யாருடைய பணம்? - விடுதலைப் போராட்டக் கால நிகழ்வு!

**சிவா** · **சிவா** Thu Sep 20, 2012 11:57 am

புகழ்பெற்ற பாரத நாட்டு எழுத்தாளர் - நல்லாசிரியராகத் திகழ்ந்தவர் கே.ஏ. அப்பாஸ்.

விடுதலைப் போராட்டக் காலத்தில் கே.ஏ. அப்பாஸ் ஒரு பொது நல நிறுவனத்துக்காகப் பலரிடம் சென்று நிதி வசூல் செய்து கொண்டிருந்தார். பம்பாய் நகரத்துக்கு அப்போது மால்கம் ஹெய்லி என்ற வெள்ளையர் கவர்னராக இருந்தார்.

கே.ஏ. அப்பாஸ் தனது குழுவினருடன் ஒரு நாள் அவரைச் சந்தித்து நிதியுதவி கோரினார்.

மால்கம் ஹெய்லி கேலியாகச் சிரித்தார்.

``உங்களுக்குத்தான் வெள்ளைக்காரர்களைக் கண்டால் பிடிப்பதே இல்லயே? எங்களை இந்நாட்டில் இருந்து விரட்டியடிக்கப் பார்க்கிறீர்களே? அப்படியிருக்க என்னிடமே நிதி வசூலுக்கு வந்திருக்கிறீர்கள்?'' என்றார்.

உடனே அப்பாஸ் கம்பீரமாகக் குரலை உயர்த்தி, ``கவர்னர் அவர்களே! நாங்கள் உங்களிடம் கையேந்திப் பிச்சை கேட்கவில்லை. ஏறத்தாழ நூறு ஆண்டு காலமாக எங்கள் மக்களின் செல்வங்களைச் சுரண்டி எடுத்துச் சென்றிருக்கிறீர்களே, அதில் ஒரு பகுதியைத்தான் திரும்பக் கேட்க வந்திருக்கிறோம்'' என்றார்.

கவர்னர் மறுவார்த்தை பேசாமல் நூறு ரூபாயை அன்பளிப்பாகக் கொடுத்துவிட்டார்.