காரைக்குடியில் பாரம்பரியத்தை வீட்டிற்கு அனுப்பிய அ.தி.மு.க.

**சிவா** · **சிவா** Sat May 14, 2011 9:47 am

கே.ஆர்.ராமசாமி

காரைக்குடி : காரைக்குடி தொகுதி ஓட்டு எண்ணிக்கையில் அ.தி.மு.க.,வேட்பாளர் பழனிச்சாமி தொடர்ந்து முன்னணி வகித்ததால், மத்திய அமைச்சர் சிதம்பரத்தின் ஆதரவாளரான காங்., வேட்பாளர் ராமசாமி, அதிருப்தியுடன் மையத்தை விட்டு வெளியேறினார். 1989 முதல் 2011 வரை தொடர்ந்து 5 முறை திருவாடானை தொகுதி எம்.எல்.ஏ.,வாக இருந்தவர் கே.ஆர்.ராமசாமி. தொகுதி சீரமைப்புக்கு பின், அவருக்கு சாதகமாக இருந்த தேவகோட்டை, கண்ணங்குடி பகுதி காரைக்குடி தொகுதியுடன் இணைக்கப்பட்டது. திருவாடானையில் மீண்டும் போட்டியிட்டால் வெற்றி பெற முடியாது எனக்கருதி, அமைச்சர் சிதம்பரத்தின் சிபாரிசில், காரைக்குடி தொகுதியில் போட்டியிடும் வாய்ப்பை பெற்றார். 6வது முறையாக எம்.எல்.ஏ.,ஆகி விடவேண்டும் என்ற ஆவலில், அமைச்சர் சிதம்பரத்துடன் தொகுதி முழுவதும் தீவிர பிரசாரத்தில் ஈடுபட்டார்.

பிசுபிசுத்த பிரசாரம்: வேட்பாளருக்காக மத்திய அமைச்சரே பிரசாரம் செய்ததால், அ.தி.மு.க., வேட்பாளர் பழனிச்சாமியின் பிரசாரம் பிசுபிசுத்து காணப்பட்டது. இருப்பினும், காங்., கட்சியினரின் உள்ளடி வேலைகளால், அ.தி.மு.க., விற்கு மறைமுகமாக ஆதரவு பெருகியது. நேற்று ஓட்டு எண்ணிக்கையின் 5 வது சுற்று வரை ராமசாமி மையத்தில் இருந்தார். அ.தி.மு.க., வேட்பாளர் பழனிச்சாமி 5,000 ஓட்டுக்கள் முன்னணியில் இருந்ததால், அதிருப்தியடைந்த ராமசாமி, ஓட்டு எண்ணும் மையத்தை விட்டு வெளியேறினார்.

வீட்டுக்கு சென்ற பாரம்பரியம்: தனது தந்தை கரியமாணிக்கம் அம்பலம் முதல் தொடர்ந்து பாரம்பரியமாக திருவாடானை தொகுதியில் வெற்றி பெற்று செல்வாக்குடன் இருந்தவர் ராமசாமி. இப்பாரம்பரியத்தையே மலைக்க வைக்கும் வகையில்,தொகுதிக்கு புதியமுகமாக வந்த பழனிச்சாமி, பாரம்பரிய எம்.எல்.ஏ.,வை பின்னுக்கு தள்ளி வீட்டிற்கு அனுப்பினார்.

தினமலர்