துன்பங்களை கடவுள் தீர்ப்பார்

jesudoss · jesudoss Wed 10 Aug 2011 - 19:37

ஒருவர், தொடர்ந்து ஜெபம் செய்து கொண்டிருக்கும் போது பல நன்மையான காரியங்கள் நடக்கும். "ஆகா! இது ஜெபத்தின் பலன், ஆண்டவர் நம் மீது கருணை மழை பொழிகிறார்' என்று சொல்வார். என்றாவது, ஒரு துன்பம் வந்துவிட்டால் கூட, சாத்தான் தன் வேலையைக் காட்ட ஆரம்பித்து விடுவான்.
""பார்த்தாயா! பார்த்தாயா! நீ முழங்காலில் நின்று ஜெபித்து முட்டு தேய்ந்தது தான் மிச்சம். உனக்கு கிடைத்த நன்மைகளெல்லாம் இந்த ஒரே இழப்பால் போய்விட்டதே! இனியெதற்கு ஜெபம்!'' என்று சத்தமாகச் சொல்வான். பக்தரும் அவனை நம்பி ஏமாந்து போவார்.
ஒரு பெண் தினமும் தவறாமல் ஆலயத்துக்கு வந்து ஜெபம் செய்வார். ஒருமுறை, அவரது கணவர் யாரோ பெண்ணுடன் தொடர்பு கொண்ட செய்தியை அறிந்தார். மனம் நொந்தார். ஜெபத்தை அவரால் தொடர்ந்து செய்ய முடியாமல் மனம் இடறியது. சாத்தான், இதை ஊக்குவிக்கும் வகையில் சிலரைத் தூண்டிவிட்டான்.
""உன் கணவனை அந்தப்பெண்ணோடு சினிமா தியேட்டரில் பார்த்தேனே! அவர்கள் சிரித்து மகிழ்ந்து விளையாடிக் கொண்டிருந்தார்களே!'' என்பார்கள் அவர்கள். அந்தப்பெண்ணின் மனம் மேலும் புண்படும்.
ஒருநாள், கர்த்தர் அவரை பலமாய் அபிஷேகம் செய்தார். அந்தப்பெண் தன் வாழ்க்கைச்சூழலை மறந்து ஊழியத்துக்காக கிளம்பிவிட்டார். மற்றவர்களின் குறைகேட்டு ஆறுதல் சொன்னார். ஒரு கட்டத்தில், அவரது கணவரும் மனம்திரும்பி வந்துவிட்டார்.
""கர்த்தர் தமது ஜனத்திற்கு பெலன் கொடுப்பார்,'' என்ற சங்.29:11 வசனம் மெய்யானது. எனவே, தற்காலிக துன்பங்களைக் கண்டு ஜெபத்தைக் கைவிடாதீர்!