நெல்சாகுபடியில் சாதனை படைத்த மதுரை விவசாயி வி.கிருஷ்ணனுக்கு தேசிய விருது

**சிவா** · **சிவா** Sun Mar 11, 2012 8:12 am

மதுரை:நெல் சாகுபடியில் சாதனை படைத்த மதுரை குலமங்கலத்தை சேர்ந்த விவசாயி வி.கிருஷ்ணனுக்கு தேசிய அளவில் "மகிந்திரா சம்ரிதி' விருது வழங்கப்பட்டது.

சாகுபடியில் சாதனை படைக்கும் விவசாயிகளுக்கான 2012 ஆண்டு போட்டியில் தமிழகத்தில் இருந்து 1100 பேர் உட்பட 40 ஆயிரம் பேர் பங்கேற்றனர். இவர்களில் குலமங்கலம் வி.கிருஷ்ணன், 5 ஏக்கருக்கு குறைவான பிரிவில் முதலிடம் பெற்றார். இதற்காக டில்லியில் நடந்த விழாவில் மத்திய அமைச்சர் சரத்பவார் அவருக்கு விருது வழங்கினார். மேலும் சான்றிதழ் மற்றும் ரூ. 2.11 லட்சம் வழங்கப்பட்டது. மகிந்திரா நிர்வாக இயக்குனர் ஆனந்த் மகிந்திரா உட்பட பலர் பங்கேற்றனர். மாவட்ட அளவில் சாகுபடியில் சாதனை புரிந்ததற்காக கலெக்டர் சகாயத்திடமும் இவர் பரிசு பெற்றார்.

கிருஷ்ணன் கூறியதாவது: நவம்பரில் 2.5 ஏக்கரில் நெல்சாகுபடி செய்தேன். "இப்கோ' களஅலுவலர் சுரேஷ் கூறியபடி போட்டிக்கு விண்ணப்பித்தேன். புதிய தொழில் நுட்ப முறையில் திருந்திய நெல் சாகுபடி செய்தேன். இயந்திரம் மூலம் நடவு செய்து, களைபறித்தேன். அறுவடையும் இயந்திரம் மூலம் நடந்தது. பழைய முறையில் ஏக்கருக்கு ரூ. 11 ஆயிரத்து 800 செலவானது. 2500 கிலோ நெல் கிடைத்தது. புதிய முறையில் ரூ. 7 ஆயிரத்து 900 செலவானது. மகசூல் 4 ஆயிரம் கிலோ கிடைத்தது, என்றார்.

இவரை 89737 37379ல் தொடர்பு கொள்ளலாம்.