பிச்சைக்காரரிடம் கத்தை கத்தையாக பணம்: ரூ.13 லட்சம் அஞ்சலகத்தில் டெபாசிட்

by **சிவா** Wed Jul 08, 2009 11:20 pm

திருவனந்தபுரம் : எர்ணாகுளம் அருகே பள்ளிவாசலில் பிச்சை எடுத்துக் கொண்டிருந்த முதியவரிடம் இருந்து 80 ஆயிரம் பணம் மற்றும் தபால் அலுவலகத்தில் ரூ.13 லட்சம் டெபாசிட் செய்ததற்கான பாஸ் புத்தகம் கைப்பற்றப்பட்டது.

எர்ணாகுளம் அடுத்த மாவூர் பகுதியில் உள்ள பள்ளிவாசல் பகுதியில் 70 வயது முதியவர் ஒருவர் பிச்சை எடுத்து வந்தார். இவர் நேற்று முன்தினம் இந்த பள்ளி வாசல் அருகே உள்ள குற்றிக்காட்டூர் ஜூம்மா பள்ளி வாசலில் அமர்ந்து பிச்சை எடுத்தார். அப்போது பள்ளிவாசலுக்கு வந்தவர்களிடம், தனது பெயர் அப்துல் அலி என்றும் தூத்துக்குடி மாவட்டம் கயத்தாறு என்றும் கூறியுள்ளார். மேலும் பெரும்பாவூரில் உள்ள பள்ளிவாசலுக்கு செல்ல ஆசையாக உள்ளது. அதற்கு தேவையான பணம் தன்னிடம் இல்லையென்றும் கூறியுள்ளார்.

இதை கேட்ட சில இளைஞர்கள் அந்த பகுதியில் வசூல் செய்து ரூ.10 ஆயிரத்தை முதியவரிடம் கொடுத்தனர். மேலும் பெரும்பாவூர் பள்ளி வாசல் செல்வதற்கு ஒரு ஜீப்பையும் ஏற்பாடு செய்து கொடுத்தனர்.அந்த ஜீப்பில் பெரும்பாவூர் சென்ற முதியவர் அங்கு டிரைவரை காத்திருக்குமாறு கூறிவிட்டு சுமார் ஒரு மணி நேரம் கழித்து திரும்பி வந்துள்ளார்.

பின்னர் அதே ஜீப்பில் குற்றிக்காட்டூர் பள்ளிவாசலுக்கு வந்து வழக்கம் போல் பிச்சை எடுக்க தொடங்கினார். இதைப் பார்த்த பள்ளி வாசல் நிர்வாகிகளுக்கு அந்த முதியவர் மீது சந்தேகம் ஏற்பட்டது. இதையடுத்து அவர்கள் அந்த முதியவரின் பையை பரிசோதித்தனர். அப்போது அந்த பையில் கத்தை கத்தையாக பணம் இருப்பது தெரிய வந்தது.

அவற்றை எடுத்து எண்ணி பார்த்தபோது ரூ.80 ஆயிரம் பணம் இருந்தது. மேலும் தபால் அலுவலகத்தில் ரூ.13 லட்சம் டெபாசிட் செய்ததற்கான பாஸ் புத்தகமும் இருந்தது. இது குறித்து அவர்கள் முதியவரிடம் கேட்டபோது, அந்த பணம் பிச்சை எடுத்தே சம்பாதித்ததாக தெரிவித்தார். இதையடுத்து பள்ளி வாசல் நிர்வாகிகள், மாவூர் போலீசுக்கு தகவல் கொடுத்தனர். அவர்கள் விரைந்து வந்து அந்த முதியவரை விசாரணைக்காக அழைத்து சென்றனர்.