தருமபுரம் ஆதீனம் முன்னிலையில் திருக்கடையூர் அமிர்தகடேஸ்வரர் கோவிலில் அபிராமி பட்டர் விழா

பொறையாறு,

திருக்கடையூர் அமிர்தகடேஸ்வரர் கோவிலில் அபிராமி பட்டர் விழா தருமபுரம் ஆதீனம் முன்னிலையில் நடந்தது.

அபிராமி பட்டர் விழா

சிறப்பு பெற்ற அபிராமி அந்தாதியை படைத்த அபிராமி பட்டரை போற்றும் வகையில் நாகை மாவட்டம் பொறையாறு அருகே திருக்கடையூர் அமிர்தகடேஸ்வரர் கோவிலில் ஆண்டுதோறும் அபிராமி பட்டர் விழா நடைபெறுவது வழக்கம். அதன்படி இந்த ஆண்டு அபிராமி பட்டர் விழா நடந்தது.

விழாவையொட்டி தருமபுரம் ஆதீனம் சண்முக தேசிக ஞானசம்பந்த பராமாச்சாரிய சாமிகள் முன்னிலையில் அபிராமி அம்மனுக்கு ரூ. 5 கோடி மதிப்பிலான நவ ரத்தினங்களால் செய்யப்பட்ட அங்கி சாத்தப்பட்டது. தொடர்ந்து அனைத்து சன்னதிகளிலும் அபிசேகம், சிறப்பு பூஜைகள், ருத்ராபிசேகம், பஞ்சமுக அர்ச்சனை, சுமங்கலி பெண்களுக்கு திருமாங்கல்யம் பிரசாதம் வழங்குதல் உள்ளிட்ட நிகழ்ச்சிகள் நடைபெற்றன.

பவுர்ணமி காட்சி

முன்னதாக அபிராமி அம்மன் போன்று சந்தனத்தால் செய்யப்பட்ட சிலைக்கு, நவரத்தின அங்கி அணிவிக்கப்பட்டு கோவிலின் நான்கு வீதிகளிலும் ஊர்வலமாக எடுத்து செல்லப்பட்டது. இதையடுத்து அபிராமி அம்மன் சன்னதியில் அபிராமி அந்தாதி பாடல்கள் பாடப்பட்டன.

அப்போது 76–வது பாடல் பாடி கொண்டிக்கும்போது கோவில் பிரகாரத்தில் விளக்குகள் அணைக்கப்பட்டு முழு நிலவு போன்ற மின்விளக்கு ஒளி காட்சி பக்தர்களுக்கு காண்பிக்கப்பட்டது. பின்னர் அனைவருக்கும் பிரசாதம் வழங்கப்பட்டது.

இதில் திருவாவடுதுறை ஆதீனம் அம்பலவான தேசிக பரமாச்சாரிய சாமிகள், திருப்பனாந்தாள் ஆதீனம் முத்துக்குமரசாமி தம்பிரான் சுவாமிகள், கட்டளை தம்பிரான் சாமிகள், கோவில் மேலாளர் கிருஷ்ணமூர்த்தி, காசாளர் கோவிந்தராஜ் உள்பட திரளான பக்தர்கள் கலந்து கொண்டனர்.