நக்சலைட் ராக்கெட் வீச்சு? ராஜசேகர ரெட்டி ஹெலிகாப்டர் விபத்து

சித்தூர், ஆந்திர முதல்வர் ஒய்.எஸ்.ராஜசேகர ரெட்டி சென்ற ஹெலிகாப்டர் மீது நக்சலைட் தீவிரவாதிகள் ராக்கெட் லாஞ்சர் ஏவி தாக்கியிருக்கலாம் என்ற சந்தேகம் எழுந்துள்ளது. அவரது கால் 4 கிலோ மீட்டர் தொலைவுக்கு அப்பால் விழுந்துள்ளது. இதிலிருந்து ராக்கெட் தாக்குதல் சந்தேகம் வலுத்துள்ளது. சிஐடி போலீசார் தீவிர விசாரணை நடத்துகின்றனர். ஆந்திர முதல்வர் ஒய்.எஸ். ராஜசேகர ரெட்டி சென்ற ஹெலிகாப்டர் கர்னூல் மாவட்டம் நல்லமலை வனப்பகுதியில் மோதி வெடித்து சிதறியது. இதில் முதல்வர் உட்பட அவருடன் பயணம் செய்த தலைமை பாதுகாப்பு அதிகாரி வெஸ்லி, முதன்மை செயலாளர் சுப்பிரமணியம் மற்றும் பைலட் எம்.எம். ரெட்டி, துணை பைலட் எஸ்.கே. பாட்டியா ஆகியோரும் உடல் கருகி பலியாயினர்.

தீவிர தேடுதல் வேட்டைக்கு பிறகு ஹெலிகாப்டரின் சிதறல்கள் கண்டுபிடிக்கப்பட்டு உடல்கள் மீட்கப்பட்டன. ஆந்திர முதல்வரை பலி கொண்ட இந்த அதிர்ச்சியான விபத்து குறித்து பல்வேறு கோணங்களில் விசாரணை நடந்து வருகின்றது. தேடுதல் வேட்டையின்போது விமானத்தின் கறுப்பு பெட்டி போன்ற ஹெலிகாப்டரின் காக்பிட் வாய்ஸ் ரெக்கார்டர் கருவியை ராணுவ மீட்புக்குழு கண்டுபிடித்தது. இந்த கருவி உள்நாட்டு விமான போக்குவரத்து பொது இயக்குனரகத்திடம் ஒப்படைக்கப்பட்டுள்ளது. தற்போது அது ஆய்வு செய்யப்பட்டு வருகிறது. முதல்வர் ராஜசேகர ரெட்டி ஹெலிகாப்டர் விபத்தில் இறந்தாரா? அல்லது சதி வேலை காரணமாக அவர் கொல்லப்பட்டாரா? என்ற கோணங்களில் சிஐடி போலீசார், விமானத்துறை அதிகாரிகள், மத்திய தனிக்குழு பிரிவினர் மற்றும் மாநில போலீசார் அடங்கிய 4 சிறப்பு குழுக்கள் தீவிரமாக விசாரித்து வருகின்றனர். இந்நிலையில் சம்பவம் நடந்த நல்லமலை வனப்பகுதியில் நேற்று புலனாய்வுத்துறையினர் மற்றும் போலீசார் ஆய்வு செய்தனர்.

சம்பவம் நடந்த பகுதியை சுற்றிலும் ஒரு கிலோ மீட்டர் தூரத்திற்கு அங்கு பலத்த மழையிலும், மரங்கள் எரிந்து சாம்பாலாகியிருந்தது. ஹெலிகாப்டர் விபத்து ஏற்பட்டு உடல்களை மீட்ட அன்று, சுமார் 4 கிலோ மீட்டர் தொலைவில் முதல்வர் ராஜசேகர ரெட்டியின் கால் சிதறி கிடந்தது. இதனால் நக்சலைட் தீவிரவாதிகள் ராக்கெட் லாஞ்சர் பயன்படுத்தி ஹெலிகாப்டரை தகர்த்திருக்கலாம் என்ற சந்தேகம் எழுந்துள்ளது. இதனிடையே விபத்து நடந்த இடத்தில் நேற்று ஆய்வு செய்த அதிகாரிகள் அங்கு சிதறி அழுகிய நிலையில் இருந்த மனித உடல் உறுப்புகளை மீட்டனர். இந்த உடல் உறுப்புகள் யாருடையது என்பது தெரியவில்லை. இதேபோல் அங்கு சிதறிக்கிடந்த ஹெலிகாப்டரின் இறக்கைகள், ஆக்சில், சக்கரங்கள், வாய்ஸ் ரெக்கார்டர், வீடியோ ரெக்கார்டர் போன்ற அனைத்து பாகங்களையும் போலீசார் மீட்டு கர்னூலுக்கு கொண்டு வந்தனர். ஆய்வுக்கு உட்படுத்தியுள்ளனர். இதனிடையே மத்திய விசாரணை கமிஷன் மற்றும் தலைமை விமானத்துறை கமிஷன் ஆகிய 2 குழுவினர்கள் இன்று கர்னூலுக்கு வர உள்ளனர். சம்பவம் நடந்த இடத்தை பார்வையிடுகின்றனர். விசாரணை தீவிரமடைந்துள்ளது.

இதென்ன புது குழப்பம் ??