சினிமா விமர்சனம்: வேட்டை

கதாநாயகன்-கதாநாயகி: ஆர்யா-மாதவன்-அமலா பால்-சமீராரெட்டி.

டைரக்ஷன்: என்.லிங்குசாமி.

கதையின் கரு: பயந்த சுபாவமுள்ள அண்ணன், வீரமும் துணிச்சலும் மிகுந்த தம்பி ஆகிய இரண்டு சகோதரர்களை பற்றிய கதை.

மாதவனும், ஆர்யாவும் அண்ணன்-தம்பி. இவர்களின் தாத்தாவும் போலீஸ். அப்பாவும் போலீஸ். சின்ன வயதில் இருந்தே மாதவன் பயந்த சுபாவம். ஆர்யா, அடிதடிக்கு அஞ்சாத வீரர். அப்பாவின் மரணத்துக்குப்பின், அவருடைய வேலை மாதவனுக்கு கிடைக்கிறது.

தூத்துக்குடி நகரில் சப்-இன்ஸ்பெக்டராக பொறுப்பு ஏற்கிறார். அங்கு அண்ணாச்சி, மாரி என்று இரண்டு தாதாக்கள். முதல் வேலையே மாதவனுக்கு சோதனையாக அமைகிறது. மாரியினால் கடத்தப்பட்ட கஸ்டம்ஸ் ஆபீசரின் மகளை மீட்கும் வேலை அவரிடம் ஒப்படைக்கப்படுகிறது. மாதவனுக்கு பதில் ஆர்யா போய் மாரியுடன் மோதி, அந்த சிறுமியை மீட்கிறார். சிறுமியை மீட்ட துணிச்சல் மிகுந்த போலீஸ் அதிகாரி என்ற பெருமை மாதவனுக்கு கிடைக்கிறது.

அடுத்து, அண்ணாச்சியின் கடத்தல் லாரிகளை மடக்கி பிடிக்கும் வேலை மாதவனுக்கு வருகிறது. அவருக்கு பதில் ஆர்யா போய், கடத்தல் லாரிகளை மடக்குகிறார். இப்படி அண்ணன் செய்ய வேண்டிய வேலைகளை தம்பி செய்து முடித்து, அண்ணனுக்கு பெயர் வாங்கி கொடுக்கிறார்.

வில்லன்கள் சும்மா இருப்பார்களா? இரண்டு பேரும் ஒற்றுமையாகி, ஆர்யா-மாதவன் உயிருக்கு குறி வைக்கிறார்கள். அவர்களிடம் இருந்து ஆர்யாவும், மாதவனும் எப்படி தப்பித்து, தாதாக்களை தண்டிக்கிறார்கள்? என்பது மீதி கதை.

இந்த மெயின் கதைக்குள், அக்கா-தங்கையான சமீராரெட்டியும், அமலாபாலும் மாதவன்-ஆர்யாவுடன் இணையும் கிளைக்கதையை செருகியிருக்கிறார்கள்.

அந்தக்காலத்து எம்.ஜி.ஆர். பார்முலா கதை. அண்ணனை அடித்தவனை தம்பி திருப்பி அடிக்கும் சின்ன வயது மாதவன்-ஆர்யா சம்பந்தப்பட்ட காட்சியுடன், படத்தின் ஆரம்பமே அட்டகாசம். போலீஸ் வேலையை மாதவன் ஏற்க பயப்படுவது, ஆர்யா தைரியம் சொல்லி ஏற்க வைப்பது, மாதவனுக்கு கொடுக்கப்பட்ட முதல் வேலையை ஆர்யா முகத்தை மறைத்துக்கொண்டு போய் கச்சிதமாக செய்து முடிப்பது, அதன் மூலம் மாதவன் பெயர் வாங்குவது என கதை சுவாரஸ்ய றெக்கை கட்டி பறக்கிறது.

இப்படி படம் முழுக்க ஒவ்வொரு முடிச்சையும் வலுவாக போட்டு, பின்னர் புத்திசாலித்தனமாக அந்த முடிச்சுகளை அவிழ்த்திருக்கிறார், டைரக்டர் லிங்குசாமி. உதாரணத்துக்கு அந்த கேமரா. மாதவனுக்குப் பதில் ஆர்யா போய் சிறுமியை மீட்பதை கேமரா காட்டிக் கொடுப்பது; வில்லன்கள் இணைவது;

ஆர்யா-சமீராரெட்டியின் முதல் சந்திப்பு மோதலில் ஆரம்பிப்பதும், அவரையே அண்ணன் மாதவனுக்கு பெண் பார்ப்பதற்காக ஆர்யா போவதும், அங்கே சமீராரெட்டியின் தங்கை அமலாபாலை அவர் சந்திப்பதும், இன்ப அதிர்ச்சிகளுக்கு மேல் இன்ப அதிர்ச்சி.

ஆர்யா-அமலாபால் சம்பந்தப்பட்ட காதல் காட்சிகள், இப்படி ஒரு லவ் சீன்களை பார்த்து ரொம்ப நாளாகிறது என்று எண்ண வைக்கின்றன.

அண்ணன்-தம்பி கதாபாத்திரங்களுக்கு அழகாய் பொருந்தியிருக்கிறார்கள் மாதவனும், ஆர்யாவும். பயந்த சுபாவத்தை முகத்தில் காட்டுவதில் மாதவன் கெட்டி என்றால், அதிரடி சண்டை காட்சிகளில் ஆர்யா வெளுத்துக் கட்டுகிறார்.

நடுரோட்டில் ஆர்யாவுடன் சண்டை போடுகிற காட்சியிலும், வீட்டுக்கு வந்த வில்லன் ஹசுதோஷ்ரானாவை, ``வெளியே போ'' என்று ஆவேசமாக துரத்துகிற இடத்திலும், சமீராரெட்டியின் நடிப்பில் அனல் பறக்கிறது.

அமலாபால், இன்னும் கூடுதல் அழகோடு தெரிகிறார்.

உயர் போலீஸ் அதிகாரியாக வரும் நாசர், ஏட்டு தம்பி ராமய்யா, வில்லன் ஹசுதோஷ்ரானா கவனம் ஈர்க்கிறார்கள்.

வில்லனுக்கு முக்கியத்துவம் கொடுப்பதற்காக, அவர் சம்பந்தப்பட்ட காட்சிகளை வளர்த்து, படத்தின் நீளத்தை அதிகரித்திருப்பது தேவையா? பாடல்களின் பின்னணி ரசிக்க வைக்கிற அளவுக்கு, யுவன்சங்கர்ராஜாவின் இசை மனதை தொடவில்லை.

காட்சியுடன் பொருந்துகிற இயல்பான வசன வரிகள், சில இடங்களில் சிரிக்க வைக்கிறது. பல இடங்களில் கைதட்ட வைக்கிறது. திரைக்கதை வேகமும், விறுவிறுப்பும் மிகுந்த வேட்டை!

உண்மைதான் சிவா சார்...சிறந்த பொழுதுபோக்குத் திரைப்படம்...
முதல் பாதி முழுக்க திரையரங்கில் திருவிழா...
பாடல்கள் கை கொடுத்திருந்தால் மிகப்பெரிய வர்த்தக சினிமாவாகி இருக்கும்...

நன்றி சிவா சார்