அரசியலில் விஜயகாந்த் வில்லன் : ஸ்டாலின் வர்ணனை

சென்னை : ""சினிமாவில் கதாநாயகனான விஜயகாந்த், அரசியலில் வில்லன் தான்,'' என, துணை முதல்வர் ஸ்டாலின் தெரிவித்தார். திருப்போரூர் தொகுதி பா.ம.க., வேட்பாளர் ஆறுமுகம், செய்யூர் தொகுதி விடுதலை சிறுத்தைகள் வேட்பாளர் பார்வேந்தன் ஆகியோரை ஆதரித்து, திருக்கழுக்குன்றத்தில் நேற்று முன்தினம் இரவு ஸ்டாலின் பிரசாரம் செய்தார். அப்போது அவர் பேசியதாவது: ஒருவர் வேட்பாளரையே அடிக்கிறார். நாம் அதை பேசினால், நம் நாகரிகம் தான் கெடும். அவர் சினிமாவில் தான் காதாநாயகன். அரசியலில் வில்லன். வரலாற்று முக்கியத்துவம் உள்ள கட்சிகளின் கூட்டணியுடன், தேர்தல் களம் காண்கிறோம்.
அனைவரும் கலந்தாலோசித்து விவாதித்து முடிவெடுக்கிறோம். பிரசாரம் செய்கிறோம். எதிர் கூட்டணியில், ரிஷிவந்தியம் தொகுதியில் பிரசாரம் செய்த அம்மையார், வேட்பாளரின் பெயரை சொல்லவில்லை. இது என்ன கூட்டணியோ? கடந்த தேர்தலில் தேர்தல் அறிக்கை தான் கதாநாயகன். இந்த தேர்தலில், தேர்தல் அறிக்கை கதாநாயகி. அங்குள்ளவர்களோ முன்னாள் கதாநாயகி. முன்னாள் கதாநாயகன்.
கடந்த தேர்தலில், சொன்னதை நிறைவேற்றிய உரிமையில், உங்களை நாடி வந்துள்ளோம். வரும் காலத்திலும், கருணாநிதி நிச்சயம் நிறைவேற்றுவார். முன்பு பதவிப் பிரமாணம் எடுத்தவுடனே, ஒரு கிலோ அரிசி 2 ரூபாய்க்கு வழங்க உத்தரவிட்டார். பின், ஒரு ரூபாயாக குறைத்தார். சத்துணவில் வாரத்திற்கு ஐந்து முட்டை போடுகிறோம். தி.மு.க., ஆட்சியில் உள்ள திருமண நிதியுதவி திட்டம் அ.தி.மு.க., ஆட்சியில் நிறுத்தப்படும். தற்போது, இந்நிதி 25 லிருந்து 30 ஆயிரம் ரூபாயாக உயர்த்தப்பட்டுள்ளது. கர்ப்பிணி பெண்கள் நிதியை 10 ஆயிரம் ரூபாயாக உயர்த்தி அறிவித்துள்ளார். முதியோர் பென்சனை 750 ரூபாயாக உயர்த்தியுள்ளார். இவ்வாறு ஸ்டாலின் பேசினார்.




தினமலர்.