கலப்பு திருமண குடும்பத்தார் கோயிலுக்குள் செல்ல தடை

**இளமாறன்** · **இளமாறன்** Tue 6 Dec 2011 - 1:47

Print | E-mail
திங்கட்கிழமை, 5, டிசம்பர் 2011 (18:27 IST)

கலப்பு திருமண குடும்பத்தார் கோயிலுக்குள் செல்ல தடை

நாமக்கல் மாவட்டம் எருமப்பட்டியை அடுத்த ஜம்புமடை கிராமத்தில் கலப்பு திருமணம் செய்ய ஊர்க் கட்டுபாடு உள்ளது. ஊர்க்கட்டுப்பாட்டை மீறி கலப்பு திருமணங்கள் செய்தால் சம்பந்தப்பட்ட ஆண் அல்லது பெண் குடும்பத்தாரை ஊரை விட்டு தள்ளி வைப்பதாக கூறப்படுகிறது.

இந்நிலையில், கடந்த மாதம் கலப்பு திருமணம் செய்து கொண்ட பெண்ணின் பெற்றோரை, மாரியம்மன் திருவிழாவின்போது கோயிலுக்குள் நுழையக் கூடாது என சிலர் தடுத்துள்ளனர். இதனால் மனமுடைந்த அவர், எருமப்பட்டி போலீசில் கடந்த மாதம் புகார் கொடுத்தார்.

புகாரின் பேரில், சம்பந்தப்பட்ட ஊர் பஞ்சாயத்தாரை அழைத்து இருதரப்பினரையும் போலீசார் சமரசம் செய்து வைத்தனர். பின் னர் அவர்கள் கோயிலுக்குள் செல்ல அனுமதிக்கப்பட்டனர்.

இதேபோல் கலப்பு திருமணம் செய்த 11 குடும்பத்தினரும் ஊரை விட்டு தள்ளிவைக்கப்பட்டுள்ளனர்.

இவர்கள் கடந்த சில நாட்களுக்கு முன், எல்லோரும் கோயிலுக்குள் சென்று வழிபாடு செய்வது போல், நாங்களும் வழிபாடு செய்ய வேண்டும் என எருமப்பட்டி போலீசில் புகார் கொடுத்தனர்.

போலீசார் சம்பவ இடத்திற்கு சென்று கோயில் பூசாரி, ஊர் பஞ்சாயத்தாரை எச்சரித்து அனைவரும் கோயிலில் சென்று வழிபட அனுமதிக்க வேண்டும் என்றனர்.

இல்லையென்றால் சட்டப்படி நடவடிக்கை எடுக்கப்படும் என எச்சரித்தனர். இதையடுத்து ஊரைவிட்டு தள்ளி வைக்கப்பட்ட 11 குடும்பத்தாரும் கோயிலுக்குள் செல்ல அனுமதிக்கப்பட்டனர். போலீசார் தொடர்ந்து இந்த கிராமத்தை கண்காணித்து வருவதால் இப்பகுதியில் பரபரப்பு ஏற்பட்டுள்ளது. நக்கீரன்