சத்துணவு முட்டைகளில் வண்ணக் குறியீடு!

சத்துணவு முட்டைகளில் வண்ணக் குறியீடு! இன்று முதல் மீண்டும் அமல்

First Published : 29 Aug 2011 03:30:43 AM IST


கோவை, ஆக. 28: சத்துணவு முட்டைகளில் வண்ணக் குறியீடு இடும் நடைமுறை இன்று (திங்கள்கிழமை) மீண்டும் அமலுக்கு வருகிறது.

÷தமிழகம் முழுவதும் சத்துணவுத் துறை மூலமாக பள்ளி மாணவர்களுக்கு முட்டைகள் வழங்கப்படுகின்றன. வாரத்தில் ஒரு நாளாகத் தொடங்கப்பட்ட இத்திட்டம் பிறகு 3 நாளாகவும், அதைத் தொடர்ந்து 5 நாள்களாகவும் அதிகரிக்கப்பட்டது. தற்போது திங்கள் முதல் வெள்ளிக்கிழமை வரை தினமும் முட்டை வழங்கப்படுகிறது. அந்தந்த மாவட்டங்களில் சத்துணவுத் துறை மூலமாக, முட்டை கொள்முதல் செய்யப்பட்டு, ஊராட்சி ஒன்றியங்கள் மூலமாக பள்ளிகளுக்கு வழங்கப்படுகிறது.

÷சத்துணவுத் திட்டத்தில் வழங்கப்படும் முட்டைகளைச் சாப்பிடும் மாணவர்களுக்கு சில நேரங்களில் வாந்தி, மயக்கம் ஏற்பட்டு வருகிறது. கெட்டுப்போன முட்டைகள் கலந்து விடுவதால் இந்த நிகழ்வுகள் தவிர்க்க முடியாததாகிறது. இன்னும் சில இடங்களில் சத்துணவுத் திட்ட முட்டைகள், வெளிச்சந்தையில் விற்பனை செய்யப்படுவதாகவும் குற்றச்சாட்டுகள் இருக்கின்றன. இப் பிரச்னைகளைத் தவிர்ப்பதற்காக சத்துணவுத் திட்ட முட்டைகளின் மேல் ஓட்டில் வண்ணக் குறியீடு இடப்பட்டது. பின்னர் அந்த நடைமுறை படிப்படியாக கைவிடப்பட்டது.

÷இந்நிலையில், தற்போது முட்டைகளின் மேல் ஓட்டில் வண்ணக் குறியீட்டை கண்டிப்பாக இட வேண்டும் என்று, சத்துணவுத் துறை அதிகாரிகள், ஊராட்சி ஒன்றியங்களின் ஆணையர்களுக்கு அறிவுறுத்தியுள்ளனர்.

÷இதன்படி திங்கள் - பச்சை, செவ்வாய் - நீலம், புதன் - சிவப்பு, வியாழன் - கறுப்பு, வெள்ளி - மஞ்சள் வண்ணங்களில் பெருக்கல் குறி இட வேண்டும் என்று அறிவுறுத்தப்பட்டுள்ளது. சத்துணவுத் திட்டத்தில் வழங்கப்படும் முட்டை 46 கிராம் எடையிருக்க வேண்டும் என்றும் அந்த சுற்றறிக்கையில் தெரிவிக்கப்பட்டுள்ளது. ஊராட்சி ஒன்றியங்களின் ஆணையர்கள் மூலமாக பள்ளிகளின் சத்துணவு அமைப்பாளர்களுக்கு இந்தச் சுற்றறிக்கை வழங்கப்பட்டுள்ளது. இன்று (திங்கள்கிழமை) முதல் வண்ணக் குறியீடு இடப்பட்ட முட்டைகள் பள்ளிகளுக்கு வழங்கப்பட உள்ளன
தினமணி