றதாக அறிவிக்கப்படுவார். என எதிர்பார்க்கப்பட்டது. இந்நிலையில் தே.மு.தி.க., போட்டியிடும் என அறிவிக்கப்பட்டுள்ளதால் தற்போது கனிமொழியும் , தே.மு.தி.க., தரப்பில் இளங்கோவனும் நேரடியாக மோதுகின்றனர்.

யாருடைய ஆதரவு யாருக்கு ?

மனுத்தாக்கலுக்கு இன்று கடைசி நாள் ஆகும். இருப்பினும் தே.மு.தி.க.,வைபொறுத்தவரை இன்னும் போட்டியிடுவது குறித்து முடிவு செய்யப்படவில்லை. இந்க கட்சிக்கு உள்ள 29 எம்.எல்ஏ.,க்களில் 7 பேர் அதிருப்தி எம்.எல்.ஏ.,வாக செயல்பட்டு வருகின்றனர். 6 பேர் ஏற்கனவே சட்டசபையில் ரகளையில் ஈடுபட்டதால் அவர்கள் சஸ்பெண்ட் செய்யப்பட்டுள்ளனர். இதனால் 13 பேர் ஓட்டுக்கள் கிடைக்க வழி இல்லை என்றே தெரிகிறது. இதனால் எந்த கட்சி , யாருடைய ஆதரவை பெறும் என்ற பரபரப்பு நிலை உருவாகியுள்ளது. காங்கிரஸ், பா.ம.க., ஏனைய உதிரிகட்சிகள் யாருக்கு ஓட்டளிக்கும் என்ற எதிர்பார்ப்பு ஏற்பட்டுள்ளது.

தினமலர்