விடுதலை செய்யக்கோரி முதல்வருக்கு நளினி கடிதம்

கோவைசிவா · கோவைசிவா Tue Sep 22, 2009 9:18 pm

செப்டம்பர் 22,2009,00:00 IST

"தமிழக சிறைகளில் 18 ஆண்டுகளாக இருக்கும் என்னை விடுதலை செய்ய வேண்டும்' என, தமிழக முதல்வருக்கு, ராஜிவ் கொலைக் குற்றவாளி நளினி மனு மூலம் வேண்டுகோள் விடுத்துள்ளார்.ராஜிவ் கொலை வழக்கில் வேலூர் சிறையில் தண்டனை அனுபவித்து வரும் நளினி, முதல்வர் கருணாநிதிக்கு அனுப்பியுள்ள மனு:

நான் 18 ஆண்டுகள், மூன்று மாதமாக தமிழக சிறைகளில் இருக்கிறேன். என் கணவர் முருகன் வேலூர் மத்திய சிறையில் மரண தண்டனை சிறைவாசியாக இருக்கிறார். ஏழு ஆண்டுகள் அல்லது 10 ஆண்டுகள் பூர்த்தி செய்த ஆயுள் சிறைவாசிகளை ஆண்டுதோறும் தமிழக அரசு விடுதலை செய்து வருகிறது.என்னை மட்டும் விடுதலை செய்யவில்லை. என் வழக்கில், சென்ற ஆண்டு சென்னை ஐகோர்ட் வழங்கிய தீர்ப்பை இதுவரை செயல் படுத்தவில்லை.என் பெற்றோர், வயதானவர்கள். அவர் களுக்கும், பருவமடைந்த என் மகளுக்கும் என் ஆதரவும், அருகாமையும் அவசியமானதாக உள்ளது.

எனவே இந்த ஆண்டு அண்ணாதுரை பிறந்தநாளின் போது விடுதலை செய்யப்படும் ஆயுள் சிறைவாசிகளுடன் என்னையும் விடுவிக்க வேண்டுகிறேன்.இவ்வாறு அதில் தெரிவித்துள்ளார்.

இந்த கடிதம் செப்., 10ம் தேதியிட்டு, நளினியின் வக்கீல் மூலமாக முதல்வருக்கு அனுப்பப் பட்டுள்ளது.அண்ணாதுரை பிறந்த நாளையொட்டி, விடுதலையான ஆயுள் சிறைவாசிகள் பட்டியலில் நளினியின் பெயர் இல்லை. இந்நிலையில், தன்னை விடுவிக்க வேண்டி நளினி, வேலூர் சிறையில் உண்ணாவிரதம் இருந்து வருகிறார்.

நளினி உண்ணாவிரதம்:வேலூர்: வேலூர் பெண்கள் சிறையில் அடைக்கப்பட்டுள்ள ராஜிவ் கொலையாளி நளினி, தன்னை விடுதலை செய்யக் கோரி உண்ணாவிரதம் இருந்தார். இதே வழக்கில் கைதான ராபர்ட் பயாஸ், ஆறாவது நாளாக நேற்று உண்ணாவிரதத்தை தொடர்ந்தார்.முன்னாள் பிரமதர் ராஜிவ் கொலை வழக்கில், தூக்கு தண்டனை விதிக்கப்பட்டு, பின் ஆயுள் தண்டனையாக குறைக்கப்பட்ட நளினி, வேலூர் பெண்கள் சிறையில் அடைக்கப்பட்டுள்ளார்.

சிறையில் இருக்கும் நளினி, விடுதலை செய்யக் கோரி கடந்தாண்டு சென்னை ஐகோர்ட்டில் மனு தாக்கல் செய்தார். நளினியை விடுதலை செய்வது குறித்து ஆலோசனைக்குழுவை அமைக்கும்படி தமிழக அரசுக்கு, ஐகோர்ட் உத்தரவிட்டது.நீதிமன்ற உத்தரவுப்படி, தமிழக அரசு நளினியை விடுதலை செய்வது குறித்து, ஆலோசனைக் கமிட்டி அமைத்தது. ஆனால், நளினி விடுதலை செய்யப்படவில்லை.

நளினி மீண்டும் ஐகோர்ட்டில் மனு தாக்கல் செய்த போது, ஆலோசனை கமிட்டியை மாற்றி அமைக்கும்படி நீதிமன்றம் உத்தரவிட்டது.நீதிமன்றம் உத்தரவிட்டு, ஓராண்டாகியும் ஆலோசனை கமிட்டியை தமிழக அரசு மாற்றி அமைக்கவில்லை. இதையடுத்து, தன்னை விடுதலை செய்யக் கோரியும், ஆலோசனைக்கமிட்டியை மாற்றி அமைக்கக் கோரியும் நளினி சார்பில், கடந்த வாரம் மீண்டும் சென்னை ஐகோர்ட்டில் மனு தாக்கல் செய்யப்பட்டது.

நேற்று காலை முதல், நளினி உண்ணாவிரதம் இருக்கிறார். உண்ணாவிதரம் இருப்பது குறித்து, சிறை அதிகாரிகளுக்கு நளினி கடிதம் கொடுத்துள்ளார். இதேபோல், ராஜிவ் கொலை வழக்கில் ஆயுள் தண்டனை பெற்று வேலூர் மத்திய ஆண்கள் சிறையில் அடைக்கப்பட்டுள்ள ராபர்ட் பயாஸ், தன்னை விடுதலை செய்யக் கோரி, கடந்த 16ம் தேதி முதல், உண்ணாவிரதம் இருந்து வருகிறார். நேற்று, ஆறாவது நாளாக உண்ணாவிரதத்தை தொடர்ந்தார்