உலகிலேயே மிகப்பெரிய குர்ஆன்

**சிவா** · **சிவா** Wed Jan 18, 2012 6:46 am

உலகிலேயே மிகப்பெரிய திருக்குர்ஆன் கையெழுத்து பிரதியை ஆப்கானிஸ்தான் நாட்டின் கையெழுத்துக்கலை நிபுணர் உருவாக்கியுள்ளார். இந்த நூல் 2.28 மீட்டர் (90 அங்குலம்) உயரமும், 1.55 மீட்டர் (61 அங்குலம்) அகலமும் கொண்டது. இதன் எடை 500 கிலோ. இதில் உள்ள 218 பக்கங்கள் துணிகளாலும், தாள்களாலும் உருவாக்கப்பட்டுள்ளது. இதன் உள்ளே தோல் உறைகள் இந்த நூலை அலங்கரிக்கின்றன. இதற்காக 21 ஆடுகளின் தோல்கள் பயன்படுத்தப்பட்டுள்ளன. இந்த திருக்குர் ஆனை உருவாக்க ரூ.21/2 கோடி செலவானது.

இதை ஆப்கானிஸ்தானை சேர்ந்த கையெழுத்து நிபுணர் முகம்மது சபீர் கேத்ரி, 9 மாணவர்கள் உதவியுடன் உருவாக்கியுள்ளார். இதை உருவாக்க 5 ஆண்டு காலம் பிடித்தது. தங்க எழுத்துக்களாலும், அழகிய தோற்றத்துடனும் இந்த குர்ஆன் வடிவமைக்கப்பட்டுள்ளது. ``இந்த நூலில் பல விரும்பத்தக்க வண்ணங்களை கையாண்டு இருப்பதால் இந்த புனித திருக்குர்ஆன் மிகவும் பொலிவுடன் காணப்படுகிறது'' என்று முகம்மது சபீர் கேத்ரி தெரிவித்தார்.

இதற்கு முன்பு ரஷியாவில் உருவாக்கப்பட்ட 2 மீட்டர் உயரமும், 1.5 மீட்டர் அகலமும் கொண்ட திருக்குர்ஆன் உலகில் பெரிய புத்தகமாக கருதப்பட்டது. அதை முறியடித்து ஆப்கானிஸ்தானில் உருவாக்கப்பட்ட திருக்குர்ஆன் இப்போது முதல் இடத்தை பெற்றுள்ளது.