ஐஎஸ்ஐ புதிய தலைவர் ஷாரூக் கான் உறவினர்

பாகிஸ்தான் உளவு அமைப்பான
ஐஎஸ்ஐ புதிய தலைவர் ஷாரூக் கான் உறவினர்


புதுடெல்லி: பாகிஸ்தான் உளவு அமைப்பான ஐ.எஸ்.ஐ.யின் புதிய தலைவர் ஜாகிர் உல் இஸ்லாம், பாலிவுட் நடிகர் ஷாரூக் கானின் உறவினர் என்பது தெரிய வந்துள்ளது. பாகிஸ்தான் உளவு அமைப்பான ஐ.எஸ்.ஐ. யின் தற்போதைய தலைவராக இருக்கும் அகமத் சுஜா பாஷாவின் பதவி காலம் வரும் 18ம் தேதியுடன் முடிகிறது. இதையடுத்து, தற்போது கராச்சியில் ராணுவ கமாண்டராக இருக்கும் ஜாகிர் உல் இஸ்லாமை (56), ஐ.எஸ்.ஐ புதிய தலைவராக பிரதமர் யூசுப் ரசா கிலானி நியமித்துள்ளார். புதிதாக நியமிக்கப்பட்டுள்ள இஸ்லாம், ராணுவ தலைமை தளபதி அஷ்ரப் பர்வேஸ் கயானிக்கு நெருக்கமானவர். இந்திய சுதந்திர போராட்ட வீரர் நேதாஜி சுபாஷ் சந்திர போசின் இந்திய தேசிய ராணுவத்தில் மேஜர் ஜெனரலாக இருந்தவர் ஷா நவாஸ் கான்.

அவரது 2 மகன்களில் ஒருவர் இந்திய, பாகிஸ்தான் பிரிவினையின்போது ஷா நவாசுடன் இந்தியாவில் தங்கினார். மற்றொருவரான முகமது நவாஸ், பாகிஸ்தான் சென்றார். அங்கு ராணுவ வீரராக இருந்தார். அவரது மகன்தான் ஜாகிர் உல் இஸ்லாம். ஷா நவாஸ் கான் தத்தெடுத்த மகளான லத்தீப் பாத்திமா, பாலிவுட் நடிகர் ஷாரூக்கானின் தாய். அவர் இப்போது உயிருடன் இல்லை. இந்த விவரங்கள் ஷாரூக் கானின் வாழ்க்கை வரலாறாக பல இணைய தளங்களில் உள்ளன. அதன்படி, பாகிஸ்தானின் ஐ.எஸ்.ஐ புதிய தலைவர் ஜாகிர் உல் இஸ்லாம், நடிகர் ஷாரூக் கானின் சகோதரர் உறவு முறை என்று பாகிஸ்தான் ராணுவத்தின் முன்னணி ஆய்வாளர் இக்ரம் ஷேகல் நேற்று தெரிவித்தார்.