விம்பிள்டன் டென்னிஸ்: அரை இறுதியில் நடால் முர்ரேயுடன் மோதல்

ராமகிருஷ்ணன் · 18/06/2011

லண்டன், ஜூன். 30-

கிராண்ட்சிலாம் போட்டிகளில் ஒன்றான விம்பிள்டன் டென்னிஸ் போட்டி லண்டன் நகரில் நடைபெற்று வருகிறது. இதன் ஆண்கள் ஒற்றையர் கால் இறுதி ஆட்டம் நேற்று நடந்தது.

உலகின் நம்பர் ஒன் வீரரும், நடப்பு சாம்பியனுமான ரபெல் நடால் (ஸ்பெயின்) கால் இறுதியில் 10-ம் நிலை வீரரான மார்டி பிஷ்சை எதிர் கொண்டார்.

இதில் நடால் 6-3, 6-3, 5-7, 6-4 என்ற செட் கணக்கில் வென்று அரை இறுதிக்கு தகுதி பெற்றார். நடால் அரை இறுதியில் இங்கிலாந்து வீரர் ஆண்டி முர்ரேயை சந்திக்கிறார்.4-ம் நிலை வீரரான அவர் கால் இறுதியில் ஸ்பெயினை சேர்ந்த லோபசை 6-3, 6-4, 6-4 என்ற நேர் செட் கணக்கில் வென்றார்.

முர்ரே தொடர்ந்து 3-வது முறையாக அரை இறுதியில் நுழைந்து உள்ளார். இதேபோல உலகின் இரண்டாம் நிலை வீரரான நோவக் ஜோகோவிக் (செர்பியா) முன்னேறினார். அவர் 6-2, 3-6, 6-3, 7-5 என்ற செட் கணக்கில் டோமிக்கை (ஆஸ்திரேலியா) தோற்கடித்தார். ஜோ கோவிக் 3-வது முறையாக விம்பிள்டன் அரை இறுதிக்கு நுழைந்து உள்ளார்.

ஜேகோவிக் அரை இறுதியில் 12-ம் நிலை வீரரான சோங்காவை (பிரான்ஸ்) எதிர்கொள்கிறார். சோங்கா கால் இறுதியில் 3-ம் நிலை வீரரான பெடரரை 3-2 என்ற கணக்கில் அதிர்ச்சிகரமாக தோற்கடித்தார்.

பெண்கள் ஒற்றையர் அரை இறுதி ஆட்டம் இன்று நடக்கிறது. இதிர் மோதும் வீராங்கனைகள் வருமாறு:-

1. விக்டோரியா (பெலா ரஸ்)- குவிட்டோவா (செக் குடியரசு)

2. ஷரபோவா (ரஷியா)- லிசிகி (ஜெர்மனி).